Адыгеим и ЛIышъхьэу КъумпIыл Мурат Тэхъутэмыкъое районым зэкIом, нэбгырэ 990-мэ ателъытэгъэ гурыт еджапIэр зыщагъэпсырэ къуаджэу АдыгеякIэм щыIагъ. Илъэсым ыкIэхэм анэс псэолъэшIын IофшIэнхэр аухынэу рахъухьэ.
Республикэм и ЛIышъхьэ псэолъэшIыпIэм Iофхэр зэрэщыкIорэм нэIуасэ зыфишIыгъ, подрядчикым дэгущыIагъ. ПIалъэхэр къыдалъытэнхэм мэхьанэшхо зэриIэр, шIуагъэ къытэу ахъщэр агъэфедэн зэрэфаер КъумпIыл Мурат хигъэунэфыкIыгъ.
Подряднэ организацием ипащэ игуадзэу ДзэлI Аскэр къызэриIуагъэмкIэ, пIалъэу афагъэнэфагъэхэм атетэу IофшIэнхэр зэкIэ зэхащэх, джырэ уахътэм диштэрэ технологиехэмрэ псэолъапхъэхэмрэ анэмыкI псэолъэшIыным щагъэфедэрэп. Непэрэ мафэм ехъулIэу псэолъэшIын IофшIэнхэм япроцент 60-м ехъур аухыгъах. Дэпкъхэр зэтыралъхьэгъахэх, унашъхьэм иIэтын аухы, унэ кIоцI IофшIэнхэр зэхащэх. Гурыт еджапIэм газрыкIуапIэхэмрэ псырыкIуапIэхэмрэ ращэлIэгъахэх, корпусым апчхэр хэлъхьэгъэнхэм тегъэпсыхьэгъэ Iофхэр мы охътэ благъэм рагъэжьэщтых. ПстэумкIи нэбгырэ 200-м ехъумэ псэолъэшIыпIэм Iоф щашIэ.
Адыгеим и ЛIышъхьэ унэу агъэпсырэмрэ ащ къыпэIулъ чIыпIэмрэ язытет зэригъэлъэгъугъ. КъумпIыл Мурат гурыт еджапIэм къыпэIулъ чIыпIэм изэтегъэпсыхьан хэлэжьагъ, клумбэхэм ащыщ горэм куандэ хигъэтIысхьагъ, къэзытхырэр Адыгэ Республикэм и ЛIышъхьэ ипресс-къулыкъу.
Шъугу къэтэгъэкIыжьы къатищэу зэтетыщт гурыт еджапIэр федеральнэ къэралыгъо программэу «2013 — 2020-рэ илъэсхэм гъэсэныгъэм зегъэушъомбгъугъэныр» зыфиIорэм диштэу зэрагъэпсырэр. Ащ ишIын пае федеральнэ, республикэ, муниципальнэ бюджетхэм сомэ миллион 594-рэ фэдиз къахагъэкIыгъ. ГъэсэныгъэмкIэ федеральнэ къэралыгъо шэпхъэ пстэуми псэуалъэр адиштэщт. Гурыт еджапIэхэм сменитIукIэ зэращеджэхэрэр дэгъэзыжьыгъэным тегъэпсыхьэгъэ Iофхэр чэзыу-чэзыоу джыдэдэм республикэм щызэрахьэх.
Къихьащт илъэсым поселкэу Инэм гурыт еджапIэм ишIын щырагъэжьэнэу, къалэу Мыекъуапэ гурыт еджэпIи 3 щагъэпсынэу рахъухьэ.
Компанием ия 8-рэ завод Адыгеим къыщызэIуихыгъ 
ЗекIоным ихэхъоныгъэхэр 
ИцIыфхэм арэгушхо 
Зэзэгъыныгъэм зэдыкIэтхaгъэx 
ИIофшIэн осэшIу фишIыгъ