Коронавирусым илъэхъан цIыфхэм IэпыIэгъу афэхъугъэным фытегъэпсыхьэгъэ IофшIэныр Адыгеим щылъагъэкIуатэ. Партиеу «Единэ Россием» ишъолъыр къутамэ и Секретарэу, Адыгэ Республикэм и ЛIышъхьэу КъумпIыл Мурат ипшъэрылъкIэ щыIэныгъэм чIыпIэ къин ригъэуцуагъэхэм гъомылапхъэхэр зэрылъ Iалъмэкъхэр афащэх.
Общественнэ организациехэм ыкIи бизнес-сообществэм зэпхыныгъэ адыряIэу единороссхэр IэпыIэгъу тедзэ зищыкIагъэхэм алъэIэсых, Iофхэм язытет зыфэдэм ренэу лъэплъэх. ГущыIэм пае, сэкъатныгъэ зиIэ сабыйхэм янэ-ятэхэм я Урысые организацие ишъолъыр къутамэ предложениеу къыхьыгъэм диштэу гъомылэпхъэ Iалъмэкъ миным ехъу агъэхьазырыгъ. КIэлэцIыкIу IыгъыпIэм кIохэу, ау зэпахырэ узым ыпкъ къикIыкIэ непэ унэм исхэ сэкъатныгъэ зиIэ сабыйхэм ахэр атырагощэщтых. Iалъмэкъхэр муниципалитетхэм аIукIагъэх, зытефэхэрэм аратынхэу щыт.
Мэлылъфэгъум щыублагъэу республикэм мыщ фэдэ шIушIэ Iофтхьабзэхэр щызэхащэх. Мы уахътэм къыкIоцI гъомылэпхъэ Iалъмэкъ мин 52-рэ фэдиз агъэхьазырыгъ ыкIи атырагощагъэх.
«Iофхэм язытет зэпымыоу талъэплъэ, чIыпIэ къин ифэгъэ цIыфхэм талъыIэсыным, IэпыIэгъу тафэхъуным тынаIэ тет. Мыщ фэдэ пшъэрылъ муниципалитетхэм япащэхэми афэзгъэуцугъ. Мы лъэныкъомкIэ яшIогъэшхо къагъакIо бизнесым хэщагъэхэм ыкIи волонтерхэм. ШIушIэ Iофтхьабзэм хэщагъэх партиеу «Единэ Россием» хэтхэри. Ахэм ягукъэкIыкIэ врачхэм IэпыIэгъу афэхъух, медикхэм машинэ псынкIэ аратыгъ, сатыушIыпIэ сетеу «Магнитыр» ягъусэу щай зэрылъ къэмланхэр атырагощагъэх. Джащ фэдэу эпидемием пэшIуекIогъэным партием илIыкIохэм ямылъку пэIуагъахьэ. Непэрэ Iофтхьабзэри шIушIагъэм изы лъэбэкъоу щыт», — къыIуагъ партиеу «Единэ Россием» ишъолъыр къутамэ и Секретарэу, Адыгэ Республикэм и ЛIышъхьэу КъумпIыл Мурат.
