Адыгэ Республикэм и ЛIышъхьэу КъумпIыл Мурат тыгъуасэ Адыгэ Республикэм и Правительствэ зычIэт унэм ООО-у «Газпром межрегионгаз» зыфиIорэм игенеральнэ директор административнэ IофшIэнымкIэ игуадзэу Ирина Пестовам зэIукIэгъу щыдыриIагъ.
Ар Адыгеим къызыкIэкIуагъэр Адыгэ Республикэм и ЛIышъхьэ «Газпром межрегионгаз» зыфиIорэ компанием ипэщакIэ нэIуасэ фишIыным фэшI.
ООО-у «Газпром межрегионгаз Майкоп» идиректорхэм ясовет иунашъокIэ 2018-рэ илъэсым Iоныгъом и 17-м Игорь Сырчиныр компанием игенеральнэ директорэу агъэнэфагъ. Газыр аIэкIэзыгъэхьэрэ республикэ компанием пэщэныгъэ зэрэдызэрихьащтым дакIоу АО-у «Газпром газораспределение Майкоп» зыфиIорэми ар ипэщэщт. Астрахань ащэжьыгъэ Арэщыкъо Руслъан ары ыпэкIэ а компанием ипэщагъэр.
ПэщакIэм нэIуасэ фишIыхэзэ, газ отраслэмкIэ Игорь Сырчиным иIофшIэн хэшIыкIышхо зэрэфыриIэр Ирина Пестовам хигъэунэфыкIыгъ. 2010-рэ илъэсым къыщегъэжьагъэу ООО-у «Газпром межрегионгаз Киров» зыфиIорэм ащ пэщэныгъэ дызэрихьагъ.
Газ компаниехэм зэпхыныгъэ дэгъу зэрадыряIэр, республикэм ипсэупIэхэм газыр ящэлIэгъэнымкIэ планхэр гъэхъагъэ хэлъэу зэрагъэцакIэрэр, газыпкIэмкIэ чIыфэу ателъыр нахь макIэ зэрэхъугъэр, социальнэ проект заулэмэ ягъэцэкIэнкIэ язэдэлэжьэныгъэ лъагъэкIуатэ зэрашIоигъор Адыгэ Республикэм и ЛIышъхьэ хигъэунэфыкIыгъ.