Адыгэ Республикэм и ЛIышъхьэу КъумпIыл Мурат Инэм къэлэ псэупIэм хэхъоныгъэ егъэшIыгъэным епхыгъэ Iофыгъохэм афэгъэхьыгъэ зэхэсыгъор республикэм и Правительствэ зычIэт унэм щызэрищагъ.
Iофтхьабзэм хэлэжьагъэх АР-м и Премьер-министрэ ипшъэрылъхэр зыгъэцэкIэрэ КIэрэщэ Анзаур, муниципальнэ образованиеу «Тэхъутэмыкъое районым» ипащэу Шъхьэлэхъо Азмэт, Инэм къэлэ псэупIэм ипащэу Хъоткъо Хъызыр, АР-м иминистрэхэм я Кабинет хэтхэр, АР-м и Къэралыгъо Совет — Хасэм идепутатхэр, Инэм къэлэ псэупIэм инароднэ депутатхэм я Совет идепутатхэр.
Адыгеим и ЛIышъхьэ зэхэсыгъом къызэрэщиIуагъэмкIэ, хэбзэ къулыкъухэм Инэм хэхъоныгъэ егъэшIыгъэным зэрафэлъэкIэу акIуачIэ рахьылIэ. Республикэр къэралыгъо программэ заулэмэ чанэу ахэлажьэ. Ащ нэмыкIэу ежьхэм къаIэкIэхьэрэ федэри, Инэм къэлэ псэупIэм изэхэугъоегъэ бюджети нахьыбэ хъугъэ. А пстэуми амал къаты социальнэ лъэныкъом паекIэ хъарджэу ашIыхэрэм закъырагъэIэтынэу.
ГущыIэм пае, мы аужырэ илъэсхэм культурэм иучреждениехэр Инэм щагъэцэкIэжьыгъэх, цIыфхэм япсауныгъэ зыщагъэпытэрэ физкультурэ комплекс, кIэлэцIыкIу IыгъыпIакIэ, нэбгырэ 1100-мэ ателъытэгъэ гурыт еджапIэр, атлетикэ онтэгъумкIэ залыр щагъэпсыгъэх. Республикэм и Президентыгъэу Шъэумэн Хьазрэт мылъку IэпыIэгъоу къаритыгъэм ишIуагъэкIэ джыдэдэм ковиднэ госпиталькIэ къызфагъэфедэрэ сымэджэщыр шIукIаеу агъэкIэжьыгъ. Мыгъэ поликлиникакIэм игъэпсын рагъэжьэнэу рахъухьэ. Проектэу «Джырэ шапхъэхэм адиштэрэ къэлэ щыIэкIэ Iэрыфэгъу» зыфиIорэм тетэу илъэс къэс поселкэм ищагухэмрэ иобщественнэ чIыпIэхэмрэ зэтырагъэпсыхьэх. Илъэси 5-м къыкIоцI фэтэрыбэу зэхэт унэ 50 агъэцэкIэжьыгъ, фэтэри 7 агъэпсыгъ, зэхэкъутэнкIэ щынагъоу щыт унэхэм къачIащыжьхи, нэмыкI псэупIэ унэгъо 78-мэ арагъэгъотыгъ, сабыибэ зиIэ унагъохэм чIыгу Iахь 487-рэ къафыхагъэкIыгъ.
Инженер, транспорт инфраструктурэм изегъэушъомбгъунрэ электроэнергиер зэрафимыкъурэм епхыгъэ Iофыгъор дэгъэзыжьыгъэнымрэ лъэшэу анаIэ зытырагъэтыхэрэм ащыщых. Мы аужырэ илъэсхэм Инэм къэлэ псэупIэм иинфраструктурэрэ исоциальнэ лъэныкъорэ сомэ миллиарди 5-м ехъурэ инвестициехэр къахалъхьагъэх.
Адыгеим и ЛIышъхьэ хэхъоныгъэшхо зышIырэ псэупIэхэм зэу Инэм ахилъытагъ. Ар зэпхыгъэр гектари 194-рэ зэлъызыубытыщт промышленнэ паркым игъэпсын епхыгъэ проектыр зэрагъэцакIэрэр ары. А паркыр псэупIэхэу Инэмрэ Яблоновскэмрэ азыфагу щагъэпсыщт. Ар зыдэщытыщт чIыпIэр къыхахы зэхъум къыдалъытагъэр инвестициехэр ахэплъхьанхэм чIыпIэхэр зэрэфытегъэпсыхьагъэхэр, аэропортым, мэшIоку гъогум зэрэпэблагъэхэр, Новороссийскэ икъухьэуцупIэ километри 136-кIэ зэрэпэIудзыгъэр ары. Промышленнэ паркым экономикэм хэхъоныгъэ ригъэшIыщт, ащ ишIуагъэкIэ IофшIэпIэ чIыпIакIэхэр зэхащэщтых, инвестициехэр къахалъхьащтых, бюджетхэм хэбзэIахьэу къарыхьэрэр нахьыбэ хъущт.
КъумпIыл Мурат зэхэсыгъом хэлажьэхэрэм анаIэ тыраригъэдзагъ стратегическэ унэшъо тэрэзхэр штэгъэным мэхьанэшхо зэриIэм, проект инхэр агъэцакIэхэ зыхъукIэ хабзэм ишъолъыр къулыкъухэмрэ имуниципальнэ къулыкъухэмрэ зэрэзэдырагъэштэн фаем.
Инфраструктурэм тапэкIи зегъэушъомбгъугъэныр пшъэрылъ шъхьаIэхэм зэращыщым игугъу зэхэсыгъом къыщашIыгъ. Автомобиль гъогоу «Инэм — БжыхьэкъоякI» зыфиIорэм дэжь метрэ мини 5,2-м ехъу зикIыхьэгъэ гъогу зэхэкIыпIэм ишIын 2020-рэ илъэсым щаублагъ. Проектым диштэу метри 157-рэ зикIыхьэгъэщт лъэсрыкIо зэпырыкIыпIи мыщ щагъэпсыщт. МэшIокугъогу зэпырыкIыпIэм дэжь ар зыщашIыщтыр. Республикэм июбилей зыщыхагъэунэфыкIыщт илъэсым, мыгъэ, мэхьанэшхо зиIэ ащ фэдэ IофшIэныр аухын ямурад.
ПсэолъакIэм амал къытыщт хы ШIуцIэ Iушъом екIурэ гъогум транспортыр нахь щынэгъончъэу щызекIонэу, авариехэр нахь макIэ хъунэу, псэупIэхэм хэхъоныгъэ ашIынэу. Гъогу зэхэкIыпIэр загъэпсыкIэ, мэшIокугъогу зэпырыкIыпIэм дэжь автомобиль гъогухэм бащэу транспортыр зэращызекIощтыгъэм иIофыгъуи зэшIохыгъэ, поселкэу Инэм иIахьитIуми лъэсрыкIохэр ащызекIонхэмкIэ Iэрыфэгъу хъущт.
«Инэм псынкIэу хэхъоныгъэ зышIырэ псэупIэхэм зэу ащыщ. Мы аужырэ лъэхъаным къэлэдэсхэм ящыIэкIэ-псэукIэ зыкъегъэIэтыгъэнымкIэ тэ бэ зэшIотхын тлъэкIыгъэр. Ау джыри зэшIохыгъэн фаеу Iофыгъуабэ тапэ илъ. Инэм хэхъоныгъэ езыгъэшIыщт проектышхохэм ягъэцэкIэн тыфежьагъ. Поселкэр чIыпIэ дэгъу зэрэщысым, промышленнэ паркыр зэрагъэпсырэм яшIуагъэ къэкIо. Ащ фэдэ амалхэр акъылыгъэ хэлъэу чIыпIэхэм ащагъэфедэнхэм мэхьанэшхо иI. Республикэмрэ федеральнэ гупчэмрэ къазэрадеIэхэрэм нэмыкIэу ежь псэупIэми амалыбэ иI, ахэр нахь икъоу къызфагъэфедэн фае», — къыIуагъ КъумпIыл Мурат.
Депутатхэм республикэм и ЛIышъхьэ зэрэфэразэхэр муниципалитетым ыпашъхьэ ит пшъэрылъхэм язэшIохынкIэ IэпыIэгъу къызэрафэхъурэм фэшI. Ахэм зэрэхагъэунэфыкIыгъэмкIэ, къэлэ псэупIэм дэсхэм Инэм итеплъэрэ социальнэ инфраструктурэмрэ зэхъокIыныгъэу афэхъугъэхэм осэшхо къаратыгъ.
ЦIыфхэм ятхылъхэм къащаIэтырэ Iофыгъо заулэмэ Адыгеим и ЛIышъхьэ ягугъу къышIыгъ. НахьыбэрэмкIэ ахэр зыфэгъэхьыгъэхэр псэупIэ-коммунальнэ хъызмэтыр, гъогухэм ягъэцэкIэжьын, канализациехэм ягъэпсын ары. КъумпIыл Мурат Тэхъутэмыкъое районымрэ Инэм къэлэ псэупIэмрэ япащэхэм пшъэрылъ афишIыгъ поселкэм изэтегъэпсыхьанкIэ щыкIагъэу щыIэхэр дагъэзыжьынхэу, гъогу напцэхэм фэIо-фашIэхэр зэращызэхащэрэ шIыкIэм хэбзэ икъу хэлъхьэгъэнэу.
Генеральнэ планым тетэу микрорайоныкIэхэр зэтегъэпсыхьэгъэнхэмкIэ чIыгу Iахьхэр къафыпаупкIынэу пшъэрылъ афишIыгъ. ГущыIэм пае, псэупIэм иIахьэу мэшIоку гъогум зэпырыдзыгъэм унэе унэхэр щагъэпсынхэу, къатыбэу зэтет унэхэр ащ щамышIынхэу рахъухьэ. Инвестиционнэ площадкэхэм язэтегъэпсыхьан, инвестициехэр нахьыбэу къахалъхьанхэм япхыгъэ Iофыгъохэм шъхьафэу анаIэ атырагъэтыгъ.
Зигъо пшъэрылъхэм язэшIохынкIэ амалэу зэрахьэхэрэм яхьылIагъэу цIыфхэм макъэ нахьышIоу ягъэIугъэнымкIэ депутатхэм амалэу яIэр нахь икъоу къызфагъэфедэнэу, къэлэдэсхэм яшIошI къыдалъытэнэу КъумпIыл Мурат игъо афилъэгъугъ.
