Медицинэ организациехэм реабилитациемкIэ яотделениехэр нахьышIоу зэтегъэпсыхьэгъэнхэм телъытэгъэ субсидиехэр шъолъырхэм атегощэгъэнэу Урысые Федерацием и Правительствэ ыухэсыгъ. Къэралыгъо программэу «Псауныгъэм икъэухъумэн зегъэушъомбгъугъэныр» зыфиIорэм диштэу мылъкур къыхагъэкIы. А гухэлъым пае Адыгэ Республикэм сомэ миллион 59,373-рэ къыфатIупщыгъ. У
рысые Федерацием и Правительствэ а унашъор зиштагъэр Урысые Федерацием и Федеральнэ ЗэIукIэ бюджет мылъкур атегощэгъэнымкIэ икомиссие ащ къызыдырегъэштэ нэуж ары. Къэралыгъо Думэм бюджетымрэ хэбзэIахьхэмрэкIэ и Комитет хэтэу, АР-м ыцIэкIэ Къэралыгъо Думэм идепутатэу Владислав Резник ащкIэ IэпыIэгъу къафэхъугъ.
«Пандемием къыздихьыгъэхэр дэгъэзыжьыгъэнхэм, сэкъатныгъэ зиIэхэми, нэмыкI сымаджэхэми япсауныгъэ зэтегъэуцожьыгъэным атегъэпсыхьагъэу, хэгъэгум и Президентэу Владимир Путиным пшъэрылъ зэрафишIыгъэм тетэу гъэрекIо къыщегъэжьагъэу УФ-м и Правительствэ медицинэ реабилитацием зырегъэушъомбгъу», — къыIуагъ Владислав Резник.
Коронавирусыр къызэузыгъэхэм япсауныгъэ зыпкъ игъэуцожьыгъэным тегъэпсыхьэгъэ медоборудованием игъэкIэжьынкIэ федеральнэ ахъщэ IэпыIэгъоу республикэм къыратыгъэм мэхьанэшхо зэриIэр Адыгеим и ЛIышъхьэ къыхигъэщыгъ. Мылъкоу къаIэкIэхьагъэмкIэ поликлиникэхэм оборудованиякIэ ачIагъэуцощт. Къихьащт илъэсым сымэджэщхэм ачIэт оборудованиер джырэ шапхъэхэм адиштэным мылъкур пэIуагъэхьащт.
«Псауныгъэм икъэухъумэн фэгъэзэгъэ учреждениехэр джырэ шапхъэхэм адиштэу зэтегъэпсыхьэгъэнхэмкIэ Iофэу зэшIуахыщтхэм яшIуагъэкIэ цIыфхэм медицинэ IэпыIэгъоу аратырэр нахьышIу хъущт, сымэджэщхэми, мафэрэ Iоф зышIэрэ стационархэми, амбулаториехэми уз зэфэшъхьафхэр зыпэкIэкIыгъэхэм япсауныгъэ зыпкъ ащырагъэуцожьын алъэкIыщт», — къыIуагъ АР-м и ЛIышъхьэ.
КъумпIыл Мурат къызэрэхигъэщыгъэмкIэ, непэ нэбгырабэмэ япсауныгъэ зыпкъ игъэуцожьыгъэн фае. Республикэм псауныгъэр къэухъумэгъэнымкIэ и Министерствэ ипшъэрылъыр цIыфхэр диспансеризацием нахьыбэу къыхегъэубытэгъэнхэмкIэ, реабилитацие медицинэ IэпыIэгъур ягъэгъотыгъэнымкIэ Iофэу ашIэрэр нахь аригъэгъэлъэшынэу ары.
ГущыIэм пае, инсульт хъугъэхэм япсауныгъэ зыпкъ зыщырагъэуцожьырэ отделениеу Мыекъопэ къэлэ сымэджэщым хэтым Iоф ышIэу ригъэжьэжьыгъ. Коронавирусыр зыпэкIэкIыгъэхэм япсауныгъэ изытет уплъэкIугъэнымкIэ ушэтыни 6 арагъэкIу.
«ЗэкIэ ящыкIагъэр тимедицинэ къулыкъухэм яIэным тапэкIи тынаIэ тедгъэтыщт. Лъэпкъ проектми, къэралыгъо программэхэми непэ ащ фэдэ амал къытаты», — къыIуагъ КъумпIыл Мурат.
Шъугу къэтэгъэкIыжьы АР-м и ЛIышъхьэу КъумпIыл Мурат пшъэрылъ зэрафишIыгъэм тетэу Адыгэ республикэ клиникэ инфекционнэ сымэджэщым игъэцэкIэжьын пае сомэ миллион 20 республикэ бюджетым къызэрэхагъэкIыгъэр. Ащ нэмыкIэу COVID-19-р къызэузыгъэхэм ыпкIэ зыхэмылъ медицинэ IэпыIэгъу ягъэгъотыгъэным пае Адыгеим исымэджэщхэмрэ иполиклиникэхэмрэ мылъку тедзэу сомэ миллиони 132,3-рэ къафыхагъэкIыгъ.
Депутатэу Владислав Резник къызэриIуагъэмкIэ, республикэм ипащэхэми, партиеу «Единэ Россием» хэтхэми ягъусэу псауныгъэм икъэухъумэн фэгъэзэгъэ къулыкъухэм федеральнэ ахъщэ IэпыIэгъу къафыхэгъэкIыгъэным тапэкIи ишъыпкъэу дэлэжьэщт.
