Майкоп, 6 ноября - АиФ-Адыгея. Республикэм зыкIыныгъэм и мафэ игъэкIотыгъэу хигъэунэфыкIыгъ.
Мыекъуапэ игупчэу «Зэкъошныгъэм» ит саугъэтэу «ЕгъашIэм Урысыем тыригъус» зыфиIорэм мэфэкI пчэдыжьым къекIолIагъэх АР-м и ЛIышъхьэу ТхьакIущынэ Аслъан, АР-м и Къэралыгъо Совет - Хасэм и Тхьаматэ игуадзэу Iэщэ Мухьамэд, республикэм и премьер-министрэу КъумпIыл Мурат, депутатхэр, министрэхэм я Кабинет хэтхэр, федеральнэ ыкIи республикэ къулыкъухэм япащэхэр, ветеран ыкIи ныбжьыкIэ организациехэм ялIыкIохэр, нэмыкIхэри. ТхьакIущынэ Аслъан апэ итэу къызэрэугъоигъэхэр саугъэтым екIолIагъэх, ащ къэгъагъэхэр кIэралъхьагъэх.
ЗыкIыныгъэм и Мафэ фэшI АР-м и ЛIышъхьэ къыфэгушIуагъ, УФ-м и президентэу Владимир Путиныр. Лъэпкъхэм языкIыныгъэ и Мафэ фэшI сыпфэгушIо! Мы мэфэкIым ылъапсэ чыжьэу къыщежьэ, лъэпкъ шIэжьым инэкIубгъо хэушъхьафыкIыгъэхэр ащ къыхэщых.
Илъэс 400-кIэ узэкIэIэбэжьмэ тицIыфхэм къэралыгъом ишъхьафитыныгъэ къаухъумагъ ыкIи ащ ылъапсэ агъэпытагъ. БлэкIыгъэ илъэсхэм, лIыхъужъ нэкIубгъохэм тызфагъасэрэр зыкIыныгъэм икъэухъумэн, уишэн-хабзэхэр къэбгъэгъунэн ыкIи гухэлъэу пшIырэр къыбдэхъуным удэлэжьэн зэрэфаер ары.
СыпфэлъаIо гухэлъэу пшIыгъэхэр пхырыпщынхэу, шIоу щыIэр зэкIэ къыбдэхъунэу,- къыщеIо телеграммэм.