Примерное время чтения: 2 минуты
50

Адыгеим и ЛIышъхьэ зэрищагъ

Майкоп, 28 сентября - АиФ-Адыгея.

АР-м иминистрэхэм я Кабинет зичэзыу планернэ зэхэсыгъоу видеоконференцие шIыкIэм тетэу кIуагъэр зэрищагъ Адыгэ Республикэм и ЛIышъхьэу КъумпIыл Мурат. Лъэпкъ проектхэм ыкIи къэралыгъо программэхэм ягъэцэкIэн ары Iофыгъо шъхьаIэу зытегущыIагъэхэр.

Республикэм и Премьер-министрэу Геннадий Митрофановым къызэриIуагъэмкIэ, лъэпкъ проектхэм ягъэцэкIэн сомэ миллиарди 4,5-рэ пэIуагъэхьанэу агъэнафэ, ащкIэ зэзэгъыныгъэу адашIыгъэхэр процент 87-м кIахьэ. 2020-рэ илъэсымкIэ лъэпкъ проектэу «Щынэгъончъэ ыкIи шэпхъэшIухэм адиштэрэ автомобиль гъогухэр» зыфиIорэм къыдыхэлъытагъэхэр зэкIэ зэшIохыгъэхэ хъугъэ, къихьащт илъэсымкIи зэзэгъыныгъэхэм акIэтхэгъэным епхыгъэ IофшIэныр ыкIэм фэкIуагъ.

Республикэм ипащэ пшъэрылъэу къыгъэуцугъэхэм ащыщхэр АР-м гъэсэныгъэмрэ шIэныгъэмрэкIэ и Министерствэ зэнэкъокъухэм ахэлэжьэным, жъы хъугъэ унэхэм арысхэр гъэкощыгъэнхэм, Физкультурнэ ыкIи псауныгъэр зыщагъэпытэрэ комплексхэм, фельдшер-мамыку IэзапIэхэм, стоматологическэ поликлиникэхэм япсэуалъэ, перинатальнэ гупчэм, нэмыкI социальнэ объектхэм яшIын фэгъэхьыгъагъэх.

— Къэгъэлъэгъонхэм такIэмыхьаным игумэкIыгъо щымытыным фэшI ахэр гъэцэкIагъэхэ зэрэхъухэрэм епхыгъэ къэбарыр чIыпIэхэм игъом къытIэкIагъэхьан фае. А IофшIэныр зэшIохыгъэ зэрэхъурэм икоординаторэу щыт лъэпкъ проектхэм ягъэцэкIэнкIэ ГъэIорышIапIэр. Профильнэ министерствэхэмрэ муниципалитетхэмрэ япащэхэр зэгъусэхэу мы лъэныкъом Iоф дашIэным, шIуагъэ къытэу бюджет ахъщэр гъэфедэгъэным анаIэ тырагъэтыным мэхьанэшхо иI, — къыIуагъ КъумпIыл Мурат.

Джащ фэдэу Адыгеим социальнэ-экономикэ хэхъоныгъэ ышIыным иунэе программэ къыдыхэлъытэгъэ проектхэм ягъэцэкIэн зэрэлъыкIуатэрэм иIофыгъуи зэхэсыгъом хэлэжьагъэхэр тегущыIагъэх. КъызэраIуагъэмкIэ, непэрэ мафэхэм ехъулIэу гухэлъым ипроцент 20-р зэшIохыгъэ хъугъэ. Ащ нэмыкIэу республикэ бюджетыр, социальнэ пшъэрылъхэр зэрифэшъуашэу гъэцэкIэгъэнхэм Адыгеим ипащэхэм анаIэ атет.

Шъолъырым социальнэ-экономикэ хэхъоныгъэ ышIынымкIэ пандемием иягъэ къызэрэкIуагъэр АР-м и Премьер-министрэ къыIуагъ. Ау Къыблэ федеральнэ шъолъырымкIэ Адыгей закъор ары шышъхьэIу мазэм промышленнэ къыдэгъэкIыным ииндекскIэ хэхъоныгъэ зышIыгъэр. Ар проценти 106,3-рэ мэхъу. Мэкъумэщ продукциемкIи республикэм къэгъэлъэгъонышIухэр иIэх, ащ ииндекс проценти 104,7-м кIэхьагъ.

Нэужым ведомствэхэм япащэхэм ащыщхэр къэгущыIагъэх, зыфэгъэзэгъэхэ лъэныкъом елъытыгъэу Iофхэм язытет изэфэхьысыжьхэр къашIыгъэх.

ЦIыфхэм IэпыIэгъу афэхъугъэнымкIэ УФ-м и Президентэу Владимир Путиным къыгъэнэфэгъэ пшъэрылъхэр гъэцэкIагъэхэ зэрэхъурэм лъэплъэ Адыгеим и ЛIышъхьэ.

Вице-премьерэу Наталья Широковам къызэриIуагъэмкIэ, пандемием илъэхъан цIыфхэм социальнэ IэпыIэгъу ягъэгъотыгъэнымкIэ къатефэрэр зэкIэ агъэцакIэ. Илъэси 3 — 7 зыныбжь сабыйхэр зэрыс унэгъо 18 286-мэ ахъщэ тынхэр ятыгъэнхэмкIэ унэшъо гъэнэфагъэхэр ашIыгъэх. Ащ сомэ миллион 843-рэ пэIуагъэхьагъ. IофшIапIэ чIэзынагъэхэм сомэ миллион 405-рэ афатIупщыгъ.

«Федеральнэ гупчэм ишIуагъэкIэ мы охътэ мыпсынкIэм Iофхэм язытет зыпкъ идгъэуцон тлъэкIыгъ. Ар непи лъытэгъэкIуатэ. Къэралыгъор IэпыIэгъу къазэрэфэхъурэр республикэм щыпсэухэрэм зэхашIэн фае», — къыхигъэщыгъ Адыгеим и ЛIышъхьэ.

Адыгэ Республикэм и Мафэ ихэгъэунэфыкIын зызэрэфагъэхьазырырэм иIофыгъуи зэхэсыгъом къыщаIэтыгъ. Iофтхьабзэу зэхащэщтхэм яплан аштагъ, ахэр рагъэкIокIыхэ зыхъукIэ эпидемиологием ылъэныкъокIэ Iофхэм язытет къыдалъытэщт.

Оцените материал
Оставить комментарий (0)

Топ 5 читаемых

Самое интересное в регионах