Адыгеим и ЛIышъхьэу КъумпIыл Мурат тыгъуасэ Тэхъутэмыкъое районым щыIагъ, къуаджэу Бжыхьэкъоежъым дэт гурыт еджапIэр зэригъэлъэгъугъ, мы районым гурыт еджэпIакIэхэр щыгъэпсыгъэнхэмкIэ пшъэрылъхэр афишIыгъ.
Шъугу къэтэгъэкIыжьы Урысыем и Президентэу Владимир Путинымрэ Адыгэ Республикэм и ЛIышъхьэу КъумпIыл Муратрэ зызэIокIэхэм гурыт еджапIэхэм яшIын епхыгъэ Iофыгъори къызэраIэтыгъагъэр.
Республикэм и ЛIышъхьэ Урысыем и Президент къыфиIотэгъагъ кIэлэеджакIохэр сменитIоу зэрэрагъаджэхэрэм иIофыгъо тIэкIу-тIэкIузэ республикэм зэрэщызэшIуахырэм фэгъэхьыгъэу. Мы аужырэ илъэсищым гурыт еджэпIи 4 агъэпсыгъ. 2024-рэ илъэсым нэс Адыгеим джыри гурыт еджэпIи 5 щашIынэу рахъухьэ.
«Владимир Путиным кIэлэцIыкIухэм яегъэджэнкIэ амал дэгъухэр зэхащэнэу шъолъырхэм пшъэрылъ къафигъэуцугъ. Ащ игъэцэкIэнкIэ ищыкIэгъэ амалхэр федеральнэ гупчэм къытеты. Урысые Федерацием и Правительствэ яIэпыIэгъоу мы аужырэ илъэсхэм гъэсэныгъэм зегъэушъомбгъугъэнымкIэ, гурыт еджэпIакIэхэу джырэ шапхъэхэм адиштэхэрэм яшIынкIэ республикэм проектышхо заулэ щагъэцэкIагъ. Федеральнэ программэхэмрэ лъэпкъ проектхэмрэ амалэу къытатыхэрэр нахь икъоу къызфэдгъэфедэхэзэ, а IофшIэныр ыпэкIи лъыдгъэкIотэн фае», — къыхигъэщыгъ КъумпIыл Мурат.
Адыгеим и ЛIышъхьэ Адыгэ Республикэм гъэсэныгъэмрэ шIэныгъэмрэкIэ и Министерствэ пшъэрылъ фишIыгъ цIыфхэр бэу зыщыпсэурэ Тэхъутэмыкъое районым ынаIэ нахь тыригъэтынэу. Джыдэдэм районым гурыт еджэпIэ 22-рэ ит, кIэлэеджэкIо мини 3 я 2-рэ сменэу щеджэ. Илъэс къэс кIэлэеджакIохэм япчъагъэ нэбгырэ миным ехъу къыхэхъо. Джащ къыхэкIэу гъэсэныгъэ языгъэгъотырэ организациехэм ячIыпIэхэми нахь ащэкIэх.
Ащ епхыгъэу мы илъэситIу благъэм Тэхъутэмыкъое районым гурыт еджэпIи 4 щагъэпсынэу унашъо аштагъ. Адыгэ Республикэм гъэсэныгъэмрэ шIэныгъэмрэкIэ иминистрэу КIэрэщэ Анзаур къызэриIуагъэмкIэ, къэлэ гъэпсыкIэ зиIэ поселкэу Яблоновскэм нэбгырэ 2200-мэ ателъытэгъэ гурыт еджэпIитIу щашIыщт. 2022-рэ илъэсым апэрэ псэуалъэм, ятIонэрэ псэуалъэм — 2023-рэ илъэсым яшIын аублэщт. Къихьащт илъэсым нэбгырэ 1100-мэ ателъытэгъэ гурыт еджапIэр къуаджэу АдыгеякIэм, нэбгырэ 250-мэ ателъытэгъэ гурыт еджапIэр къуаджэу Бжыхьэкъоежъым щашIыхэу аублэщт, къэзытхыр Адыгэ Республикэм и ЛIышъхьэ ипресс-къулыкъу.
Адыгэ Республикэм и ЛIышъхьэрэ гъэсэныгъэмрэ шIэныгъэмрэкIэ министрэмрэ Тэхъутэмыкъое районым кIохэ зэхъум псэолъакIэхэм яшIынкIэ гухэлъэу щыIэхэм атегущыIагъэх. ЛIышъхьэм къуаджэу Бжыхьэкъоежъым дэт гурыт еджапIэу нэбгырэ 200 фэдиз къызэкIуалIэрэр къыплъыхьагъ, кIэлэеджакIохэм, кIэлэегъаджэхэм адэгущыIагъ, санитар шапхъэхэр зэрагъэцакIэрэр зэригъэшIагъ. Джащ фэдэу КъумпIыл Мурат нэбгырэ 250-мэ ателъытэгъэщт гурыт еджапIэр зыщашIыщт чIыпIэр къызэпиплъыхьагъ.