Урысыем и Правительствэ и Тхьаматэу Дмитрий Медведевым федеральнэ къулыкъухэм ягъусэхэу социальнэ-экономикэ хэхъоныгъэмкIэ шъолъыр программэхэм япроектхэр къэзыгъэхьазырыгъэхэ шъолъырхэм япащэхэм тыгъуасэ Москва зэIукIэгъу щадыриIагъ.
Адыгеим ыцIэкIэ зэIукIэгъум хэлэжьагъ республикэм и ЛIышъхьэу КъумпIыл Мурат. Шъолъырхэм хэхъоныгъэ зэрашIыщт программэхэм япроектхэм амалэу ащагъэнэфагъэхэм зэIукIэгъум щатегущыIагъэх.
Пшъэрылъхэм къатегущыIэзэ, Урысыем и Правительствэ и Тхьаматэ шъолъыр программэхэр псынкIэу аухын зэрэфаер хигъэунэфыкIыгъ.
«Программэхэм яшIуагъэ къэкIон фае инфраструктурэм изегъэушъомбгъункIэ, лъэныкъо зэфэшъхьафхэм инвестиционнэ проект анахь дэгъухэр къащыхахынхэмкIэ. Экономикэм, бизнес цIыкIумрэ гурытымрэ хэхъоныгъэ ягъэшIыгъэным, унэхэм ягъэпсын, экологием изытет нахьышIу шIыгъэным, социальнэ Iофыгъохэм язэшIохын ар афэгъэхьыгъ», — къыхигъэщыгъ Дмитрий Медведевым.
Шъолъырхэм IэпыIэгъу зэрафэхъущтхэ лъэныкъо шъхьаIэхэр зэIукIэгъум щагъэнэфагъэх. Шъолъырхэм ащыIэ пащэхэм федеральнэ ведомствэхэм зэпхыныгъэ занкIэ адыряIэным ахэр фэIорышIэщтых.
Шъугу къэтэгъэкIыжьы программэм икъыхэхынкIэ Адыгеим Урысыем мэкъу-мэщымкIэ и Министерствэ, ащ ипащэу Дмитрий Патрушевым — республикэм икураторэу щытым, джащ фэдэу нэмыкI федеральнэ министрэхэм зэдэлэжьэныгъэ зэрадыриIагъэр.
Социальнэ-экономикэ хэхъоныгъэмкIэ шъолъыр программэр зэхагъэуцо зэхъум Адыгеим пае отраслэ шъхьаIэхэм амалэу ащызэрахьащтхэр къыдалъытагъэх. Ахэм цIыфхэм ящыIэкIэ- псэукIэ зыкъырагъэIэтыщт.
Урысые Федерацием экономикэ хэхъоныгъэмкIэ и Министерствэ 2020-рэ илъэсым къыщегъэжьагъэу 2022-рэ илъэсым нэс хэгъэгум социальнэ- экономикэ хэхъоныгъэу ышIыщтым ехьылIэгъэ докладыр Урысые Федерацием и Къэралыгъо Думэ тапэкIэ рихьылIэгъагъ. Адыгэ Республикэр псынкIэу хэхъоныгъэ зышIырэ шъолъыри 10-мэ ахагъэхьэгъагъ.
КъумпIыл Мурат мызэу, мытIоу зэрэхигъэунэфыкIыгъэмкIэ, республикэр анахьэу къызэтезыIажэрэр ыкIи инвестициер нахь макIэу къыхязыгъалъхьэрэр энергиер зэрэфимыкъурэр ары.
«Энергиемрэ газымрэ нахьыбэу къыIэкIахьэхэ, ищыкIэгъэ транспорт инфраструктурэр иIэ зыхъукIэ, промышленностым, мэкъу-мэщым, зекIоным инвесторхэм ямылъку нахьыбэу къахалъхьанымкIэ Адыгэ Республикэм амалышIухэр иIэщтых», — къыхигъэщыгъ Адыгеим и ЛIышъхьэ.
Адыгеим и ЛIышъхьэ федеральнэ форумым хэлэжьагъ 
Урысыем энергетикэмкIэ и Министерствэ щыкIогъэ зэIукIэм хэлэжьагъ 
Пхъэныр Адыгеим зэрэщыкIорэм щигъэгъозагъэх 
Москва щызэдыряIэгъэ зэIукIэгъур 
Мэзхэм якъэухъумэнкIэ Адыгеим Iофэу щашIэрэм осэшIу къыфашIыгъ