29

КультурэмкIэ министрэм игуадзэ пшъэрылъхэр къыфигъэнэфагъэх

Адыгеим и ЛIышъхьэу КъумпIыл Мурат Адыгэ Республикэм и Пра­вительствэ зычIэт унэм зэIукIэгъоу тыгъуасэ щызэрищагъэм Адыгэ Республикэм культурэмкIэ иминистрэ игуадзэу агъэнэфэгъэ Кушъу Светланэ нэIуасэ щыфашIыгъ.

КъокIыпIэм щыпсэурэ лъэпкъ­хэм я Къэралыгъо музей Темыр-КавказымкIэ икъутамэ ипа­щэу агъэнэфэгъэ ШъэуапцIэкъо Аминэт ары тапэкIэ мы IэнатIэм Iутыгъэр.

Адыгэ Республикэм и Премь­ер-министрэу Геннадий Митрофановыр ары Адыгеим культурэмкIэ иминистрэ игуадзэ икандидатурэ къэзыгъэлъэгъуа­гъэр. ЗэIукIэгъум джащ фэдэу хэлэжьагъэх АР-м и ЛIы­шъхьэрэ АР-м иминистрэхэм я Кабинетрэ я Администрацие ипащэу Владимир Свеженец, республикэм и Премьер-ми­нистрэ игуадзэу Наталья Широковар, Адыгеим культурэмкIэ иминистрэу Аулъэ Юрэ.

Республикэм и ЛIышъхьэ АР-м культурэмкIэ иминистрэ игуадзэ пшъэрылъэу иIэщтхэр къыфигъэнэфагъэх. Культурэм иучреждениехэм яIофшIэн агъэ­лъэшынымкIэ, къалэхэмрэ къуа­джэхэмрэ адэсхэм зэфэдэ твор­ческэ амалхэр яIэнхэмкIэ Iофхэр зэрэлъигъэкIотэнхэ фаем ащ ынаIэ тырыригъэдзагъ, къытыгъ Адыгэ Республикэм и ЛIышъхьэ ипресс-къулыкъу.

«Культурэм изегъэушъомб­гъун, Урысыем и Президентэу Владимир Путиным къыгъэу­цугъэ пшъэрылъхэм ягъэцэкIэн лъэшэу тынаIэ атетэгъэты. Лъэпкъ проектэу «Культура» зыфиIорэм къыдыхэлъытагъэу псэуалъэхэр тэгъэцэкIэжьых, республикэм ипсэупIэ зэфэ­шъхьафхэм культурэм иучреж­дениехэр ащытэгъэпсых. Отраслэр мылъкукIи, техникэкIи нахь зэтегъэпсыхьэгъэным Iоф дэтэшIэ. Шъо пшъэрылъэу шъуи­Iэр организацие пэпчъ шIуагъэ къытэу иIофшIэн зэхищэнымкIэ амал ежъугъэгъотыныр ары. Ахэр цIыф кIуапIэхэу щытынхэ фае. Ащ пае цIыфхэр кIэщакIо зыфэхъурэ Iофтхьабзэхэм адегъэштэгъэным, зэчый зиIэхэр къыхэгъэщыгъэнхэм, кад­рэхэм ягъэхьазырын икъоу дэ­лэжьэгъэным мэхьанэшхо яI», — къыIуагъ КъумпIыл Мурат.

Адыгеим культурэмкIэ иминистрэ республикэм и ЛIышъхьэ зэрэфэразэр риIуагъ отраслэм ынаIэ къызэрэтетым, Iофыгъошхохэм язэшIохынкIэ IэпыIэгъу къазэрафэхъурэм афэшI. Аулъэ Юрэ къызэрэхигъэщыгъэмкIэ, министрэм игуадзэ культурэ учреждениехэм, тхылъеджапIэхэм Iоф зэрашIэрэм гъунэ лъифыщт, лъэпкъ IэшIагъэхэм зягъэушъомбгъугъэным, IэкIыб къэралыгъохэм ащыпсэурэ ти­лъэпкъэгъухэм гъусэныгъэу ады­ряIэр гъэпытэгъэным ынаIэ тыригъэтыщт.

Адыгэ Республикэм культу­рэмкIэ иминистрэ игуадзэу агъэ­нэфагъэм цыхьэ къызэрэфашIыгъэм фэшI тхьашъуегъэ­псэу ариIуагъ. Кушъу Светланэ къызэриIуагъэмкIэ, культурэм ыпашъхьэ ит пшъэрылъхэм ягъэцэкIэнкIэ шIэныгъэу, опытэу, амалэу иIэр зышъхьамысыжьэу ыгъэфедэщт, 

Кушъу Светланэ Азмэт ­ыпхъур 1968-рэ илъэсым мэ­къуогъум и 12-м къуаджэу Пэнэжьыкъуае къыщыхъугъ. АКъУ-р 1989-рэ илъэсым къыу­хыгъ, сэнэхьатэу «Музыка» зыфиIорэр ыIэ къыригъэхьагъ. КIэлэцIыкIухэмрэ ныбжьыкIэ­хэмрэ ятворчествэ зызыщы­ра­гъэушъомбгъурэ Гупчэм ифольклор ансамблэ ипащэу IофшIэныр ригъэжьагъ. Аужырэ илъэс 25-м звукорежиссерэу Iоф ышIагъ, Къэралыгъо телера­дио­компаниеу «Адыгеим» тематическэ къэтынхэмкIэ иредакцие икъэтынхэр зэрищагъэх. Адыгэ Республикэм изаслуженнэ журналист, искусствэм ылъэныкъо­кIэ Къэралыгъо шIухьафтыныр, журналистикэм ылъэныкъокIэ АР-м и ЛIышъхьэ ишIухьафтын къыфагъэшъошагъэх.

 

Оставить комментарий (0)
Загрузка...

Топ 5 читаемых

Самое интересное в регионах