Адыгеим и ЛIышъхьэу КъумпIыл Мурат цифрэ платформэу «Битрикс 24» зыфиIорэр зэрагъэфедэрэм Мыекъопэ районым иадминистрацие нэIуасэ зыщыфишIыгъ.
Мыекъопэ районым ипащэу Олег Топоровым зэрэхигъэунэфыкIыгъэмкIэ, мыгъэ агъэцакIэу рагъэжьэгъэ проектым проект IофшIэным изэхэщэн нахь къафигъэпсынкIагъ. Непэрэ мафэм ехъулIэу муниципальнэ образованием проект 25-мэ Iоф адешIэ.
Корпоративнэ порталым администрацием иIофышIэхэм яхьылIэгъэ къэбархэр, документыкIэхэр итых. Платформэр загъэфедэрэм къыщыублагъэу пшъэрылъ мини 8,2-м ехъу къагъэуцугъагъ, ахэм ащыщэу мини 5,5-р зэшIуахыгъах, адрэхэм Iоф адашIэ.
Нэбгырэ 380-рэ фэдиз системэм щатхыгъ. Ахэм ахэхьэх администрацием, бюджет, къэралыгъо учреждениехэм яIофышIэхэр, народнэ депутатхэм я Совет идепутатхэр, къоджэ псэупIэхэм яадминистрациехэм япащэхэр.
Республикэм и ЛIышъхьэ Iофтхьабзэм хэлажьэхэрэм зэрариIуагъэмкIэ, цифрэ системэм предпринимательхэу районым исхэм яIофшIэн нахь чанэу зэхащэнэу, бизнес цIыкIум къэралыгъо IэпыIэгъу щягъэгъотыгъэнэу, къоджэ псэупIэхэм япащэхэр ащ фэдэ Iофхэм ахэщэгъэнхэу амал къеты.
Республикэм ипащэ къэбар жъугъэм иамалхэм яIофышIэхэм адыриIэгъэ зэдэгущыIэгъум зэрэщыхигъэунэфыкIыгъэмкIэ, цифрэ технологиехэм непэ социальнэ-экономикэ хэхъоныгъэмкIэ амалышхохэр къатых.
«Хэбзэ къулыкъухэр, чIыпIэхэм яструктурнэ подразделениехэр цифровизацие шIыгъэнхэмкIэ пшъэрылъ гъэнэфагъэхэр непэ Адыгеим щызэшIуахых. Ащ ишIуагъэкIэ унашъохэр нахь псынкIэу аштэн алъэкIы, дисциплинэри нахь пытэ мэхъу. Мыекъопэ районым ищысэкIэ цифрэ платформэм шIуагъэу къытырэр тинэрылъэгъу. НэмыкI муниципалитетхэми а опытыр къафэфедэнэу сэгугъэ. Цифрэ технологиехэм ягъэфедэн нахь зедгъэушъомбгъущт, цифровизацием епхыгъэ Iофыгъо пстэуми икъоу тынаIэ атедгъэтыщт», — къыIуагъ КъумпIыл Мурат.
