Адыгеим и ЛIышъхьэу КъумпIыл Мурат Мыекъопэ псырыкIуапIэм изы Iахь игъэпсын заухыщтым, псыубытыпIэм псы макIэу зэритым къыхэкIэу цIыфхэм псы зэраIэкIагъэхьащтым япхыгъэ IофыгъохэмкIэ зэхэсыгъор тыгъуасэ зэрищагъ.
Ащ хэлэжьагъэх Адыгэ Республикэм и Премьер-министрэу Геннадий Митрофановыр, Адыгэ Республикэм и Прокурорэу Игорь Шевченкэр, Адыгэ Республикэм и Премьер-министрэ игуадзэу Сапый Вячеслав, Адыгэ Республикэм псэолъэшIынымкIэ, транспортымкIэ, унэ-коммунальнэ, гъогу хъызмэтхэмкIэ и Министерствэ ипащэу Валерий Картамышевыр, Роспотребнадзорым Адыгэ РеспубликэмкIэ ипащэу Сергей Завгороднер, Мыекъуапэ имэрэу Андрей Гетмановыр, Мыекъопэ районым ипащэу Олег Топоровыр, муниципальнэ унитарнэ хъызмэтшIапIэу «Майкопводоканалым» ипащэу Апэжьыхьэ СултIан.
Мыекъопэ псырыкIуапIэм иIахьыкIэ ишIын зэрэкIорэр Адыгеим и ЛIышъхьэ зэхэсыгъом къыщыфаIотагъ. Мы проектыр игъом гъэцэкIэгъэным мэхьанэшхо зэриIэр, чIыопсым изытет емылъытыгъэу зэпыу имыIэу ащ цIыфхэм псыр зэраIэкIигъэхьащтыр КъумпIыл Мурат къыхигъэщыгъ.
Анахьэу Iофхэр къызызэIыхьэхэрэр кIымафэрэ ары. Къушъхьэ псыхъохэм псэу арытыр нахь макIэ зыхъукIэ, Мыекъуапэрэ Мыекъопэ районымрэ адэсхэм псыр дэеу къаIэкIахьэ. Джыдэдэми Iофхэм язытет джащ ехьыщыр. «Майкопводоканалым» ипащэу Апэжьыхьэ СултIан къызэриIуагъэмкIэ, мыгъэ зэрэогъугъэм къыхэкIэу псыубытыпIэхэм псэу арытыр къеIыхыгъ.
Къушъхьэхэм ащыIэ псыубытыпIэхэми, артезиан псыкъычIэщыпIэхэми акIуачIэ изэу Iоф зэрашIэзи псыIыгъыпIэхэм джыдэдэм чэщым псэу арыхъорэр макIэ. ЧIыопсым изытет епхыгъэу цIыфхэм псыр аIэкIэгъэхьагъэнымкIэ Мыекъуапэрэ Мыекъопэ районымрэ шэпхъэ гъэнэфагъэхэм атехьагъэх.
Зэхэсыгъом къызэрэщаIуагъэмкIэ, псыр аубытыпэщтэп, ау сыхьат пчъагъэу ар къызэратыщтыгъэм къыщагъэкIэщт. Пчэдыжьым сыхьатыр 7-м къыщегъэжьагъэу 9-м нэс ыкIи пчыхьэм сыхьатыр 7-м къыщегъэжьагъэу 9-м нэс ар икъоу къатыщт.
Адыгеим и ЛIышъхьэ авариехэр къэмыхъунхэмкIэ амалхэр зэрахьанэу пшъэрылъ афишIыгъ. Ащ Мыекъопэ районым иадминистрациерэ Мыекъуапэ имэриерэ афигъэпытагъ шэпхъакIэхэм зыкIатехьагъэхэр цIыфхэм агурагъэIонэу, зищыкIагъэхэм псы афащэнэу. Къалэмрэ Мыекъопэ районымрэ япсэупIэхэм адэсхэм ялъэIукIэ зищыкIагъэхэм псыр афащэщт. Республикэм иIэшъхьэтетхэм социальнэ учреждениехэм псыр икъоу аIэкIэхьаным, санитар-эпидемиологие шапхъэхэр ахэм къащыдалъытэнхэм ренэу анаIэ тырагъэтыщт.
Адыгеим и ЛIышъхьэ Мыекъопэ псырыкIуапIэм ишIын заухыщтым фэгъэхьыгъэу пшъэрылъ заулэ афишIыгъ. Шъугу къэдгъэкIыжьын 2018-рэ илъэсым къыщегъэжьагъэу федеральнэ гупчэр къадеIэзэ проектышхом зэрэдэлажьэхэрэр. IофшIэнхэм азыныкъо нахьыбэр агъэцэкIэгъах. ПсырыкIуапIэм иIахь шъхьаIэ ишIын аухыгъ, поселкэхэу Тульскэмрэ Табачнэмрэ, станицэу Курджипскэм якIолIэрэ псырыкIуапIэхэр агъэпсыгъахэх.
Адыгэ Республикэм псэолъэшIынымкIэ, транспортымкIэ, унэкоммунальнэ, гъогу хъызмэтхэмкIэ и Министерствэ ипащэу Валерий Картамышевым зэхэсыгъом къызэрэщиIуагъэмкIэ, псыхъоу Цыцэ дэжь IофшIэнхэр зы мафэкIэ блэкIыгъэ тхьамафэм щаухыгъэх. ПсырыкIуапIэм ишIын агъэнэфагъэм тетэу макIо. ЧIыопсым изытет къызэIэмыхьэмэ, илъэсыр имыкIызэ проектыр аухынэу рахъухьэ.
ПсырыкIуапIэм километри 125-рэ икIыхьэгъэщт. РыкIопIэ километри 2 джыри агъэпсын фае. ПсэолъэшIхэр псыIыгъыпIитIумэ ягъэпсын шIэхэу фежьэщтых. Ахэм ащыщэу зыр псыхъоу Цыцэ ипсышъхьэ дэжь щашIыщт. Псыхъохэу Пшыхьэрэ Пшыхьашъхьэрэ адэжь псыубытыпIакIэ щагъэпсыщт.
ПстэумкIи псырыкIуапIэм псыубытыпIитф хэтыщт. Джащыгъум псыр зэрафимыкъурэм иIофыгъо зэшIохыгъэ хъущт. Чэщ-зымафэм псы кубометрэ мини 140-рэ фэдиз цIыфхэм къаIэкIэхьащт, джыдэдэм чэщ-зымафэм псы кубометрэ мини 100 анахьыбэ дэдэмкIи ахэм анэсырэр.
«Стратегическэ мэхьанэ зиIэ мы псэуалъэр загъэпсыкIэ, цIыфхэм икъоу псыр зэраIэкIэмыхьэщтыгъэм иIофыгъо зэшIохыгъэ хъущт. ПсырыкIуапIэм иIахьыкIэ ишIын заухыкIэ, Мыекъуапи Мыекъопэ районми ащы-псэухэрэм къушъхьэпс къабзэр икъоу къаIэкIэхьащт. ЦIыфхэм ящыкIэгъэ дэдэу щыт псэуалъэр агъэнэфэгъэ пIалъэм гъэпсыгъэнымкIэ афэлъэкIыщтыр зэкIэ непэ ашIэн фае», — хигъэунэфыкIыгъ КъумпIыл Мурат.
