Лъэпкъ проектэу «ЗекIонымрэ хьакIэхэм яегъэблэгъэнрэ» зыфиIорэм къыдыхэлъытэгъэ проектхэр 2022-рэ илъэсым гъэцэкIэгъэнхэм тегъэпсыхьэгъэ грантхэр Урысые Федерацием и Правительствэ шъолъырхэм афигощыгъэх. Урысые Федерацием и Правительствэ и Тхьаматэу Михаил Мишустиныр ащ фэгъэхьыгъэ унашъом кIэтхэжьыгъ.
Урысые Федерацием и Правительствэ ипресс-къулыкъу къызэритыгъэмкIэ, сомэ миллиарди 3,5-м ехъур кемпингхэм, автокемпингхэм ягъэпсын, зыгъэпскIыпIэхэм язэтегъэпсыхьан, сэкъатыныгъэ зиIэхэр зекIоным пыщэгъэнхэм апэIуагъэхьащт.
Адыгеим сомэ миллиони 188,2-м ехъу къыIукIэщт. Ащ щыщэу сомэ миллион 71,3-р инфраструктурэм изегъэушъомбгъун, сомэ миллион 43,1-м ехъур модульнэ кемпингхэмрэ автокемпингхэмрэ ягъэпсын, сомэ миллион 73,8-р зекIоным иинфраструктурэ зезыгъэушъомбгъухэрэм хъарджхэмкIэ пшъэрылъэу яIэхэм ягъэцэкIэн апэIухьащт.
Адыгеим и ЛIышъхьэу КъумпIыл Мурат зэрэхигъэунэфыкIыгъэмкIэ, лъэпкъ проектэу «ЗекIонымрэ хьакIэхэм яегъэблэгъэнрэ» зыфиIорэм республикэр чанэу зэрэхэлажьэрэмрэ федеральнэ гупчэм иIэпыIэгъурэ яшIуагъэкIэ мы лъэныкъом хэхъоныгъэшхо рагъэшIын алъэкIыщт. Туротраслэм ипредприятиехэм грант IэпыIэгъоу къаратыщтымкIэ зыгъэпсэфыпIэ чIыпIакIэхэр, кемпингхэр, зыгъэпскIыпIэхэр ашIын, джырэ уахътэм диштэу бассейнхэр зэтырагъэпсыхьан алъэкIыщт. Илъэсэу итыр имыкIызэ грантхэр къызфагъэфедэн фае.
«ЗекIоным ылъэныкъокIэ тиреспубликэ амалышхохэр иIэх. Инфраструктурэм изегъэушъомбгъункIэ типредприятиехэм тадеIэщт, ахъщэ IэпыIэгъу ахэм ягъэгъотыгъэным тегъэпсыхьэгъэ амалхэр зетхьащтых. ЦIыфхэм ящыIэкIэ-псэукIэ ащ нахь зыкъыригъэIэтыщт, зекIоным епхыгъэ фэIо-фашIэхэр нахьышIоу гъэцэкIагъэ хъущтых, уасэхэмкIи цIыфхэр нахь агъэрэзэнхэ алъэкIыщт», — къыIуагъ Адыгеим и ЛIышъхьэ.
