Адыгэ Республикэм и ЛIышъхьэу КъумпIыл Мурат Мыекъуапэ дэт гимназиеу N 22-м щыIагъ ыкIи Урысые Федерацием и Президентэу Владимир Путиным пшъэрылъ къызэрафишIыгъэм тетэу еджапIэхэм ягъэцэкIэжьынкIэ программэм изэшIохын зэрэкIорэм зыщигъэгъозагъ. Мы Iофтхьабзэм хэлэжьагъэх Адыгэ Республикэм и Премьер-министрэ ипшъэрылъхэр зыгъэцэкIэрэ КIэрэщэ Анзаур, Мыекъуапэ имэрэу Геннадий Митрофановыр, Адыгеим физическэ культурэмкIэ ыкIи спортымкIэ и Комитет итхьаматэу Дэгужъые Мурат.
КъумпIыл Мурат гимназием игъэцэкIэжьынкIэ IофшIэнхэр зэрэкIохэрэм нэIуасэ зыфишIыгъ, псэолъапхъэхэр къызэраIэкIахьэхэрэм зыщигъэгъозагъ, IофшIэнхэр дэгъоу ыкIи илъэс еджэгъум иублэгъум ехъулIэу ухыгъэ хъунхэм мэхьанэ зэриIэм псэолъэшIхэм анаIэ тыраригъэдзагъ. Пшъэрылъхэм язэшIохын пае сомэ миллиони 141-рэ къаIэкIагъэхьагъ, еджапIэм чIэтыщт мебелым тегъэпсыхьагъэу сомэ миллиони 6,6-рэ къафатIупщыгъ.
Фирмэ-подрядчикэу унэе предпринимателэу А. А. Хьакъунэр зипащэм иIэшъхьэтетхэм къызэраIуагъэмкIэ, IофшIэнхэр зэкIэ дэгъоу ыкIи ипIалъэм гъэцэкIагъэ хъущтых. Непэ ехъулIэу IофшIэнхэм япроцент 30 фэдизыр агъэцэкIэгъах. Унэ кIоцIым гъэпсыкIэу иIэр, инженер коммуникациехэр зэблахъугъэх. Джащ фэдэу шхьаныгъупчъэхэр, пчъэхэр, джэхашъохэр зэблахъущтых, унашъхьэр, спортивнэ залыр агъэкIэжьыщтых, нэмыкI Iофтхьабзэхэри зэшIуахыщтых.
Адыгэ Республикэм и ЛIышъхьэ унэ гупэм игъэкIэжьынкIэ пшъэрылъ хэушъхьафыкIыгъэхэр къафишIыгъэх. ЕджапIэм къыпэIулъ чIыпIэр, спортивнэ площадкэр ыкIи нэмыкIхэр нахь зэтырагъэпсыхьащтых.
«Тэ пшъэрылъэу тиIэр зэкIэ лъэныкъохэр къыдэтлъытэнхэр ыкIи Iофыгъоу зэшIотхын фаехэр ипIалъэм ехъулIэу гъэцэкIагъэ хъунхэр ары. Унэм игъэцэкIэжьын имызакъоу, оборудованиемкIэ икъоу ар зэтегъэпсыхьэгъэныр мэхьанэшхо зиIэ Iофхэм ахэхьэ. Ащ нэмыкIэу еджапIэм къыпэIулъ чIыпIэм чъыгхэр, къэгъэгъэ зэфэшъхьафхэр щыгъэтIысыгъэнхэ, егъэджэн Iофыр нахьышIоу зэхэщэгъэным пае амал пстэури гимназием егъэгъотыгъэнхэ фае. Iоныгъом и 1-м ехъулIэу IофшIэнхэр зэкIэ ухыгъэ хъунхэ зэрэфаер зыщытэшъумыгъэгъупш», — къыIуагъ КъумпIыл Мурат.
Гимназиеу N 22-м ипащэу Ирина Андреевам гъэсэныгъэ зыщарагъэгъотырэ организациеу мыгъэ илъэс 52-рэ хъугъэм мылъкукIэ ыкIи техникэкIэ иIофхэр нахь гъэтэрэзыгъэнхэм телъытэгъэ Iофтхьабзэхэу республикэм ипащэхэм зэрахьэхэрэм апае инэу зэрафэразэр къыIуагъ. Ащ фэдиз илъэсым еджапIэм мыщ фэдэ игъэкIотыгъэ гъэцэкIэжьын рашIылIэу къыхэкIыгъэп.
Республикэм и ЛIышъхьэ агу къыгъэкIыжьыгъ партиеу «Единэ Россием» игукъэкIыкIэ, джащ фэдэу УФ-м и Президентэу Владимир Путиным ар игъоу зэрилъэгъугъэм тетэу еджапIэхэм яигъэкIотыгъэ гъэцэкIэжьын республикэм зэрэщызэхащагъэр. Къэралыгъом ипащэ пшъэрылъ зэрэфишIыгъэм тетэу Урысыем и Правительствэ федеральнэ программэ гъэнэфагъэ зэхигъэуцуагъ. Адыгеим зэкIэ шъолъырхэм апэу ащ зэрэхэлэжьэщтымкIэ заявкэр аIэкIигъэхьагъ. 2022-рэ илъэсым телъытэгъэ федеральнэ сомэ миллион
655-у къыхагъэкIыгъэмкIэ мы илъэсым республикэм иеджэпIи 9 агъэцэкIэжьын алъэкIыщт. Ахэм ащыщэу еджэпIи 8-р Адыгэ Республикэм икъэралыгъо программэу «Гъэсэныгъэм хэхъоныгъэ егъэшIыгъэныр» зыфиIорэм тетэу агъэцэкIэжьыщтых.
Ахэм ащыщэу еджэпIи 5-р муниципальнэ образованиеу «Къалэу Мыекъуапэ» хэхьэх, еджэпIи 3-р — Мыекъопэ, Шэуджэн ыкIи Красногвардейскэ районхэм яех. Ащ нэмыкIэу Шэуджэн районымкIэ къуаджэу Хьакурынэхьаблэ дэт гурыт еджапIэу N 1-м игъэцэкIэжьын рагъэжьагъ, программэу «Къуаджэхэм хэхъоныгъэ ягъэшIыгъэныр» зыфиIорэм къыдыхэлъытагъэу ар щыт.
Ащ фэдэ IофшIэнхэр тапэкIи лъагъэкIотэщтых: гъэсэныгъэм ипсэуалъэхэм яспискэ зэхагъэуцо, илъэсэу къихьащтым ахэр агъэцэкIэжьыщтых.
ЗэрэрахъухьагъэмкIэ, 2023-рэ илъэсым агъэцэкIэжьыщтхэм джыри еджэпIи 6 ахэхьащт, ахэм ащыщэу 4-р — Мыекъуапэ, 2-р — Шэуджэн районым.
Адыгеим и ЛIышъхьэ къызэрэхигъэщыгъэмкIэ, республикэм къыхиубытэрэ псэупIэхэр зэкIэ цIыфхэмкIэ гуIэтыпIэхэу щытынхэм тыдэлэжьэн фае. Арышъ, еджапIэхэм, псауныгъэм икъэухъумэн, культурэм ыкIи спортым яучреждениехэр нахь зэтегъэпсыхьэгъэнхэм тыдэлажьэ, гъогухэр тэгъэцэкIэжьых, щагухэр, паркхэр нахь зэтетэгъэпсыхьэх. А пстэуми республикэм ипсэупIэхэм теплъэу яIэр зэблахъу.
