Примерное время чтения: меньше минуты
67

Шэмбэт шIыхьафым хэлэжьагъэх

Урысые экологие Iофтхьабзэу «Зеленая Россия-2021» зыфиIорэм къыдыхэлъытэгъэ шIыхьафыр чъэпыогъум и 2-м Мыекъуапэ щыкIуагъ.

Къалэм иукъэбзын тегъэпсыхьэгъэ Iофтхьабзэм хэлэжьагъэх Адыгэ Республикэм иминистрэхэм я Кабинет, Адыгэ Республикэм и Къэралыгъо Совет – Хасэм, хабзэм иреспубликэ, имуниципальнэ къулыкъухэм яIофышIэхэр, лэжьэкIо коллективхэм ялIыкIохэр.

Республикэм и ЛIышъхьэу КъумпIыл Мурат ведомствэ зэфэшъхьафхэм афэгъэзэгъэ чIыпIэхэу укъэбзыгъэн фаехэм ащыIагъ, «Мэздахэм» идэкIояпIэ дэжь чъыгае щигъэтIысхьагъ.

Къэбар жъугъэм иамалхэм яжурналистхэм адэгущыIэзэ, ныбжьыкIэхэр чIыопсым фэсакъхэу пIугъэнхэм, псэупIэхэм къэбзэныгъэ адэлъыным мэхьанэшхо зэряIэр республикэм ипащэ хигъэунэфыкIыгъ.

«Мыщ фэдэ Iофтхьабзэхэр анахьэу зыфытегъэпсыхьагъэхэр цIыфхэр яунэ, яурам, якъуаджэ е якъалэ фэсакъхэу гъэсэгъэнхэр ары. Мыщ фэдэ шIыхьафхэм ахэлажьэхэрэм зыщимыщыкIэгъэ чIыпIэм хэкIыр ыужкIэ зэрэщырамыдзыжьыщтым сицыхьэ телъ. Нахьыжъхэм ямызакъоу, ныбжьыкIэхэри ахэм ахагъэлэжьэнхэм мэхьанэшхо иI», — къыIуагъ КъумпIыл Мурат.

Хэбзэ къулыкъухэм, предприятиехэм яIофышIэхэр, псэупIэхэм адэсхэр зыхэлэжьэгъэхэ ащ фэдэ шIыхьафхэр а мафэм муниципальнэ псэупIэ пстэуми ащыкIуагъэх. Саугъэтхэр, щагухэр, общественнэ чIыпIэхэр, зыгъэпсэфыпIэхэр, паркхэр аукъэбзыгъэх, яшIылIапхъэхэр арашIылIагъэх.

Оцените материал
Оставить комментарий (0)

Топ 5 читаемых

Самое интересное в регионах