Примерное время чтения: 2 минуты
67

IэкIыб къэралхэм ащыпсэурэ адыгэхэм ялIыкIохэр Адыгеим къэкIогъагъэх

Адыгэ Республикэм и Мафэ ехъулIэу республикэм и ЛIышъхьэу КъумпIыл Мурат ригъэблэгъагъэх Иорданием, Тыркуем ащыпсэурэ адыгэхэм ялIыкIохэр, джащ фэдэу Тыркуем и Кавказ Ассоциациехэм я Федерацие (КАФФЕД) хэтхэр.

ЗэIукIэгъум хэлажьэхэрэр республикэм и ЛIышъхьэ къыфэгушIуагъэх IэнатIэм зэрэIухьагъэм ыкIи Адыгэ Республикэр зызэхащагъэр илъэс 26-рэ зэрэхъурэм япхыгъэу.

Къалэу Инегель имэр игуадзэу Табан Алпер зэрэрагъэблэгъагъэхэм пае зэрафэразэр ыкIи лъэныкъо зэфэшъхьафхэмкIэ язэдэлэжьэныгъэ зэрагъэпытэщтым шIошъхъуныгъэ зэрэфыряIэр къыIуагъ. Иорданием щыпсэурэ адыгэхэм янахьыжъхэм я Совет и Тхьаматэу Мэулид Аднан къыхигъэщыгъ дунаим тет адыгэ пстэури зэзыпхыхэрэ бзэр, культурэр, цIыфыгъэ шэпхъэ дахэхэр къэухъумэгъэнхэм мэхьанэшхо зэриIэр, къэзытхырэр Адыгэ Республикэм и ЛIышъхьэ ипресс-къулыкъу.

ЗэдэгущыIэгъум илъэхъан экономикэм, социальнэ лъэныкъом, гъэсэныгъэм ыкIи культурэм япхыгъэ зэдэлэжьэныгъэм яIофыгъо зэфэшъхьафхэм къащыуцугъэх. Мы зэIукIэгъум хэлэжьагъэх хабзэм икъулыкъухэм ялIыкIохэу гъэсэныгъэм, культурэм, лъэпкъ политикэм яIофыгъохэм афэгъэзагъэхэр, гуманитар ушэтынхэмкIэ Адыгэ республикэ институтэу КIэрэщэ Тембот ыцIэкIэ щытым, общественнэ движениеу «Адыгэ Хасэм», къэзыгъэзэжьыхэрэр хэгъэгъозэжьыгъэнхэмкIэ Гупчэм япащэхэр.

КъумпIыл Мурат къыхигъэщыгъ Адыгеим, чIыпIэу зыдэгъэзагъэм, чIыопсым изытет япхыгъэу къэпIон хъумэ, бизнес-проектхэм язэхэгъэуцонкIэ, язэшIохынкIэ амалышIухэр къызэритыхэрэр. Инвестиционнэ предложениехэм япакет илъэс къэс агъэкIэжьы ыкIи Адыгеим Iоф щишIэным фэхьазыр пстэуми игъэкIотыгъэу ащ нэIуасэ зыфашIын алъэкIыщт.

«Тихэгъэгухэм япащэхэм зэдашIырэ къэралыгъо зэзэгъыныгъэхэм атегъэпсыхьагъэу тызэдэлэжьэным тыфэхьазыр. IэкIыб къэралхэм ащыпсэурэ адыгэхэм ялIыкIохэу предпринимательствэм фэгъэзагъэхэр зыхэлэжьэщтхэ форумышхо Адыгеим щырегъэкIокIыгъэным непэ тыдэлажьэ. Тихэгъэгухэм яэкономикэхэм яхэхъоныгъэ кIочIэ ин ащ къызэрэхилъхьащтым сицыхьэ телъ. Культурэ зэпхыныгъэхэм нахь зягъэушъомбгъугъэным, адыгабзэр, лъэпкъ шэн-хабзэхэр къэухъумэгъэнхэм тадэлэжьэным мэхьанэшхо иIэу щыт», — къыхигъэщыгъ КъумпIыл Мурат.

Смотрите также:

Оцените материал
Оставить комментарий (0)

Также вам может быть интересно

Топ 5 читаемых

Самое интересное в регионах