Адыгэ Республикэм и ЛIышъхьэу ТхьакIущынэ Аслъан мамырныгъэм илIыкIоу ООН-м щыIэу, зэлъашIэрэ сурэтышIэу, Урысыем щыпсэурэ цIыф лъэпкъхэм ягушъхьэбаиныгъэ зыкъегъэIэтыгъэнымкIэ Ассамблеим и Комитет ипащэу Александр Шиловымрэ мы Ассамблеим хэтхэм ащыщхэмрэ тыгъуасэ аIукIагъ.
Iофтхьабзэм хэлэжьагъэх АР-м культурэмкIэ иминистрэу Къулэ Мыхьамэт, КъокIыпIэм щыпсэурэ лъэпкъхэм яискусствэхэмкIэ Къэралыгъо музееу Мыекъуапэ дэтым ипащэу Кушъу Нэфсэт, Адыгэ республикэ общественнэ организациеу «Мамырныгъэм и Лигэ» итхьаматэу Аристотель Спировыр. А. Шиловым исурэт шIыгъэхэр зыхэхьэгъэ къэгъэлъэгъонэу «Тэ тиродинэр - Урысыер ары» зыфиIорэм икъызэIухын, культурэм, искусствэм, нэмыкI лъэныкъохэм къэзэрэугъоигъэхэр атегущыIагъэх.
АР-м и ЛIышъхьэ пэублэ псалъэ къышIызэ, Адыгеим къэкIогъэ хьакIэхэм шIуфэс гущы-IэхэмкIэ закъыфигъэзагъ. А. Шиловыр сурэтышI ныбжьыкI нахь мышIэми, итворчествэкIэ лъэгэпIэ инхэм анэсын зэрилъэкIыгъэр, ащ урыгушхон зэрэфаер республикэм ипащэ къыхигъэщыгъ.
АР-м и ЛIышъхьи, дахэу къыпэгъокIыгъэ бысымхэми афэрэзагъ нэужым гущыIэр зыштэгъэ А. Шиловыр. Къэгъэлъэгъонэу Мыекъуапэ къыщызэIуихырэр Урысыем инэмыкI шъолъырхэми зэращыIагъэр, ар цIыфхэм зэрашIогъэшIэгъоныгъэр къыIуагъ.
«Адыгеим ичIыопс зэрэдахэр слъэгъугъэ, чIыпэ гъэшIэгъонэу иIэхэм усурэтышIмэ угу къыдащэенэу щыт. ТапэкIэ тизэпхыныгъэ, тизэгурыIоныгъэ дгъэпытэнэу сыфай. Къэгъэлъэгъоным изэфэшIыжьын ехъулIэу республикэм джыри сыкъэкIон гухэлъ сиI. Джащ фэдэу сурэтышI ныбжьыкIэхэм, кIэлэцIыкIухэм апае мастер-классхэр зэхасщэмэ сшIоигъу», - къыIуагъ А. Шиловым.
ЫпшъэкIэ зигугъу къэтшIыгъэ Ассамблеим ишъолъыр къутамэ Адыгеим къыщызэIуахы зэрашIоигъор нэужым къэгущыIэгъэ хьакIэхэм къаIуагъ. АР-м и ЛIышъхьэ а гухэлъым дыригъэштагъ. КъэIогъэн фае мы организациер искусствэм, культурэм анэмыкIэу, спортым, гъэсэныгъэм, медицинэм, нэмыкI лъэныкъохэм хэхъоныгъэхэр ашIынхэм ынаIэ зэратыригъэтырэр, къэзытхырэр «Адыгэ Макъ».
Лъэныкъохэм язэпхыныгъэ гъэпытэгъэным фэIорышIэщт Iофтхьабзэхэр республикэм щызэхащэнхэу, ащкIэ зэзэгъыныгъэ гъэнэфагъэхэр зэдашIынхэу зэдаштагъ.
МэфэкIыр хагъэунэфыкIыгъ 
Компанием ия 8-рэ завод Адыгеим къыщызэIуихыгъ 
Весенние паводки могут подтопить до 80 федеральных трасс 
ЯмэфэкI хагъэунэфыкIыгъ (26.07.2016) 
Псауныгъэр къэухъумэгъэныр пшъэрылъ шъхьаI