COVID-19-м зимыушъомбгъунымкIэ Урысыем и Президентэу Владимир Путиным пшъэрылъэу къыгъэуцугъэхэр гъэцэкIэгъэнхэм тегъэпсыхьагъэу Адыгэ Республикэм джыри мылъку тедзэ къыфыхэгъэкIыгъэнэу Урысыем и Правительствэ ыухэсыгъ.
Сомэ миллион 244,3-м ехъурэ бюджет мылъкоу Адыгеим къыIукIэщтыр илъэси 3-м къыщегъэжьагъэу илъэси 7-м нэс зыныбжь кIэлэцIыкIухэм ахъщэ IэпыIэгъоу аратырэм пэIуагъэхьащт. Урысые Федерацием и Президент 2020-рэ илъэсым гъэтхапэм и 20-м ышIыгъэ Указэу N 199-р зытетэу «КIэлэцIыкIухэр зэрыс унагъохэм къэралыгъо IэпыIэгъу ягъэгъотыгъэнымкIэ амал тедзэхэр зехьэгъэнхэм ехьылIагъ» зыфиIорэм ащ фэдэ ахъщэ IэпыIэгъур къыщыдэлъытагъ.
Мы Указыр республикэм зэрэщагъэцакIэрэм Адыгэ Республикэм и ЛIышъхьэу КъумпIыл Мурат лъэшэу гъунэ лъефы. Илъэси 3-м къыщегъэжьагъэу илъэси 7-м нэс зыныбжь кIэлэцIыкIухэм ахъщэ IэпыIэгъу къаратыным зыщыкIэлъэIухэрэ тхылъ пстэуми игъом ахэплъэх.
Адыгэ Республикэм IофшIэнымрэ социальнэ хэхъоныгъэмрэкIэ и Министерствэ къызэритыгъэмкIэ, джыдэдэм кIэлэцIыкIу 16947-мэ ащ фэдэ ахъщэ IэпыIэгъур аIокIэ. Сомэ миллион 896-рэ фэдиз а гухэлъым пэIуагъэхьэгъах. Илъэсыр имыкIызэ мазэ къэс ахъщэ IэпыIэгъу зэратырэр нэбгырэ 18900-м нэсын ылъэкIыщт.
Адыгэ Республикэм и ЛIышъхьэ зэрэхигъэунэфыкIыгъэмкIэ, федеральнэ гупчэмрэ шъолъырхэмрэ зэдэлэжьэныгъэ пытэ зэрэзэдыряIэм ишIуагъэкIэ пандемием илъэхъан социальнэу дэеу ухъумагъэхэм IэпыIэгъу ягъэгъотыгъэнымкIэ хэгъэгум и Президент пшъэрылъэу къыгъэуцугъэхэр дэгъоу гъэцэкIагъэ мэхъух.
Шъугу къэтэгъэкIыжьы: мылъку тедзэ Адыгеим къыфыхэгъэкIыгъэным ехьылIэгъэ унашъор Правительствэм зиштагъэр Адыгеим ыцIэкIэ Къэралыгъо Думэм идепутатэу, партиеу «Единэ Россием» хэтэу Владислав Резник яIэпыIэгъоу Урысые Федерацием и Федеральнэ ЗэIукIэ бюджет мылъкур атегощэгъэнымкIэ икомиссие ащ къызыдырегъэштэ нэуж ары.
Депутатым къызэриIуагъэмкIэ, пандемием зызыщиушъомбгъурэ лъэхъаным ащ фэдэ субсидиехэм яшIуагъэкIэ кIэлэцIыкIухэм атефэрэ ахъщэ IэпыIэгъур Адыгейми, нэмыкI шъолъырхэми икъоу ащаратын алъэкIыщт.
