АР-м и ЛIышъхьэу КъумпIыл Мурат граждан обществэм хэхъоныгъэ ышIынымкIэ ыкIи цIыфым ифитыныгъэхэмкIэ УФ-м и Президент дэжь щызэхащэгъэ Советым хэтэу, Ассоциациеу «Независимый общественный мониторинг» зыфиIорэм итхьаматэу Александр Брод тыгъуасэ IукIагъ.
Iофтхьабзэм хэлэжьагъэх АР-м и Къэралыгъо Совет -Хасэм и Тхьаматэу Владимир Нарожнэр, Адыгеим и ЛIышъхьэ ыкIи АР-м иминистрэхэм я Кабинет и Администрацие ипащэу Владимир Свеженецрэ ащ игуадзэу Къонэ Зауррэ, АР-м хэдзынхэмкIэ и Гупчэ комиссие итхьаматэу Сэмэгу Нурбый.
«ЦIыфхэм яфитыныгъэхэм яухъумэнкIэ IофшIэным ылъэныкъокIэ Iофхэм язытет зыфэдэм ыкIи ар нахьышIу шIыгъэным, хэбзэгъэуцугъэм диштэу хэдзынхэр зэхэщэгъэнхэм, УФ-м и Къэралыгъо Думэ ыкIи АР-м и Къэралыгъо Совет - Хасэм ядепутатхэм яхэдзынхэу мы илъэсым щыIэщтхэм къэзэрэугъоигъэхэр атегущыIагъэх.
«Советым, нэмыкI общественнэ ыкIи цIыфхэм яфитыныгъэхэм яухъумэнкIэ организациехэм зэпхыныгъэ адытиIэу Iоф адэтэшIэ. Общественнэ ыкIи политическэ зыпкъитыныгъэ республикэм илъыным, правовой культурэм зыкъегъэIэтыгъэным тапэкIи тапылъыщт», - къыIуагъ КъумпIыл Мурат.
Хабзэ зэрэхъугъэу, хэдзынхэр республикэм зэрифэшъуашэу зэрэщызэхащэхэрэр, цIыфыбэ къызэрякIуалIэрэр АР-м и ЛIышъхьэ къыхигъэщыгъ. Мы илъэсым щыIэщт хэдзынхэм языфэгъэхьазырын рагъэжьагъ. Мы кампаниер хэбзэгъэуцугъэм диштэу регъэкIокIыгъэным фэшI Адыгеир цIыфхэм яфитыныгъэхэм яухъумэнкIэ организациехэм шъхьэихыгъэу адэгущыIэным, адэлэжьэным фэхьазыр.
ТапэкIи республикэм Iоф дашIэным зэрэфэхьазырхэр, ащ дакIоу шъолъырым хэхъоныгъэшIухэр зэришIыхэрэр Александр Брод къыхигъэщыгъ.
«Адыгеим апэрэп сыкъызэрэкIорэр, зэпхыныгъэ дэгъу тиIэу тызэдэлажьэ. Мы аужырэ уахътэм Адыгеим нахьышIум ылъэныкъокIэ зызэблихъугъ, псэолъакIэхэр щашIыгъэх, мэхьанэшхо зиIэ проектхэр щагъэцакIэ. Арышъ, тизэпхыныгъэ дгъэпытэным тыфэхьазыр. Къэблэгъэрэ хэдзынхэр къэралыгъом ихэбзэгъэуцугъэ диштэу зэхэщэгъэнхэм, цIыфхэм яфитыныгъэхэр къэухъумэгъэнхэм мэхьанэшхо иI», - къыIуагъ А. Брод.
Мы Iофыгъохэм защытегущыIэгъэхэ Iэнэ хъураем Александр Брод джащ фэдэу хэлэжьагъ. Темэу ащ иIагъэр «Роль гражданского общества в обеспечении законности в ходе избирательных процессов» зыфиIорэр ары. ЕплъыкIэу яIэхэмкIэ зэдэгощэнхэм фэшI Iофтхьабзэм къырагъэблэгъагъэх АР-м и Общественнэ палатэ хэтхэр, хэдзынхэм алъыплъэгъэнымкIэ общественнэ штабым илIыкIохэр, экспертхэр, общественнэ объединениехэм япащэхэр, политологхэр ыкIи социологхэр.
«Республикэм командэ лъэш зэриIэм тыщыгъуаз. Ау хэдзынхэм зафэдгъэхьазырын фае. Мызыгъэгум кампанием нахь лъэшэу щызэнэкъокъущтых. Арышъ, къызэрэсIуагъэу, Iофтхьабзэм изэхэщэн зэрифэшъуашэу тыкъекIолIэн фае», - къыIуагъ А. Брод.
НэмыкI шъолъырхэм афэдэу зыми емыпхыгъэ экспертхэм якуп Адыгеим щызэхащэн фаеу къыIуагъ. Хэдзын кампаниер зэрэкIорэм ахэр лъыплъэщтых ыкIи цIыфхэм къэбарыр алъагъэIэсыщт. «Независимый общественный мониторинг» зыфиIорэ Ассоциацием лъыплъакIохэм якорпус, журналистхэм ыкIи блогерхэм апае республикэм егъэджэнхэр щызэхищэнхэу егъэнафэ.
«Демократическэ обществэм иполитическэ системэ хэхъоныгъэ ышIыным фэшI хэдзынхэм сыдигъокIи мэхьанэшхо яI. Граждан обществэм иинститут зэфэшъхьафхэм тапэкIи тадэлэжьэным тыфэхьазыр. Хэдзынхэр шапхъэхэм адиштэу, шъыпкъагъэ хэлъэу зэхэщэгъэным тыпылъын фае», - къыIуагъ КъумпIыл Мурат.
УФ-м и Къэралыгъо Думэ ыкIи АР-м и Къэралыгъо Совет – Хасэм ядепутатхэм яхэдзынхэр зэрифэшъуашэу республикэм щызэхащэным фэшI граждан обществэм хэхъоныгъэ ышIынымкIэ ыкIи цIыфым ифытыныгъэхэмкIэ УФ-м и Президент дэжь щызэхащэгъэ Советым хэтэу, Ассоциациеу «Независимый общественный мониторинг» зыфиIорэм итхьаматэ пшъэрылъ гъэнэфагъэхэр АР-м хэдзынхэмкIэ и Гупчэ комиссие къыфишIыгъэх.