Адыгеим и ЛIышъхьэу КъумпIыл Мурат ныбжьыкIэхэр дзэ къулыкъум щэгъэнхэм епхыгъэ IофыгъохэмкIэ пэIудзыгъэ шIыкIэм тетэу муниципальнэ образованиехэм япащэхэм тыгъуасэ зэхэсыгъо адыриIагъ.
Iофтхьабзэм хэлэжьагъэх Адыгеим и Къэралыгъо Совет – Хасэм и Тхьаматэу Владимир Нарожнэр, АР-м и Премьер-министрэу Геннадий Митрофановыр, УФ-м и Президент и Полномочнэ лIыкIоу ЮФО-м щыIэм иаппарат АР-мкIэ ифедеральнэ инспектор шъхьаIэу Сергей Дрокиныр, АР-м ипрокуратурэ, и МВД, идзэ комиссариат япащэхэр.
Зэхэсыгъор аублэным ыпэкIэ Адыгеим и ЛIышъхьэ УФ-м зыухъумэжьынымкIэ иминистрэу Сергей Шойгу ыцIэкIэ АР-м идзэ комиссарэу Александр Авериным щытхъу тхылъыр къыритыжьыгъ. ЕтIанэ КъумпIыл Мурат ведомствэм ипащэхэми, инэмыкI IофышIэхэми, иветеранхэми афэгушIуагъ дзэ комиссариатхэм яIофышIэ и Мафэ фэшI.
Республикэм и ЛIышъхьэ зэхэсыгъом къызэрэщыхигъэщыгъэмкIэ, гъэрекIо бжыхьэ ныбжьыкIэхэр дзэм зэращагъэм кIэухэу фэхъугъэм къытегущыIэзэ, дзэ къулыкъур зыхьынэу фэмыехэр зэрэщыIэхэм епхыгъэ Iофыгъохэр къызэраIэтыгъагъэхэми ягугъу къышIыгъ.
«Комиссиехэм ахэт пстэуми, тхьаматэхэм къащегъэжьагъэу, зэкIэми япшъэрылъхэр еIолIэнчъэу агъэцэкIэн фае. НыбжьыкIэхэу дзэм къулыкъу щызыхьы зышIомыигъохэм язекIуакIэ къыкIэкIон ылъэкIыщтыр къагурыIон фае. Дзэ къулыкъур амыхьынымкIэ хабзэм къыдилъытэрэ лъапсэхэр щымыIэхэ зыхъукIэ ар хэбзэукъоныгъэу зэрэщытыр къагурыIон фае», - къыIуагъ КъумпIыл Мурат.
Зэхэсыгъом къыщыгущыIагъэх республикэм идзэ комиссарэу Александр Авериныр, АР-м и МВД иполицие ипащэ игуадзэу Андрей Федосеевыр, муниципальнэ образование заулэмэ япащэхэр.
Республикэм и ЛIышъхьэ зэрэхигъэунэфыкIыгъэмкIэ, пшъэрылъэу яIэхэм язэшIохынкIэ дзэ комиссариатхэм, хэбзэухъумэкIо къулыкъухэм, муниципалитетхэм зэдэлэжьэныгъэу зэдыряIэр агъэлъэшын фае. КъумпIыл Мурат къалэхэмрэ районхэмрэ япащэхэм пшъэрылъ къафишIыгъ дзэм идэщын епхыгъэ Iофыгъохэр планернэ зэхэсыгъохэм къащахалъхьанхэу, ныбжьыкIэхэр призывной комиссиехэм къызэрякIуалIэрэм анаIэ тырагъэтынэу.
Зэхэсыгъом икIэух АР-м идзэ комиссарэу Александр Авериным къызэрэщиIуагъэмкIэ, мобилизационнэ ухьазырыныгъэмкIэ гъэрекIо УФ-м ишъолъырхэм азыфагу щызэхащэгъэ зэнэкъокъум Адыгеим ЮФО-м ишъолъырхэмкIэ апэрэ чIыпIэр щиубытыгъ. Республикэм мы лъэныкъомкIэ гъэхъагъэу иIэхэм афэшI Урысыем я 3-рэ чIыпIэр щиубытыгъ. Ащ фэдэ чIыпIэр ащ къызэрэтефэрэр къэгъэшъыпкъэжьыгъэным пае мэлылъфэгъум и 15-м къыщегъэжьагъэу и 18-м нэс УФ-м и Генеральнэ штабрэ программэ хэушъхьафыкIыгъэхэмкIэ ГъэIорышIэпIэ шъхьаIэу УФ-м и Президент дэжь щызэхэщагъэмрэ якомиссие республикэм уплъэкIунхэр щызэхищэщтых.
Адыгеим и ЛIышъхьэ ащ епхыгъэу муниципальнэ образованиехэм япащэхэм мобилизационнэ ухьазырыныгъэм епхыгъэ уплъэкIунхэм зафэгъэхьазырыгъэнымкIэ пшъэрылъ гъэнэфагъэхэр афишIыгъэх, къытыгъ Адыгэ Республикэм и ЛIышъхьэ ипресс-къулыкъу.