Адыгеим и ЛIышъхьэу КъумпIыл Мурат зэрищэгъэ зэIукIэм зыщытегущыIагъэхэр зиIоф аIуагъэхэр гъогу тэрэз техьажьынхэмкIэ IэпыIэгъу къафэхъущт гупчэхэр республикэм щызэхэщэгъэнхэм епхыгъэ Iофыгъохэр ары.
Мы Iофтхьабзэм хэлэжьагъэх Адыгэ Республикэм и Премьер-министрэ ипшъэрылъхэр зыгъэцакIэу КIэрэщэ Анзаур, Адыгэ Республикэм и ЛIышъхьэрэ Адыгэ Республикэм иминистрэхэм я Кабинетрэ я Администрацие ипащэу Владимир Свеженец, Урысыем и ФСИН Адыгэ РеспубликэмкIэ и ГъэIорышIапIэ ипащэу Виталий Перхорович, Мыекъуапэ имэрэу Геннадий Митрофановыр.
Гупчэхэм Iоф зэрашIэрэ шIыкIэм ыкIи республикэм икъалэхэмрэ ирайонхэмрэ ахэр ащызэхэщэгъэнхэмкIэ амалэу щыIэхэм яхьылIагъэу къыIотагъ Урысыем и ФСИН Адыгэ РеспубликэмкIэ и ГъэIорышIапIэ ипащэ. Виталий Перхорович къызэрэхигъэщыгъэмкIэ, режимэу щыIэр агъэцакIэзэ ащ фэдэ гупчэхэм ачIэсыщт цIыфхэу егъэзыгъэ хэлъэу Iоф зэрагъэшIэщтхэм Адыгеим ипредприятиехэм, мэкъумэщ хъызмэтшIапIэхэм, псэолъэшIыным ыкIи нэмыкI отраслэхэм Iоф ащашIэн алъэкIыщт сэнэхьатэу яIэмрэ якъулайныгъэрэ ялъытыгъэу.
«ЗиIоф аIуагъэхэр щыIэныгъэм амал зэриIэкIэ нахь псынкIэу хэгъозэжьынхэмкIэ къэралыгъом ащ фэдэ Iофтхьабзэхэр зэрехьэх. БзэджэшIэгъэ мыхьылъэ зезыхьагъэхэр колонием чIэмысхэу, гупчэм щыIэщтых, ягупсэхэми аIукIэнхэ алъэкIыщт», — къыIуагъ Урысыем и ФСИН и ГъэIорышIапIэу Адыгэ Республикэм щыIэм ипащэ.
Адыгеим и ЛIышъхьэ къыхигъэщыгъ ащ фэдэ учреждениехэр къызэIухыгъэнхэм республикэм ифедэ зэрэхэлъыр. Предприятиехэми рабочэ ыкIи нэмыкI сэнэхьат зиIэхэр ащагъэфедэнхэм иамал ащ къытыщт. ГущыIэм пае, мэкъу-мэщым илъэс къэс губгъо IофшIэнхэм ягъэцэкIэнкIэ цIыфхэр бэу ищыкIагъэу мэхъу, джащ фэд псэолъэшIынымкIи, гъогухэм яшIынкIи Iофхэм язытет.
«Республикэм иэкономикэ псынкIэу хэхъоныгъэ ешIы. Къэралыгъо IэпыIэгъум къыдилъытэрэ Iофтхьабзэхэм яшIуагъэкIэ предприятиякIэхэр къызэIуахых, IофшIэпIэ чIыпIакIэхэр щыIэ мэхъух. Адыгеим зэрэщагъэунэфыгъэмкIэ, IофшIэнмыгъотыныгъэр зы процентым нахьи нахь макI, IофшIэпIэ чIыпIэхэр бэ мэхъух. Арышъ, сицыхьэ телъ зиIоф аIуагъэхэр IофшIэн зэфэшъхьафхэм ащагъэфедэнхэм ишIуагъэ къызэрэкIощтым. ЦIыфэу дэхыгъэхэм дэгъоу Iоф ашIэу, тазырэу ателъхэр атыжьхэмэ, обществэм хэтхэу хэбзэ-унашъохэр зыгъэцакIэхэрэм ахэкIокIэжьынхэ алъэкIыщт», — къыхигъэщыгъ КъумпIыл Мурат.
Урысыем и ФСИН и ГъэIорышIапIэу Адыгэ Республикэм щыIэм ипащэ къызэриIуагъэмкIэ, 2017-рэ илъэсым къыщыублагъэу ащ фэдэ гупчэу N 1-м Мыекъуапэ Iоф щешIэ, нэбгырэ 200-м ар тегъэпсыхьагъ.
Сотовэ телефонхэр, гаджетхэр, джащ фэдэу унэе транспорт зиIэхэм агъэфедэнхэмкIэ а гупчэм чIэсхэм пэрыохъу яIэп. Ахэм къалэм ипредприятиехэм, унэе кампаниехэм, автосервисхэм, дапIэхэм Iоф ащашIэ.
ЗиIоф аIуагъэхэм ащыщхэм ыпэкIэ Iоф зыщашIэщтыгъэ организациехэм яIофшIэн щалъагъэкIотэн алъэкIы. Къахэщэу, дэгъоу Iоф зышIэхэрэм бэджэндэу аштэгъэ е яунэе унэ щыпсэунхэм ифитыныгъэ араты.
