Къуаджэу Блащэпсынэ щыщ кIэлэ Iэтахъоу илъэс 15 зыныбжь Къулэ Амир лIыхъужъныгъэу зэрихьагъэм пае Урысые общественнэ-къэралыгъо акциеу «Горячее сердце» зыфиIорэм ибгъэхалъхьэу къыфагъэшъошагъэр Адыгэ Республикэм и ЛIышъхьэу КъумпIыл Мурат мэфэкI шIыкIэм тетэу тыгъуасэ къыритыжьыгъ. Iофтхьабзэм хэлэжьагъэх АР-м гъэсэныгъэмрэ шIэныгъэмрэкIэ иминистрэу КIэрэщэ Анзаур, Кощхьэблэ районым ипащэу Хьамырзэкъо Заур, кIэлэ ныбжьыкIэм ят, икIэлэегъадж, нэмыкIхэри.
— БлэкIыгъэ илъэсым, мэлылъфэгъум и 13-м, пчыхьэм сыхьатыр 10-м адэжь спортымкIэ секцием сыкъикIыжьзэ, гъунэгъу щагум зыгорэ къызэрэщышIэтыгъэм гу лъыстагъ, — къеIуатэ Амир. — Апэ мэхьанэ естыгъэп, ау нэужым джыри зэ нахь тэрэзэу сеплъыжьын гухэлъ сиIэу къэзгъэзэжьыгъ. КъызэрэчIэкIыгъэмкIэ, унэм машIо къыкIэнагъэу стыщтыгъэ.
КъыщышIын ылъэкIыщтым Амир егупшысагъэп. НэгъэупIэпIэгъум къэлапчъэу егъэтыгъэм шъхьапырыпкIыгъ, псынкIэу унэм илъэдагъ. Зыныбжь хэкIотэгъэ лIыжъэу чъыещтыгъэр къыгъэущыгъ ыкIи унэм къырищыгъ, ау мыщ дэжьым ышIагъэр ригъэкъугъэу кIэлэ ныбжьыкIэм ылъытагъэп. МашIоу зыкъэзыштэнэу ежьагъэр изакъоу ыгъэкIосэнэу фежьагъ.
Нэужым пчъэ-шъхьангъупчъэхэр Амир Iуихыгъэх ыкIи гъунэгъу лIыжъым зыфэсакъыжьынэу риIуагъ. ГумэкIыгъо зэрэщымыIэжьыр инэрылъэгъу зэхъум, лIыхъужъ ныбжьыкIэр ядэжь кIожьыгъэ. Къыхэзгъэщы сшIоигъу Амир лIыблэнагъэу зэрихьагъэм рыпагэу урамым зэрэтемытыгъэр. IэпыIэгъу зыфэхъугъэм къэбарыр къымыIотэгъагъэмэ, хъугъэ-шIагъэр цIыфхэм алъыIэсыщтыгъэп.
Адыгэ Республикэм и ЛIышъхьэ кIэлэеджакIом ыныбжь емылъытыгъэу лIыхъужъныгъэу зэрихьагъэм пае зэрэфэразэр къыIуагъ ыкIи социальнэ-культурнэ гукъэкIыкIэхэмкIэ Фондым ыгъэнэфэгъэ бгъэхалъхьэу «Горячее сердце» зыфиIорэр къыритыгъ. Фондым ипащэу Светлана Медведевам ыцIэкIэ дипломи Амир къыфагъэшъошагъ. ЛIыблэнагъэу къыхэфагъэм пае кIэлэ ныбжьыкIэм ошIэ-дэмышIэ IофхэмкIэ Министерствэм имедаль, Урысые граждан-патриотическэ проектэу «Дети-герои» зыфиIорэм и щытхъу тхылъ ыпэкIэ къыратыгъагъэх.
— Къылэжьыгъэ тын лъапIэмкIэ сыгу къыздеIэу Амир сыфэгушIо. УищыIэныгъэ уемыблэжьэу нэмыкI цIыф IэпыIэгъу уфэхъугъ. Ащ лIыблэнагъэ зэрэпхэлъыр къеушыхьаты. Уилэгъухэм уизекIуакIэ щысэ афэхъунэу сыщэгугъы. ТапэкIи лIыхъужъныгъэу пхэлъым зэребгъэхъущтым, уигъэхъагъэхэм къызэращымыкIэщтым сицыхьэ телъ, — къыIуагъ КъумпIыл Мурат.
ШIухьафтын лъапIэ ыкIи Урысые кIэлэцIыкIу гупчэу «Орленок» зыфиIорэм кIонэу фитыныгъэ къезытырэ сертификатрэ нэужым республикэм ипащэ Къулэ Амир ритыгъэх. Мыщ фэдэу республикэр зэрыгушхон ылъэкIыщт сабыйхэр зыгъасэхэрэ ны-тыхэм, кIэлэегъаджэхэм КъумпIыл Мурат зэрафэразэр игущыIэ къыщыхигъэщыгъ.
Амир ятэу Къулэ Ибрахьимэ зэхэсыгъом къыщыгущыIагъ, республикэм ипащэ мы Iофыгъом мэхьанэ ин зэрэритыгъэмкIэ зэрэфэразэр къыIуагъ.
Гузэжъогъу чIыпIэ ифэгъэ цIыфхэм IэпыIэгъу афэхъуныр къыпэблагъэу зылъытэгъэ Амир ошIэ-дэмышIэ IофхэмкIэ Министерствэм Iоф щишIэн гухэлъ пытэ зэрэзыфигъэуцужьыгъэр Iофтхьабзэм къыщаIуагъ. Сэнэхьатэу зыфаер псынкIэп, ау ар зэрифэшъуашэу зэригъэцэкIэщтыр Къулэ Амир къыушыхьатыгъ.
ОсэшIу Адыгеим къыфишIыгъ 
Предпринимательствэм IэпыIэгъу фэхъугъэным фытегъэпсыхьагъ 
Зыгъэпсэфыгъо кампаниер рагъэжьагъ 
АР-м и ЛIышъхьэ УФ-м и Къэралыгъо Совет иигъэкIотыгъэ зэхэсыгъо хэлэжьагъ 
ЦIыфхэмкIэ мэхьанэшхо яI