Примерное время чтения: 2 минуты
129

Пшъэрылъхэр агъэнэфагъэх

Адыгэ Республикэм и ЛIышъхьэу ТхьакIущынэ Аслъан бзэджашIэхэм пшъэдэкIыжь ягъэхьыгъэнымкIэ федеральнэ къулыкъум и ГъэIорышIапIэу АР-м щыIэм ипэщагъэу, пенсием зэрэкIуагъэм къыхэкIыкIэ иIэнатIэ IукIыжьыгъэ Сергей Клюй тыгъуасэ IукIагъ. Мы къулыкъум ипащэ ипшъэрылъхэр ыгъэцэкIэнхэу агъэнэфагъ ФСИН-м и ГъэIорышIапIэу Краснодар краим щыIэм ипащэ иапэрэ гуадзэу щытыгъэ Александр Просвериныр.

ПшъэдэкIыжьышхо зыхьырэ, краимрэ республикэмрэ яуголовнэ-гъэцэкIэкIо системэхэр зэрэзэдэлэжьэнхэ алъэкIыщт лъэныкъохэм хэшIыкIышхо афызиIэ цIыфэу А. Просвериныр зэрэщытыр къыIуагъ Сергей Клюй. Джащ фэдэу ежь ипшъэрылъхэр егъэцэкIэфэ зэшIуахын алъэкIыгъэм, гухэлъэу щыIэхэм республикэм ипащэ ащигъэгъозагъ.

ФСИН-м и ГъэIорышIапIэу Адыгеим щыIэм хэхьэрэ учреждении 6-р тапэкIи зэтегъэпсыхьэгъэнхэм, хьапсым дэс цIыфхэм яфэIо-фашIэхэр зэрифэшъуашэу зэшIохыгъэнхэм пэщакIэм ынаIэ тыригъэтын фаеу ылъытагъ.

Александр Просвериныр Ставрополь краим ит къалэу Железноводскэ 1978-рэ илъэсым къыщыхъугъ, апшъэрэ гъэсэныгъитIу иI. Уголовнэ-гъэцэкIэкIо системэм иорганхэм 2000-рэ илъэсым къыщыублагъэу ахэт. АР-м и ЛIышъхьэ пэщакIэу агъэнэфагъэм фэгушIуагъ.

Зипшъэрылъхэр щытхъу хэлъэу зыгъэцэкIэгъэ, республикэм игъэцэкIэкIо хэбзэ къулыкъухэм агурыIоу Iоф адэзышIэгъэ Сергей Клюй зэрэфэразэр риIуагъ ыкIи шIэжь медалэу «Адыгэ Республикэм ыныбжь илъэс 25-рэ хъугъэ» зыфиIорэр фигъэшъошагъ.

— Къулыкъум и ГъэIорышIапIэу Адыгеим щыIэм мы аужырэ уахътэм зэхъокIыныгъэшIухэр щыкIуагъэх: ведомствэм епхыгъэ учреждениехэм яматериальнэ-техническэ базэ нахьышIу хъугъэ, колониехэм къащадагъэкIырэ продукцием ипчъагъэ хэхъуагъ. Ащ ишIуагъэкIэ, къэгъэлъэгъонэу иIэхэмкIэ Урысыем аужырэ чIыпIэхэр щызыубытыщтыгъэ ГъэIорышIапIэр я 18-м нэс къыдэкIоен ылъэкIыгъ, ар гъэхъэгъэшIоу плъытэ хъущт, — къыIуагъ ТхьакIущынэ Аслъан.

АР-м и ЛIышъхьэ къызэрэхигъэщыгъэмкIэ, къулыкъум амалэу, лъэкIэу иIэхэр мыщ къыщыуцухэрэп, хэхъоныгъэр ышIынхэмкIэ джыри IэпэчIэгъанэхэр иI. АщкIэ ГъэIорышIапIэм ипащэу агъэнэфагъэм бэкIэ зэрэщыгугъырэр риIуагъ. Республикэм иуголовнэ-гъэцэкIэкIо системэ хэхъоныгъэхэр ышIынхэм Iоф зэрэдишIэщтыр, цыхьэу къыфашIыгъэр къыгъэшъыпкъэжьыным зэрэпылъыщтыр къыIуагъ А. Просвериным.

АР-м и ЛIышъхьэ и пресс-къулыкъу.

Смотрите также:

Оцените материал
Оставить комментарий (0)

Также вам может быть интересно

Топ 5 читаемых

Самое интересное в регионах