КIымафэ чIыIэм чIэнагъэу афишIыгъэхэр ауплъэкIунэу мэкъу- мэщ хозяйствэм икомиссиехэр губгъом ихьагъэх.
Специалистхэм къызэраIуагъэмкIэ, губгъохэм лэжьыгъэу ахэкIодыкIыгъэр процентитфым ехъу ныIэп. КIымафэм зызэрэкъудыигъэм къыхэкIэу бжыхьасэхэр икIэрыкIэу апхъыжьых. ЧъыIэм анахьэу зэрар зэрихыгъэхэр рапсыр ыкIи кIасэу апхъыгъэ хьэр арых.
АР-м мэкъу -мэщымкIэ иминистрэу Юрий Петровым къызэриIуагъэмкIэ, республикэм лэжьыгъэ имыIэу къэнэщтэп. Зэрэщытэу бжыхьэсэ зыщыкIодыгъэ лэжьэкIупIэхэр апхъыжьыщтых.
ХэкIодыкIыгъэхэм ачIыпIэкIэ, натрыфыр, соер, гъэтхэсэ лэжьыгъэхэр апхъыжьыщтых.
- ЧIэнагъэ код тшIыгъэми цIыфхэм гъомлапхъэхэр аIэчIэгъэхьэнымкIэ тиреспубликэ щынагъо чIыпIэ иуцощтэп,- къыIуагъ Юрий Петровым.
Илъэс къэс лэжьыгъэ тонн мин заулэ фэдиз республикэм шIокIоды. ГъэрекIо огъугъэ, блэкIыгъэ илъэсым Адыгеим ирайон заулэхэм псыр къакIэуагъ, мыгъэ кIымафэр лъэшэу чъыIагъ.
АР-м мэкъу -мэщымкIэ Министерствэм къызэритыгъэмкIэ, хъызмэтшIапIэмэ лэжъыгъэу апхъыгъэхэм япроцент тIокIыр страховать ашIыгъагъ. Страховой компаниехэм ахэм чIэнагъэу ашIыгъэр къалъытэ.
Министрствэм къызэриIуагъэмкIэ, мы илъэсым пынджыр, хэтэрыкIхэр нахьыбэу республикэм щашIэнхэу рахъухьэ.