23

Гъэсэныгъэм ипсэуалъэхэр къыплъыхьагъэх

Майкоп, 18 марта - АиФ-Адыгея.

УФ-м и Къэралыгъо Думэ идепутатэу, партиеу «Единэ Россием» хэт Владислав Резник Мыекъуапэ иурамэу Кобл Якъубэ ыцIэ зыхьырэм тет кIэлэцIыкIу IыгъыпIэм тыгъуасэ щыIагъ.

Лъэпкъ проектэу «Демографием» къыдыхэлъытагъэу мы учреждением ишIын 2019-рэ илъэсым рагъэжьагъ. ЗэкIэмкIи ащ сомэ миллиони 170-рэ фэдиз пэIуагъэхьагъ, ащ хэхьэ оборудованиеу къащэфыгъэри. Владислав Резник иIэпыIэгъукIэ мылъкур федеральнэ ыкIи шъолъыр бюджетхэм къахахыгъ.

КIэлэцIыкIу IыгъыпIэр нэбгырэ 240-мэ ателъытагъ, непэрэ мафэм ехъулIэу сабый 80 къекIуалIэ. ЗэкIэмкIи куп 12 къызэIуахынэу щыт, ащ щыщэу 6-р анахь цIыкIухэм ателъытэгъэщт. Гъэсэныгъэм иучреждение къызэрэзэIуахыгъэм ишIуагъэкIэ чэзыум хэтхэр хэпшIыкIэу нахь макIэ хъугъэх.

Владислав Резник джэгупIэхэр, сабыйхэр зыщычъыехэрэр, шхапIэр къыплъыхьагъэх. Учреждениер зэрэзэтырагъэпсыхьагъэм осэшIу фишIыгъ ыкIи кIэлэцIыкIухэм япсауныгъэ къэухъумэгъэным фэшI санитарнэ шапхъэхэр агъэцэкIэнхэм, джащ фэдэу Iоф щызышIэхэрэм вакцинациер акIуным мэхьанэшхо зэриIэр хигъэунэфыкIыгъ.

Мы мэфэ дэдэм Мыекъуапэ щагъэпсырэ кIэлэеджэкIо 1100-мэ ателъытэгъэ гурыт еджапIэм УФ-м и Къэралыгъо Думэ идепутат щыIагъ. Ащ ишIын рагъэжьэнымкIэ Владислав Резник ишIогъэшхо къыгъэкIуагъ. Непэрэ мафэм ехъулIэу учреждением ишIын ыкIэм фэкIуагъ, илъэсыкIэ еджэгъум ехъулIэу къызэIуахынэу агъэнафэ. Проектым игъэцэкIэн зэкIэмкIи сомэ миллион 719-м ехъу пэIуагъэхьагъ. Лъэпкъ проектэу «Гъэсэныгъ» зыфиIорэм хэхьэрэ шъолъыр проектэу «Современная школа» зыфиIорэм къыдыхэлъытагъэу ар ашIы.

Республикэм икъэлэ шъхьаIэ дэт лицееу N 35-м 2018-рэ илъэсым къыпашIыхьэжьыгъэ псэуалъэри Владислав Резник зэригъэлъэгъугъ. Ащ сомэ миллион 77,8-рэ тефагъ.

«Урысыем и Президентэу Владимир Путиным гъэсэныгъэм ылъэныкъокIэ пшъэрылъышхохэр къегъэуцух, ащ хэхьэ еджапIэхэр зы сменэм техьажьынхэр, кIэлэцIыкIу IыгъыпIэхэм алъэныкъокIэ чэзыухэр дэгъэзыжьыгъэнхэр. Мы Iофыгъохэм язэшIохын Адыгеим мэхьанэшхо щыраты. Лъэпкъ проектхэм къадыхэлъытагъэу республикэм ыгъэцэкIагъэр зэкIэ непэ нэрылъэгъу: мы аужырэ илъэситIум еджэпIакIэхэр, кIэлэцIыкIу IыгъыпIэхэр тшIыгъэх. Ахэр зэрифэшъуашэу зэтедгъэпсыхьагъэх», — къыхигъэщыгъ Владислав Резник.

Гъэсэныгъэм иучреждениехэр къызщиплъыхьэгъэ уахътэм депутатыр гущыIэгъу афэхъугъ АР-м гъэсэныгъэмрэ шIэныгъэмрэкIэ иминистрэ иапэрэ гуадзэу Евгений Лебедевым, Мыекъопэ къэлэ администрацием гъэсэныгъэмкIэ и Комитет ипащэу Ольга Романенкэм. IофшIэныр нахьышIоу зэхэщэгъэным, тапэкIэ анахьэу анаIэ зытырагъэтын фаехэм ахэр атегущыIагъэх.

Гъэсэныгъэм исистемэ хэхъоныгъэ ышIыным мэхьанэшхо зэриIэр Адыгеим и ЛIышъхьэу КъумпIыл Мурат пчъагъэрэ къыхигъэщыгъ. Шъолъырым ипащэ зэрилъытэрэмкIэ, ащкIэ республикэм игъэцэкIэкIо ыкIи хэбзэгъэуцу къулыкъухэм, УФ-м и Къэралыгъо Думэ идепутатхэм ыкIи сенаторхэм профильнэ федеральнэ структурэхэм зэрифэшъуашэу Iоф адашIэ.

Оставить комментарий (0)
Загрузка...

Топ 5 читаемых