Адыгэ Республикэм иминистрэхэм я Кабинет зичэзыу планернэ зэхэсыгъоу тыгъуасэ иIагъэм пэщэныгъэ дызэрихьагъ республикэм и Правительствэ и Тхьаматэу КъумпIыл Муратэ.
Ащ апэрэ Iофыгъоу зэхэсыгъом къыщиIэтыгъэр фэтэрыбэу зэхэт унэхэм яшIын ахъщэ хэзылъхьэгъэ цIыфхэу агъэпцIагъэхэм ягумэкIыгъо изэхэфын ары.
Адыгеим псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтхэмкIэ иминистрэу Валерий Картамышевым къызэриIуагъэмкIэ, Адыгеир пштэмэ, мыщ фэдэу агъэпцIагъэу атхыгъэхэм япчъагъэ нэбгыри 120-рэ мэхъу. Илъэсэу тызхэтым игъэтхапэ ахэм ащыщхэм яIоф хьыкумым зэхифыщт.
Ащ ыуж зэрэзекIощтхэ шIыкIэр, цIыфхэм яфитыныгъэхэр зэтырагъэуцожьынхэмкIэ амалэу щыIэхэр агъэнэфэщтых. ИлъэситIукIэ узэкIэIэбэжьмэ, мыщ фэдэ гумэкIыгъо республикэм зэримыIагъэр, ащ лъапсэу фэхъугъэр гъэунэфыгъэн зэрэфаер КъумпIыл Муратэ къыIуагъ.
Ащ дакIоу псэолъэшIынымкIэ министерствэмрэ гумэкIыгъо зыдэщыIэ муниципалитетхэмрэ япшъэрылъхэр зэрагъэцакIэхэрэр уплъэкIугъэн фаеу ылъытагъ.
ИгъэкIотыгъэ гъэцэкIэжьынхэм апэIухьащт ахъщэу цIыфхэм къаугъоигъэр блэкIыгъэ илъэсым сомэ миллион 57-м кIэхьагъ. Ащ ишIуагъэкIэ, фэтэрыбэу зэхэт унэхэу нахьыбэрэмкIэ къалэу Мыекъуапэрэ Тэхъутэмыкъое районымрэ ащыIэхэр зэтырагъэпсыхьанхэ алъэкIыгъ.
Мы илъэсым зэрагъэнафэрэмкIэ, Адыгеим ит унэ 57-мэ гъэцэкIэжьынхэр арашIылIэщтых, ащ сомэ миллион 77-рэ фэдиз апэIуагъэхьанэу къалъытагъ.
«Мы программэм игъэцэкIэн епхыгъэ IофшIэнхэр зэрэлъыкIуатэхэрэр цIыфхэм янэрылъэгъун фае. Ахэм яахъщэкIэ гъэцэкIэжьынхэр макIох, арышъ, къаугъоигъэ сомэ пэпчъ зыдэкIуагъэр, зыпэIухьагъэр ашIэн фае. ПсэолъэшIхэм япшъэрылъхэр зэрагъэцакIэхэрэм лъыплъэгъэным мыщ дэжьым мэхьанэшхо иI», - къыIуагъ КъумпIыл Муратэ.
АР-м финансхэмкIэ иминистрэу Долэ Долэтбый къызэриIуагъэмкIэ, мэзаем и 20-м ехъулIэу бюджетым мылъкоу къихьагъэр сомэ миллион 556,6-м кIахьэ, гухэлъэу щыIэм ипроцент 91-рэ, блэкIыгъэ илъэсым мыщ фэдэ иуахътэ егъэпшагъэмэ, ипроцент 94-рэ ар мэхъу. Мэзаем къинэгъэ мэфэ заулэр къызфагъэфедэзэ планыр зэрагъэцэкIэщтыр министрэм къыхигъэщыгъ.
Зыгъэпсэфыгъо кампаниер рагъэжьагъ 
ГумэкIыгъохэм апэшIуекIогъэным Адыгеир фэхьазыр 
ЦIыфхэм гухахъо хагъотэнэу 
Орден лъапIэр къыфагъэшъошагъ 
Жьыбгъэм ыкIуачIэ къызыфагъэфедэщт