Сакъынхэу къафигъэпытагъ
2010-рэ илъэсым игъэмэфэ мазэхэм Урысыем исубъект зэфэшъхьафхэм къащыхъугъэ машIом къыхэкIыкIэ къэралыгъом сомэ миллиард 11 фэдиз чIэнагъэу ышIыгъ. Илъэсым къыкIоцI гурытымкIэ тхьамыкIагъо къэзыхьырэ хъугъэ-шIагъэхэм япчъагъэ проценти 6-8-м нэсэу зыкъыIэтыгъ.
Регионхэм япащэхэм зэфэхьысыжьэу къашIыгъэхэм къызэрагъэнэфагъэмкIэ, блэкIыгъэ илъэсым хэукъоныгъэу ашIыгъэхэм ядэгъэзыжьын яшъыпкъэу ахэм Iоф дашIагъ. Ом къыздихьырэ гумэкIыгъохэр пэшIорэгъэшъэу гъэнэфэгъэнхэмкIэ (прогноз шIыгъэнымкIэ) анахьэу пшъэдэкIыжь ин зыхьырэр Росгидрометрэр ары. Ащ епхыгъэу гидрометеорологием ылъэныкъокIэ УФ-м и Правительствэ программэ гъэнэфагъэ ыштагъ.
Владимир Путиным зэрилъытэрэмкIэ, ыпшъэкIэ зигугъу къэтшIыгъэ къулыкъум иIофшIэн нахь тэрэзэу зэхищэнымкIэ ащ ишIогъэшхо къэкIощт. Ом изытет зыфэдэщтыр, ошIэ-дэмышIагъэ зыхэлъ тхьамыкIагъохэу тапэкIэ къэхъущтхэр къэзышIэрэ системэхэр къэралыгъом щыгъэпсыгъэнхэ зэрэфаер премьер-министрэм къыIуагъ. Ащ пае илъэситIум къыкIоцI бюджетым сомэ миллиард 14 фэдиз къытIупщыщт, метеостанцие 300 кIэу ашIыщт.
Фэхьазырых
Радиацием ылъэныкъокIэ КъокIыпIэ Чыжьэм иIофхэм язытет, ащ епхыгъэ мониторингэу зэхащэхэрэм къатегущыIагъэх федеральнэ къулыкъухэм ыкIи ведомствэхэм япащэхэр. КъэкIорэ гъэмафэр фэбэ дэдэу хъун зэрилъэкIыщтыр къыдалъытэзэ, МЧС-м икъулыкъушIэхэм а лъэхъаным зызэрэфагъэхьазырырэр къыхагъэщыгъ.
УФ-м ошIэ-дэмышIэ IофхэмкIэ и Министерствэ ипащэу Сергей Шойгу къызэриIуагъэмкIэ, прогнозэу щыIэхэмкIэ, мэлылъфэгъу мазэм ыкIэхэм адэжь псыкъиуным ныхь зиушъомбгъун ылъэкIыщт, бэдзэогъум ыкIэхэм, шышъхьэIум икъихьэгъухэм адэжь машIом нахь зыкъиIэтын ылъэкIыщт. Ащ регионхэм ащыщхэр зэрэфэхьазырым уигъэрэзэнэу зэрэщымытыри къыгъэнэфагъ.
Селектор зэIукIэм Владимир Путиным зэфэхьысыжьхэр къыфишIызэ, зигугъу къэтшIыгъэ ошIэ-дэмышIэ Iофыгъохэм апэуцужьыгъэным пае регионхэм япащэхэм, ащ фэгъэзэгъэ структурэхэм ыкIи ведомствэхэм шIокI имыIэу япшъэрылъхэр агъэцэкIэнхэу къафигъэпытагъ.
Къатефэрэр агъэцакIэ
Адыгеим мыщ фэдэ тхьамыкIагъохэр къыщымыхъунхэм пае илъэс къэс Iофтхьэбзэ гъэнэфагъэхэр щызэхащэх, программэ гъэнэфагъэхэри щаштагъэх.
Ахэр гъэцэкIагъэ зэрэхъурэм ежь ышъхьэкIэ АР-м и Президентэу ТхьакIущынэ Аслъан лъэплъэ. БлэкIыгъэ илъэс закъом псыуцогъэшхохэм апэшIуекIогъэным епхыгъэ программэм къыдилъытэу, республикэм сомэ миллион 83,4-рэ щагъэфедагъ.
Ащ ишIуагъэкIэ псыхъохэу Лабэрэ Фарсрэ янэпкъыхэр зэтырагъэпсыхьагъэх, Шапсыгъэ псыубытыпIэм гъэцэкIэжьынхэр щылъагъэкIотагъэх, нэмыкI Iофыгъохэри зэшIуахыгъэх.
Псыкъиуным пэуцужьыгъэнымкIэ Адыгеим иIофхэм язытет джырэ лъэхъаным уигъэрэзэнэу щыт нахь мышIэми, зи умышIэу ущысыныр зэрэмытэрэзыр ТхьакIущынэ Аслъан къыхигъэщыгъ. Ащ фэшI УФ-м и МЧС и ГъэIорышIапIэу АР-м щыIэм ипащэу Гъунэжьыкъо Муратэ пшъэрылъ гъэнэфагъэхэр фишIыгъэх.
Адыгеир хэдзынхэм афэхьазыр 
КъумпIыл Мурат: «Проектхэр гъэцэкIэгъэнхэр пшъэрылъ шъхьаI» 
Пшъэрылъ шъхьаIэхэр афигъэнэфагъэх 
Километрэ 37-рэ фэдиз зикIыхьэгъэщт дамбэхэр ашIыщтых 
Программэр анахь дэгъоу зыгъэцэкIэрэ шъолъырхэм Адыгеир ащыщ