Примерное время чтения: 2 минуты
61

Адыгеим илIыкIохэр хадзыгъэх

Майкоп, 2 октября - АиФ-Адыгея.

АР-м и Къэралыгъо Совет — Хасэм ияблэнэрэ зэIугъэкIэгъу идепутатхэм блэкIыгъэ тхьамафэм я II-рэ зэхэсыгъо яIагъ.

Ащ хэлэжьагъэх АР-м и ЛIышъхьэу КъумпIыл Мурат, УФ-м и Къэралыгъо Думэ Адыгеим ыцIэкIэ щыIэ Хьасанэкъо Мурат, министрэхэм я Кабинет хэтхэр, федеральнэ ыкIи республикэ къулыкъухэм, ведомствэхэм япащэхэр. Парламентым и Тхьаматэу Владимир Нарожнэм зэхэсыгъор зэрищагъ.

Анахь шъхьаIэу зытегущыIагъэхэм ащыщ УФ-м ФедерациемкIэ и Совет республикэм илIыкIоу хагъэхьащтыр. Депутатхэм Хъопсэрыкъо Мурат икандидатурэ къагъэлъэгъуагъ ыкIи шъэф шIыкIэм тетэу амакъэхэр фатыхи, джыри а пшъэрылъыр ыгъэцэкIэнэу зэдаштагъэ.

Владимир Нарожнэм Хъопсэрыкъо Мурат Адыгеим ыцIэкIэ сенаторэу ыпэкIи зыщэтым Iофышхо зэришIагъэм къыкIигъэтхъыгъ. Ар республикэм иIофхэр лъыгъэкIотэгъэнхэм чанэу ыуж итыгъ, федеральнэ гъэцэкIэкIо ыкIи хэбзэихъухьэ органхэм апэблагъэу Iоф адишIагъ, Адыгеим хэхъоныгъэхэр ышIынхэм фэIорышIэрэ проектхэм япхырыщын лъэшэу пылъыгъ.

«Сенаторым ишIушIагъэкIэ УФ-м ФедерациемкIэ и Совет и Тхьаматэу Валентина Матвиенкэр, РегламентымкIэ ыкIи парламент IофшIэным изэхэщэнкIэ Комитетым хэтхэр Адыгеим къэкIогъагъэх, лъэныкъо зэфэшъхьафхэм зыщатегущыIэгъэхэ зэхэсыгъохэр нэмыкI сенаторхэм тишъолъыр щызэхащагъэх. Ар кIэщакIо фэхъугъэу «Дни регионов в Совете Федерации» зыфиIорэ Iофтхьабзэм Адыгеир зэрэхэлэжьагъэм мэхьэнэшхо иI», — къыIуагъ Владимир Нарожнэм. — Зэпахырэ узэу дунаир зэлъызыкIугъэр къызежьэм республикэм мылъкукIэ къызэрэдеIагъэри къыхэзгъэщымэ сшIоигъу. Чэщи мафи зэпхыныгъэ къыддыриIагъ, зэшIуихыгъэри бэ.

ЦIыфэу зыкъыфэзгъазэхэрэм ягумэкIыгъохэм ядэгъэзыжьын сенаторым лъэшэу ынаIэ зэрэтетыми, сабыибэ зэрыс унагъохэм, сэкъатныгъэ зиIэхэм, зигъот макIэхэм, медицинэ IэпыIэгъу зищыкIагъэхэм мымакIэу ишIуагъэ зэраригъэкIырэри къыхигъэщыгъ.

Ежь Хъопсэрыкъо Мурат гущыIэр зештэм, цыхьэ фашIи зэдаштэу амакъэхэр зэрэфатыгъэхэм пае зэрафэразэм къыкIигъэтхъыгъ, джыри ащ тетэу иIофшIэн лъигъэкIотэнэу, республикэм пшъэрылъэу ыкIи гухэлъэу иIэхэр зэкIэ пхырыщыгъэнхэм амалэу иIэм тетэу Iоф дишIэнэу къыгъэгугъагъэх.

Нэужым повесткэм щыгъэнэфагъэу, Парламентым идепутатэу Елена Любченкэм ипшъэрылъхэр къызэригъэтIылъыжьыхэрэм тегущыIэхи дырагъэштагъ.

Джащ фэдэу Джанхъот Саидэ Тэхъутэмыкъое районым ихьыкум участкэу N-у 1-м, Нэшъулъэщэ Асхьад Мыекъуапэ ихьыкум участкэу N-у 1-м язэгъэшIужь хьыкумышIхэу гъэнэфэгъэнхэм тегущыIагъэх, дырагъэштагъ.

УФ-м и Къыблэ шъолъыр ипарламентхэм я Ассоциацие Адыгеим ыцIэкIэ хэлэжьэщт лIыкIо купым хэтыщтхэри мы зэхэсыгъом щагъэнэфагъэх. Парламентым и Тхьаматэу Владимир Нарожнэр, ащ игуадзэу ыкIи мэкъумэщ политикэмкIэ, мылъку ыкIи чIыгу зэфыщытыкIэхэмкIэ икомитет ипащэу Шъэо Аскэр, хэбзэгъэуцунымкIэ, законностымкIэ ыкIи чIыпIэ зыгъэIорышIэжьыпIэхэм яIофхэмкIэ комитетым итхьаматэу Александр Лобода, гъэсэныгъэмкIэ, наукэмкIэ, ныбжьыкIэ IофхэмкIэ, спортымкIэ, СМИ-мкIэ ыкIи общественнэ организациехэм адыряIэ зэпхыныгъэхэмкIэ комитетым ипащэу Шэуджэн Тембот, хэбзэгъэуцунымкIэ, законностымкIэ ыкIи чIыпIэ зыгъэIорышIэжьыпIэхэм яIофхэмкIэ комитетым ипащэ игуадзэу Цэй Эдуард, бюджет, финанс, хэбзэIахь ыкIи экономикэ политикэмкIэ, предпринимательствэмкIэ ыкIи IэкIыб экономикэ зэфыщытыкIэхэмкIэ комитетым ипащэ игуадзэу Шэуджэн Сэфэр ащ хэгъэхьэгъэнхэу депутатхэм зэдаштагъ.

Джащ фэдэу Урысыем инэмыкI субъектхэм яхэбзэихъухьэ органхэр кIэщакIо зыфэхъугъэхэм, яджэпсалъэхэм атегущыIагъэх, игъоу алъытагъэх. Ахэр мэкъумэщ хъызмэтым иIофхэм, ащ епхыгъэ чIыгухэм лэжьыгъэшIу къатыным пае шIэгъэн фаехэм, псауныгъэм икъэухъумэн, предпринимательствэм, социальнэ лъэныкъом, анахьэу унэгъо ныбжьыкIэхэм IэпыIэгъу ятыгъэным, страхованиемкIэ пенсиехэм афэгъэхьыгъэх.

Оцените материал
Оставить комментарий (0)

Топ 5 читаемых

Самое интересное в регионах