Адыгеим и ЛIышъхьэу КъумпIыл Мурат тхьамэтагъор дызэрихьэзэ зэIукIэу кIуагъэм зыщытегущыIагъэхэр республикэм имедицинэ организациехэм кадрэхэр зэрафимыкъухэрэр щыгъэзыегъэным пае врачхэмрэ гурыт медицинэ IофышIэхэмрэ ягъэхьазырын иIофыгъохэр ары.
Мы Iофтхьабзэр Ситуационнэ гупчэм щыкIуагъ, ащ хэлэжьагъэх Адыгэ Республикэм и Премьер-министрэ ипшъэрылъхэр зыгъэцакIэу КIэрэщэ Анзаур, Адыгэ Республикэм псауныгъэм икъэухъумэнкIэ министрэу Мэрэтыкъо Рустем, гъэсэныгъэмрэ шIэныгъэмрэкIэ министрэм игуадзэу Журавель Артем, Адыгэ Республикэм и ЛIышъхьэрэ Адыгэ Республикэм иминистрэхэм я Кабинетрэ я Администрацие ипащэ игуадзэу Хъоткъо Саниет, Мыекъопэ къэралыгъо технологическэ институтым иректорэу Къуижъ Саидэ, Мыекъопэ медицинэ колледжым ипащэу Самоквитов Алексей.
Адыгэ Республикэм псауныгъэм икъэухъумэнкIэ иминистрэу Мэрэтыкъо Рустем республикэм медицинэм ылъэныкъокIэ кадрэхэм япхыгъэу иIофхэм язытет къытегущыIагъ. Адыгеим икъэралыгъо медицинэ организациехэм врач мин 1,5-м ехъумэ ыкIи гурыт медицинэ IофышIэ мини 4 фэдизмэ Iоф щашIэ. Ау джыри врачи 180-рэ, медицинэ сестра 300-м ехъу ящыкIагъ.
Мы лъэныкъомкIэ Iофхэр гъэтэрэзыгъэнхэм пае Iофтхьэбзэ гъэнэфагъэхэр зэшIуахых. ГущыIэм пае, 2022 — 2023-рэ илъэс еджэгъум телъытагъэу бюджет чIыпIэ 200 Мыекъопэ медицинэ колледжым къыфыхагъэкIыгъ, ар ыпэрэ илъэсым нахьи 40-кIэ нахьыб. Ахэм япроцент 70-р республикэм Iоф щызышIэн фаеу хъущтхэр ары.
МКъТУ-м иректорэу Къуижъ Саидэ къызэрэхигъэщыгъэмкIэ, гурыт сэнэхьат гъэсэныгъэм ипрограммэхэмкIэ студентхэу агъэхьазырыщтхэр 2023-рэ илъэсым къыщегъэжьагъэу МКъТУ-м и Медицинэ институт ыштэхэу ригъэжьэщт.
Джащ фэдэу еджэныр къаухымэ республикэм къинэщтхэм ягъэхьазырын лъагъэкIотэщт. Илъэсэу икIыгъэм икIэуххэм нафэ къызэрашIыгъэмкIэ, Адыгеим иеджапIэхэм къачIэкIыгъэ нэбгыри 140-рэ хэгъэгум иапшъэрэ еджапIэхэм ачIэхьагъэх.
Республикэ проектэу «Псауныгъэм икъэухъумэнкIэ медицинэ организациехэм кадрэхэр афэгъэхьазырыгъэнхэр», джащ фэдэу «Псауныгъэм игъэпытэн» зыфиIорэ лъэпкъ проектым ателъытагъэу IофышIэхэр агъэхьазырыщтых. Программэхэу «Къоджэ доктор» ыкIи «Къоджэ фельдшер» зыфиIохэрэм АдыгеимкIэ врач 454-рэ ыкIи фельдшер 64-рэ ахэлэжьагъ.
«Мы аужырэ илъэсхэм псауныгъэм икъэухъумэн гъэкIэжьыгъэным тегъэпсыхьагъэу республикэм IофшIэныбэ щызэшIуахыгъ. Сымэджэщ, поликлиникэ, ФАП пшIы пчъагъэ ашIыгъ ыкIи агъэцэкIэжьыгъ, джырэ уахътэм диштэрэ медицинэ оборудованиер ачIагъэуцуагъ. ДжырэкIэ мэхьанэ зиIэр а пстэури цIыфхэм афэгъэлэжьэгъэныр, игъом медицинэ IэпыIэгъу тэрэз ахэм ягъэгъотыгъэныр ары. Джащ къыхэкIэу медицинэм иIофышIэхэм ягъэхьазырын апэрэ чIыпIэм итэгъэуцо. Врачхэм, фельдшерхэм, медицинэ сестрахэм шIэныгъэ-гъэсэныгъэ зызэрагъэгъотырэ нэужым республикэм къагъэзэжьыным нахь тынаIэ тедгъэтыщт. Ащ дакIоу Мыекъопэ медицинэ колледжым ихэхъоныгъэ иIофыгъохэм нахь ягупшысэнхэ фае, сыда пIомэ а зыр ары гурыт медицинэ IофышIэхэр къэзыгъэхьазырхэрэр. ШIэныгъэ дэгъу студентхэм арагъэгъотыным пае ар шэпхъэ инхэм атетэу зэтегъэпсыхьэгъэн фае», — къыIуагъ Адыгеим и ЛIышъхьэ.
