21

ИшIогъэшхо къэкIощт

Майкоп, 18 августа - АиФ-Адыгея.

Зашъохэрэ псыр укъэбзыгъэнымкIэ къутырэу Гавердовскэм щагъэпсырэ псэуалъэм ишIын зэрэлъыкIуатэрэр тыгъуасэ зэригъэлъэгъугъ Адыгэ Республикэм и ЛIышъхьэу КъумпIыл Мурат.

Артезианыпсым гъучIэу хэлъыр нахь макIэ шIыгъэным ар тегъэпсыхьагъ. ПсэолъэшIын IофшIэнхэр ыкIэм рафылIагъэхэу, джырэ уахътэм зыпылъхэр ар къызэратIупщыщт Iофыгъом изэтегъэуцон.

Мыекъуапэрэ Мыекъопэ районымрэ ащыпсэухэрэм зэпымыоу шэпхъэшIухэм адиштэрэ псыр аIэкIэгъэхьэгъэнымкIэ Мыекъопэ зэхэт псы зэбгырыщыпIакIэм ишIын тегъэпсыхьэгъэ проектым къыхиубытэу мы IофшIэнхэр зэшIуахых. Псэуалъэм пае унэ шъхьафэу квадратнэ метрэ 580-рэ зиинагъэр агъэпсыгъ, хэушъхьафыкIыгъэ оборудование чIагъэуцуагъ.

Артезиан къычIэщыпIэхэм къатырэ псыр укъэбзыпIэ пчъагъэхэм къапхырыкIыщт. ГъучIыр хэзыщырэ псэуалъэм зы сыхьатым кубометрэ 1000 хъурэ псыр (чэщ-зымафэм кубометрэ мин 24-рэ) къытыщт ыкIи ащ джыри кубометрэ 500 сыхьат телъытэу хэгъэхъогъэн амал иIэнэу проектым къыдыхэлъытагъ.

Адыгеим и ЛIышъхьэ къызэриIуагъэмкIэ, мы псэуалъэм ишIуагъэкIэ артезиан къычIэщыпIэхэм къатырэ зашъохэрэ псыр нахьышIу хъущт.

«ЗэкIэхэмкIи къэтэшIэжьы кIымэфэ лъэхъаным къушъхьэпсыр зыщымакIэм артезиан псы къычIэщыпIэхэр дгъэфедэнхэ фаеу зэрэхъущтыгъэр. ЦIыфыбэмэ зыкъытфагъазэщтыгъ псыр шIоркъы зэрэхъугъэм фэгъэхьыгъэу, социальнэ хъытыухэри агъэфедэзэ къытфатхэщтыгъэх. Непэ мыщ пстэури щыгъэцэкIагъэ хъугъэ къэлэдэсхэм шапхъэу щыIэхэм адиштэрэ псы къабзэ ыкIи къаргъо аIэкIэгъэхьэгъэнымкIэ. Анахь шъхьаIэр — химическэ пкъыгъо емыхьылIагъэу механическэ шIыкIэкIэ псыр зэраукъэбзыщтыр ары», — къыхигъэщыгъ игущыIэ КъумпIыл Мурат.

Артезиан псы къычIэщыпIэхэу агъэфедэхэрэм япчъагъэ хэгъэхъогъэными иIофыгъо АР-м и ЛIышъхьэ адызэхифыгъ Мыекъуапэ ипащэу Андрей Гетмановымрэ муниципальнэ унитарнэ хъызмэтшIапIэу «Майкопводоканал» зыфиIорэм иIэшъхьэтетэу Апэжьыхьэ СултIанрэ.

Артезиан псы къычIэщыпIэхэр загъэфедэхэрэр къушъхьэпсыр нахь макIэ зыщыхъурэ ыкIи псыкъэкIопIэшхор зыщызэщыкъорэ лъэхъанхэр арых. Ащ нэмыкIэу Мыекъуапэрэ Мыекъопэ районымрэ ащыпсэухэрэм зэпыу имыIэу псыр аIэкIэхьаным иIофыгъо зэшIохыгъэным пае мы илъэсым ыкIэ нэс километри 120-рэ зикIыхьэгъэ псырыкIопIэ тедзэр ашIы-нэу агъэнафэ. Мыекъопэ зэхэт псырыкIопIэ гуадзэу зипсыубытыпIэхэр къушъхьэ псыкъэкIопIи 5-мэ къахэкIыхэрэм яшIуагъэ къэкIощт республикэм икъэлэ шъхьаIэрэ Мыекъопэ районымрэ ащыпсэухэрэм зэпымыоу псы къаIэкIэхьанымкIэ ыкIи ящыIакIэ нахьышIу хъунымкIэ. Псэуалъэр затIупщыкIэ, псэу къатырэм ипчъагъэ чэщ-зымафэм кубометри 100-м шIокIынышъ, 140-м нэсыщт.

Оставить комментарий (0)
Загрузка...

Топ 5 читаемых

Самое интересное в регионах