2016-рэ илъэсым Iоныгъом и 18-м УФ-м и Къэралыгъо Думэ идепутатхэр хадзыщтых. Ащ къыдыхэлъытагъэу «Единэ Россиер»: Адыгеим ыцIэкIэ пэшIорыгъэшъ мэкъэтыным хэлэжьэщтхэм якъэгъэлъэгъон фэхъугъэ кIэуххэр» зыфиIорэ пресс-конференцие Мыекъуапэ щыкIуагъ.
Iофтхьабзэр зэрищагъ Къэралыгъо Думэм идепутатхэм яхэдзынкIэ Федеральнэ партийнэ мэкъэтыным и Адыгэ шъолъыр зэхэщэкIо комитет ипащэу, партием ирегиональнэ отделение и Секретарэу Iэщэ Мухьамэд.
Пресс-конференцием пэублэ псалъэ къыщишIызэ, праймеризым хэлэжьэщтхэ кандидати 10 зэратхыгъэр къыIуагъ. Ахэр: Парламентым и Палатэу ыхэкIэ щыIэм идепутатэу Натхъо Разыет, АР-м псауныгъэр къэухъумэгъэнымкIэ иминистрэу Мэрэтыкъо Рустем, республикэм физическэ культурэмкIэ ыкIи спортымкIэ и Комитет итхьаматэу Хьасанэкъо Мурат, цIыфхэм яфитыныгъэхэмкIэ Уполномоченнэу Адыгеим щыIэ Анатолий Осокиныр, Мыекъуапэ инароднэ депутатхэм я Совет идепутатэу Бэрзэдж Асыет, Къэралыгъо телерадиокомпаниеу «Адыгеим» ипащэ игуадзэу Щыщэ Люсинэ, Мыекъопэ къэлэ сымэджэщым иврач шъхьаIэ игуадзэу Елена Любченкэр, Мыекъопэ гурыт еджапIэу N 9-м идиректорэу Хьатэгъу Нелли, кIэлэцIыкIу IыгъыпIэу N 1-м ипащэу Светлана Папинар ыкIи Адыгеим ибзылъфыгъэхэм я Союз игъэIорышIапIэ итхьаматэу Светлана Дорошенкэр.
УФ-м и Къэралыгъо Думэ идепутахэм адакIоу, АР-м и Къэралыгъо Совет — Хасэм идепутатхэри Iоныгъом зэрэхадзыщтхэр, зэкIэмкIи Урысыем ишъолъыр 38-мэ шъолъыр ыкIи чIыпIэ мэхьанэ зиIэ хэдзынхэр зэращыкIощтхэр региональнэ политсоветым и Секретарь къыIуагъ. Хабзэ зэрэхъугъэу, «Единэ Россиер» ахэм чанэу зэрахэлэжьэщтыр, текIоныгъэр къащыдихыным зэрэпылъыщтыр къыхигъэщыгъ.
ЗэхъокIыныгъэхэм ащыщэу зигугъу къышIыгъэр джырэ уахътэм АР-м и Парламент депутат 54-рэ хэтымэ, Iоныгъом ахэм япчъагъэ нэбгырэ 50 зэрэхъущтыр ары.
«ЦIыфхэм нахь цыхьэ зыфашIырэ, зыдырагъэштэрэ кандидатхэр къыхэхыгъэнхэм пае илъэс пчъагъэ хъугъэу «Единэ Россием» праймериз зэхещэ. Ау мы илъэсым ар нахь зэIухыгъэу щыт ыкIи партие кIоцIым щызэхащэрэ мэкъэтыным шIокI имыIэу кандидатхэр зэкIэ хэлэжьэнхэ фае. ПэшIорыгъэшъ мэкъэтыным хэлажьэхэ ашIоигъоу джырэ уахътэм УФ-м и Къэралыгъо Думэ идепутати 193-мэ зарагъэтхыгъ. Ащ къызэригъэлъагъорэмкIэ, фракциеу «Единэ Россием» хэтхэм ащыщыбэхэр зэблахъу-щтых, цIыфыкIэхэр къыхэхьащтых. Непэрэ хэбзэгъэуцухэм къянэкъокъущтых праймеризым хэлэжьэрэ шъолъырхэм ащыIэ зэлъашIэрэ ыкIи шъхьэкIафэ зыфашIырэ цIыфхэр. Ахэм Адыгеим щыщхэри ахэтых. Ащ къыхэкIыкIэ, пэшIорыгъэшъ мэкъэтыным зэфэхьысыжьэу фэхъущтхэр къэшIэгъуае», - къыIуагъ Iэщэ Мухьамэд.
Пресс-конференцием хэлэжьэгъэ журналистхэм яупчIэхэм кандидатхэм джэуапхэр къаратыжьыгъэх. Хэдзынхэм мэхьанэу яIэм, анахьэу анаIэ зытырагъэтыщт Iофыгъохэм къатегущыIагъэх, къэзытхырэр «Адыгэ Макъ».
ЖъоныгъуакIэм и 22-м зэрэ Урысыеу щыкIощт пэшIорыгъэшъ мэкъэтыным ехъулIэу гъэдэIоныр аухыщт. Ащ нэс кандидатхэр площадкэ зэфэшъхьафхэм ащызэIукIэщтых, дебатхэм ахэлэжьэщтых.