КъумпIыл Мурат Кощхьэблэ районым ипащэ пшъэрылъ фишIыгъ цIыфхэм ятхьаусыхэ тхылъхэм язэшIохын нахь тэрэзэу екIолIэнхэу
Адыгеим и ЛIышъхьэу КъумпIыл Муратрэ Кощхьэблэ районым ипащэу Хьамырзэ Зауррэ тыгъуасэ IофшIэгъу зэIукIэгъоу зэдыряIагъэм районым исоциальнэ-экономикэ Iофхэм язытет щытегущыIагъэх.
Муниципалитетым ипащэ социальнэ псэуалъэхэр бжыхьэ-кIымэфэ лъэхъаным зэрэфэхьазырхэр къыIуагъ. Хьамырзэ Заур зэрэхигъэунэфыкIыгъэмкIэ, пэшIорыгъэшъ IофшIэнхэр зэкIэ зэшIуахыгъахэх, бюджет учреждениехэм ресурсхэр къэзытырэ организациехэм апашъхьэ чIыфэ щателъэп. Районым игурыт еджапIэхэмрэ икIэлэцIыкIу IыгъыпIэхэмрэ тыгъуасэ агъэфабэхэу аублагъ. Къутырэу Кармолино-Гидроицкэм дэт гурыт еджапIэр ары аужэу газыр зыфыпагъэнагъэр.
Хьамырзэ Заур къызэриIуагъэмкIэ, гъэтхасэхэм яугъоижьын районым ыкIэм щыфэкIо. Гектар мин 14-м щыщэу гектар мини 9-м лэжьыгъэр щыIуахыжьыгъах. ГурытымкIэ гектар пэпчъ центнер 50 къырахы. ЧIыгулэжьхэм тхьамафэм къыкIоцI губгъо IофшIэнхэр аухынэу рахъухьэ.
Республикэм и ЛIышъхьэ зэрэхигъэунэфыкIыгъэмкIэ, хыпкъхэм лыгъэ арамыдзыным, зэхэкIыхьэгъэ чIыпIэхэм арыт уцыжъхэр раупкIыным, чIыпIэхэр къэбзэнхэм анахьэу анаIэ атырагъэтын фае.
Линие занкIэм илъэхъан цIыфхэм зыкъызэрэфагъэзэгъэ тхьаусыхэ тхылъхэмкIэ Урысыем и Президент къафишIыгъэ пшъэрылъхэр агъэцэкIэнхэ зэрэфаем шъхьафэу тегущыIагъэх, къэзытхырэр Адыгэ Республикэм и ЛIышъхьэ ипресс-къулыкъу.
«А IофшIэным лъэшэу шъунаIэ тежъугъэт. ЦIыфхэм ятхьаусыхэ тхылъ пэпчъ къыгъэлъагъорэр лъэныкъо горэхэмкIэ щыкIагъэхэр зэрэтиIэхэр ары. Ащ фэдэ тхьаусыхэхэм такIэдэIукIын ыкIи псынкIэу хэкIыпIэхэр къэдгъотынхэ фае. Пшъэрылъ шъхьаIэу тиIэр цIыфхэм ящыIэкIэ-псэукIэ зыкъедгъэIэтыныр ары», — кIэух зэфэхьысыжь къышIыгъ КъумпIыл Мурат.
Пытагъэ хэлъэу къекIолIэщтых 
АР-м и ЛIышъхьэ иIофшIэгъу зэIукIэгъу 
IофшIэныр лъагъэкIотэнэу пшъэрылъ къафишIыгъ 
ИIэнатIэ Iухьагъ 
ИлъэсыкIэ еджэгъум ипэгъокIэу