Урысыем иполитическэ партиеу «Единэ Россием» и Адыгэ шъолъыр къутамэ ия XXVII-рэ конференцие профсоюзхэм я Унэ щыкIуагъ.
Ащ иIофшIэн хэлэжьагъэх партием и Апшъэрэ Совет хэтэу, Адыгэ Республикэм и ЛIышъхьэу ТхьакIущынэ Аслъан, партием ифракциеу АР-м и Къэралыгъо Совет - Хасэм щыIэм ипащэу Владимир Нарожнэр, партием ирегиональнэ отделение и Секретарь иапэрэ гуадзэу, республикэм и Премьер-министрэу КъумпIыл Мурат, чIыпIэ къутамэхэм ясекретарьхэр, Адыгеим иныбжьыкIэхэр, нэмыкIхэри.
Iофтхьабзэр зэрищагъ партием ишъолъыр къутамэу республикэм щыIэм иполитсовет и Секретарэу Iэщэ Мухьамэд.
2016-рэ илъэсым иапэрэ мэзихым партием икъутамэ Iофэу ышIагъэм изэфэхьысыжьхэм афэгъэхьыгъагъ апэрэ Iофыгъоу къэзэрэугъоигъэхэр зытегущыIагъэхэр. Шъугу къэдгъэкIыжьын, УФ-м и Къэралыгъо Думэ идепутатхэм яхэдзынхэм афэгъэхьыгъэ кампаниеу мы илъэсым Iоныгъом и 18-м щыIэщтым къыдыхэлъытагъэу, «Единэ Россием» жъоныгъуакIэм и 22-м праймериз зэхищэгъагъ. Къэралыгъом ишъолъырхэр зэкIэ ащ хэлэжьагъэх. Партием ипащэхэм къызэраIуагъэмкIэ, пэшIорыгъэшъ хэдзынхэм нэбгырэ миллиони 9-м ехъу ахэлэжьагъ.
Хэдзынхэм ахэлэжьэнхэу фитыныгъэ зиIэхэм япроценти 9 фэдиз праймеризым къекIолIагъ, зыдырагъэштэрэ кандидатхэм амакъэ афатыгъ. Адыгеир пштэмэ, пэшIорыгъэшъ хэдзынхэм нэбгырэ мин 34-рэ фэдиз е проценти 10-м кIахьэу къякIолIагъ.
Зэфэхьысыжьхэм къагъэлъэгъуагъ непэ хэдзакIохэм нахь зыдырагъэштэрэ, цыхьэ зыфашIырэ кандидатхэр.
Ащ елъытыгъэу УФ-м и Къэралыгъо Думэ идепутатхэм ахэлэжьэщтхэм яспискэхэр зэхагъэуцуагъэх. РеспубликэмкIэ апэрэ чIыпIищыр къыдэзыхыгъэхэр: Хьасанэкъо Мурат, Мэрэтыкъо Рустем ыкIи Натхъо Разыет.
«2016-рэ илъэсыр мэхьанэшхо зиIэ унашъохэр зыщаштэщт илъэсэу щытыщт. А унашъохэр политикхэр, IэнатIэ зыIыгъ пащэхэр арэп зышIыщтхэр, Урысыем щыпсэурэ цIыф къызэрыкIохэр арых нахь», - къыIуагъ партием ипащэу, УФ-м и Премьер-министрэу Дмитрий Медведевым.
АР-м и Къэралыгъо Совет - Хасэм идепутатхэм яхэдзынхэм афэгъэхьыгъэ программэу партием ишъолъыр къутамэ иIэм къытегущыIагъ ыкIи пшъэрылъ шъхьаIэхэр къыгъэнэфагъэх ащ и Секретарэу Iэщэ Мухьамэд.
Зы хэдзыпIэ коимкIэ АР-м и Парламент идепутат хъунымкIэ кандидатхэм япартийнэ спискэ иреспубликэ Iахь хэхьэгъэхэ КъумпIыл Мурат, Владимир Нарожнэм, Елена Любченкэм, джащ фэдэу зы хэдзыпIэ коимкIэ ыкIи зы мандат зиIэ хэдзыпIэ койхэмкIэ Къэралыгъо Советым - Хасэм идепутат хъунымкIэ зикандидатурэ щыIэхэм яспискэ политсоветым хэтхэр тегущыIагъэх, шъэф шIыкIэм тетэу амакъэ афатыгъ. Зэфэхьысыжьхэм къызэрагъэлъэгъуагъэмкIэ, конференцием хэлэжьэгъэ лIыкIуи 108-м зэкIэми мы кандидатхэм адырагъэштагъ, партием ыцIэкIэ ахэр хэдзынхэм ахэлэжьэнхэу фитыныгъэ яIэ хъугъэ, къэзытхырэр «Адыгэ Макъ».
АР-м и ЛIышъхьэ Iофтхьабзэм зэфэхьысыжьхэр къыфишIызэ зымакъэ зытыгъэ пстэуми ирэзэныгъэ гущыIэхэр апигъохыгъэх. Iоныгъом и 18-м щыIэщт хэдзынхэм партием ишъолъыр къутамэ зэрифэшъуашэу ахэлэжьэным, текIоныгъэр къащыдихыным мэхьанэшхо зэриIэр къыхигъэщыгъ.
ЯIофшIэн агъэлъэшынэу къафигъэпытагъ 
Пшъэрылъ шъхьаIэхэр афигъэнэфагъэх 
Псауныгъэр къэухъумэгъэныр пшъэрылъ шъхьаI 
Адыгеим апэрэ чIыпIэр ыубытыгъ 
Партиеу «Единэ Россием» июбилей зэфэс тиреспубликэр хэлэжъагъ