133

Адыгеим и ЛIышъхьэ Рострудым ипащэ игуадзэу Иван Шкловец IукIагъ

Майкоп, 28 февраля – АиФ-Адыгея. Адыгеим и ЛIышъхьэу ТхьакIущынэ Аслъан мэзаем и 26-м IофшIэнымкIэ ыкIи цIыфхэм IофшIапIэхэр къафэгъотыгъэнымкIэ Федеральнэ къулыкъум ипащэ игуадзэу Иван Шкловец IукIагъ.

Республикэм ипредприятиехэм лэжьапкIэ чIыфэу ателъхэр зэрэзытырагъэкIыжьырэм, Урысые Федерацием и Президент и Указэу бюджетым епхыгъэу Iоф зышIэхэрэм ялэжьапкIэ къэIэтыгъэным ехьылIагъэр зэрагъэцакIэрэм мы зэIукIэгъум щатегущыIагъэх.

- Республикэм ипредприятие зырызхэм лэжьапкIэмкIэ чIыфэхэр ателъых. Iофыгъоу къэуцугъэхэр зэхэтфынхэм, ахэм язэшIохынкIэ шIыкIэ-амалхэм тызэдяусэным тэ тыфэхьазыр, - щыхигъэунэфыкIыгъ зэIукIэгъум ипэублэ Адыгэ Республикэм и ЛIышъхьэ.

IофшIэнымкIэ ыкIи IофшIапIэхэр къафэгъотыгъэнымкIэ Федеральнэ къулыкъум ипащэ игуадзэу Иван Шкловец зэхэсыгъом къызэрэщиIуагъэмкIэ, хэгъэгум Рострудым ыпашъхьэ къыригъэуцугъэ пшъэрылъхэр адрэ шъолъыр пстэуми алъэIэсы.

- Статистикэ пчъагъэхэмрэ Iофхэм язытет шъыпкъэрэ зэдиштэхэмэ тыуплъэкIущт. Сыда пIомэ, предприятие инхэмрэ гурытхэмрэ арых ныIэп ауплъэкIугъагъэхэр. Предприятие цIыкIухэм Iофхэр зэращыщытыр джы тыуплъэкIунэу итхъухьагъ, - къыIуагъ Иван Шкловец.

Статистикэ къулыкъум къызэритыгъэмкIэ, республикэм ипредприятие инхэмрэ гурытхэмрэ лэжьапIэмкIэ мы аужырэ илъэсхэм чIыфэ ателъыгъэп.

2013-рэ илъэсыр ары ащ фэдэ Iофыгъор къызыуцугъэр. Организацие 15-мэ сомэ миллион 19,8-рэ хъурэ лэжьапкIэр IофышIэ 1010-мэ зэратын фэегъэ пIалъэр агъэгужъуагъэу къхагъэщыгъ. Адыгеим IофшIэнымкIэ и Къэралыгъо инспекцие мы предприятиехэм япащэхэм тхылъхэр афигъэхьыгъэх. Ащ епхыгъэу сомэ миллион 17,8-рэ хъурэ лэжьапкIэр нэужым IофышIэ 991-мэ къаратыжьыгъ.

Адыгеим IофшIэнымкIэ и Къэралыгъо инспекцие ипащэу Сихъу Русет зэIукIэм хэлэжьагъэхэм къазэрафиIотагъэмкIэ, непэ ехъулIэу республикэм иорганизациищмэ лэжьапкIэмкIэ чIыфэхэр ателъых. Ахэр ЗАО-у «Ривагро», ЗАО-у «Энергостройсвязь», ООО-у «Адыгэлектромонтаж» зыфиIохэрэр ары.

Мы организациехэм зэхэубытагъэу чIыфэу ателъыр сомэ миллиони 2,7-рэ мэхъу. ЗэIукIэгъум икIэух Адыгеим и ЛIышъхьэу ТхьакIущынэ Аслъан зэрэхигъэунэфыкIыгъэмкIэ, республикэм иIэшъхьэтетхэм IофшIэным епхыгъэ зэфыщытыкIэхэм яIофыгъохэм ренэу анаIэ атырагъэты, IофшIэнымкIэ къэралыгъо инспекциемрэ нэмыкI структурэхэмрэ ащкIэ гъусэныгъэ пытэ адыряI.

АР-м и ЛIышъхьэ и пресс-къулыкъу.

Смотрите также:

Оставить комментарий (0)

Также вам может быть интересно

Загрузка...

Топ 5 читаемых

Самое интересное в регионах