Примерное время чтения: 2 минуты
163

Адыгеим и ЛIышъхьэ республикэм щыпсэухэрэм яупчIэхэм джэуапхэр къаритыжьыгъ

Майкоп, 21 февраля, АиФ-Адыгея. Мэзаем и 18-м Адыгэ Республикэм и ЛIышъхьэу ТхьакIущынэ Аслъан телеканалэу "Урысыер-24-рэ" зыфиIорэм занкIэу къыщыгущыIагъ, Адыгеим щыпсэухэрэм упчIэу къатыгъэхэм джэуапхэр къаритыжьыгъ.

ЗэнкIэ зэдэгущыIэгъур рамыгъажьэзи, ар заублэми упчIэхэр телекомпаниеу «Адыгеим» къэбархэмкIэ икъулыкъу ыугъоигъэх. ПэшIорыгъэшъэу республикэм ипащэ телефонымкIэ нэбгырэ 400 фэдизмэ яупчIэхэр къыфагъэзагъэх. АР-м и ЛIышъхьэ занкIэу къызыщыгущыIэрэ эфирым илъэхъан джыри нэбгыри 150-рэ къытеуагъ.

Шъугу къэдгъэкIыжьын АР-м и ЛIышъхьэ блэкIыгъэ илъэсым мыщ фэдэ шIыкIэр апэрэу ыгъэфедэзэ Адыгеим щыпсэухэрэм яупчIэ 300-м ехъум джэуапхэр къызэраритыжьыгъагъэр. Мызыгъэгум цIыфхэм къатыгъэ упчIэхэм янахьыбэр медицинэ фэIо-фашIэхэм, псэупIэ-коммунальнэ хъызмэтым ылъэныкъокIэ щыIэ шапхъэхэр зэраукъохэрэм, социальнэ IэпыIэгъум, кIэлэцIыкIухэм ягъэсэныгъэ япхыгъагъэх.

Совет лъэхъаным ыуж зэхэзыжьыгъэ предприятиехэм къарыкIуагъэм, ежь цIыфхэр зыщыпсэухэрэ чIыпIэхэм ыкIи республикэм хэхъоныгъэхэр ашIынхэмкIэ гухэлъэу щыIэхэм афэгъэхьыгъэ упчIэхэри щыIагъэх.

Нэбгырэ пэпчъ зыгъэгумэкIырэ Iофыгъом АР-м и ЛIышъхьэу ТхьакIущынэ Аслъан шъхьэихыгъэ джэуапхэр къаритыжьыным ынаIэ тыригъэтыгъ. Джащ фэдэу зэнкIэ зэдэгущыIэгъур кIозэ министерствэхэм ыкIи къулыкъухэм япащэхэм пшъэрылъ гъэнэфагъэхэр афишIыгъэх.

- Хэбзэ къулыкъухэмрэ обществэмрэ шъхьэихыгъэу тызэдэгущыIэным, Адыгеим щыпсэухэрэм ягумэкIыгъохэр зэхэтфыным тафэхьазыр. Мыщ фэдэ шIыкIэм ишIуагъэкIэ республикэм игъэцэкIэкIо ыкIи ихэбзэгъэуцу къулыкъухэм непэ Iофэу ашIэрэм цIыфхэр щыгъозэнхэ алъэкIы. Ащ дакIоу зэшIомыхыгъэ Iофыгъохэм республикэм ипащэхэм анаIэ тырарагъадзэ, - къыIуагъ Iофтхьабзэм зэфэхьысыжьхэр къыфишIызэ ТхьакIущынэ Аслъан.

ЗэдэгущыIэгъур сыхьатрэ такъикъипшIырэ кIуагъэ. Ащ къыкIоцI Адыгеим и ЛIышъхьэ упчIэ 50-м ехъумэ джэуапхэр къаритыжьыгъ. АР-м и ЛIышъхьэ ыцIэкIэ къэкIогъэ упчIэхэр зэкIэ эфирым къыщаIонхэ игъо ифагъэхэп.

Ащ яджэуапхэр республикэм икъэбар жъугъэм иамалхэу «Адыгэ макъэм», «Советскэ Адыгеим», «АиФ-Адыгеим» ыкIи АР-м игъэцэкIэкIо хэбзэ къулыкъухэм яофициальнэ сайт къарыхьащтых.

АР-м и ЛIышъхьэ и пресс-къулыкъу.

Смотрите также:

Оцените материал
Оставить комментарий (0)

Также вам может быть интересно

Топ 5 читаемых

Самое интересное в регионах