Адыгеим и ЛIышъхьэу КъумпIыл Мурат ММА-м ичемпионэу, Урысыем и ММА и Союз ипрезидентэу Федор Емельяненкэм республикэм и Правительствэ зычIэт унэм бэмышIэу щыIукIагъ.
Спортым изегъэушъомбгъун епхыгъэ Iофыгъуабэмэ зэIукIэгъум щатегущыIагъэх. Республикэм и ЛIышъхьэ спорт псэолъакIэхэр зэрагъэпсыхэрэм, спортым хэхъоныгъэу ышIыхэрэм афэгъэхьыгъэу къафиIотагъ.
ЗэIукIэгъум джащ фэдэу хэлэжьагъэх Урысые Федерацием и Къэралыгъо Думэ идепутатэу Хьасанэкъо Мурат, Урысыем и ММА и Союз иапэрэ вице-президентэу Радмир Габдулиныр, Адыгэ Республикэм и Къэралыгъо Совет — Хасэм идепутатэу Къэлэшъэо Рустам, кикбоксингымкIэ дунаим ичемпионэу, Росмолодежи ипащэ иупчIэжьэгъоу Бату Хасиковыр, Fight Nights Global ипрезидентэу Камил Гаджиевыр ыкIи нэмыкIхэр.
«Адыгеим укъызэрэкIуагъэр лъэшэу тигуап. Тадэжь дэгъоу ущашIэ, лъытэныгъэ щыпфашIы, тицIыфхэр уитекIоныгъэхэм арэгушхох. ММА-м и Союз шъузыфэгъэзэгъэ лъэныкъом хэхъоныгъэ зыщишIыщт чIыпIэу Адыгеир ылъытэ тшIоигъу. Адыгеир сыдигъуи испортсменхэмкIэ ыкIи итренерхэмкIэ цIэрыIоу къырэкIо. ЦIыфхэм азыщанэм ехъу физкультурэмрэ спортымрэ апылъ, спорт лъэпкъ зэфэшъхьафхэмкIэ Урысыем ихэшыпыкIыгъэ командэхэм ахэтхэри тиIэх. Спортсменхэм ягъэхьазырынкIэ ыкIи зэнэкъокъу инхэм язэхэщэнкIэ джырэ шапхъэу щыIэхэм адиштэрэ спорт псэолъабэ агъэпсыгъ», — хигъэунэфыкIыгъ КъумпIыл Мурат Федор Емельяненкэм зыфигъазэзэ.
Федор Емельяненкэм фабэу къызэрэпэгъокIыгъэхэм фэшI зэрафэразэр, ММА-м и Союзрэ республикэмрэ шIуагъэ къытэу зэрэзэдэлэжьэщтхэм ицыхьэ зэрэтелъыр къыIуагъ. Джыдэдэм ишъыпкъэу тренировкэхэм зэрахэлажьэрэр, спортымкIэ итекIоныгъэхэм ахигъэхъоным зэрэфэхьазырыр ащ хигъэунэфыкIыгъ.
«Адыгеим итренерхэу, испортсменхэу Кобл Якъубэ, Владимир Невзоровыр ыкIи нэмыкIхэр сыдигъуи тищысэтехыпIагъэх. Хьасанэкъо Мурат хэшыпыкIыгъэ командэмкIэ тиныбджэгъу нахьыжъэу щытыгъ. Тэ бэшIагъэ тызызэрэшIэрэр, тазыфагу ныбджэгъуныгъэ зилъыр. Лъэхъанэ горэм сэ Мыекъуапэ сыщыбанэщтыгъ, самбэмрэ дзюдомрэкIэ мыекъопэ бэнэпIэ цIэрыIор дэгъоу сэшIэ», — хигъэунэфыкIыгъ Федор Емельяненкэм.
ЦIыф цIэрыIохэр ныбжьыкIэхэм аIугъэкIэгъэнхэм яопыткIэ адэгощэнхэм атегъэпсыхьэгъэ проектым ипхырыщынкIэ Бату Хасиковым шIошIэу иIэр зэIукIэм къыщыриIотыкIыгъ. Мы проектыр республикэм щыпхырыщыгъэнымкIэ IэпыIэгъу къаритыным зэрэфэхьазырыр КъумпIыл Мурат къыIуагъ.
Адыгеим щыщ спортсменыбэ бэнэнымкIэ зэнэкъокъухэм зэрахэлажьэхэрэр Камил Гаджиевым хигъэунэфыкIыгъ. Ащ фэдэ зэнэкъокъухэм шъолъырхэм амалышхо арагъэгъоты ежьхэм яспортсменхэм ягъэхъагъэхэмкIэ ящытхъу чыжьэу агъэIунэу, къэзытхырэр Адыгэ Республикэм и ЛIышъхьэ ипресс-къулыкъу.
Урысыем и ММА и Союз зыхэлэжьэщт Суперкубок Адыгеим щызэхэщэгъэнэу зэзэгъыгъэх. ЗэIукIэгъум ыуж хьакIэхэр Владимир Невзоровым испорткомплекс щыIагъэх. Спортсменхэр комплексым ипащэхэмрэ бэнапIэм къекIолIэрэ ныбжьыкIэхэмрэ аIукIагъэх.
Мыекъуапэ ивокзалхэр ауплъэкIугъэх 
ЯгушIуагъо адигощыгъ 
Апшъэрэ Iофыгъом иапэрэ зэхэсыгъу 
Хэдзынхэм зыфагъэхьазыры 
«Лъэпкъ проектхэр игъом гъэцэкIэгъэнхэр – къулыкъу пэпчъ ипшъэрылъ шъхьаI»