АР-м и ЛIышъхьэу КъумпIыл Мурат Урысыем и Следственнэ комитет Темыр Кавказ федеральнэ шъолъырымкIэ иследственнэ гъэIорышIэпIэ ШъхьаIэ ипащэу Олег Васильевым тыгъуасэ зэIукIэгъу дыриIагъ.
Адыгеим и ЛIышъхьэ Урысыем и Следственнэ комитет иследственнэ ГъэIорышIапIэу АР-м щыIэм ипащэу бэмышIэу агъэнэфэгъэ Александр Липало зэIукIэгъум нэIуасэ щыфашIыгъ. Мыщ ыпэкIэ А. Липало Урысыем и Следственнэ комитет иследственнэ ГъэIорышIапIэу Камчатскэ краим щыIэм ипащэу Iоф ышIагъ. Джащ фэдэу ведомствэмрэ республикэм игъэцэкIэкIо къулыкъухэмрэ зэгъусэхэу Iоф зэрэзэдашIэрэм иIофыгъохэм зэхэсыгъом щытегущыIагъэх.
Мы мэфэ дэдэм Адыгеим и ЛIышъхьэ Урысыем и Следственнэ комитет иследственнэ ГъэIорышIапIэу Адыгеим щыIэм Iоф щызышIэхэрэм пэщакIэу афашIыгъэм нэIуасэ зыщыфашIыгъэ зэхэсыгъом хэлэжьагъ. Iофтхьабзэр зэрищагъ Урысыем и Следственнэ комитет Темыр Кавказ федеральнэ шъолъырымкIэ иследственнэ гъэIорышIэпIэ ШъхьаIэ ипащэу Олег Васильевым. Ащ къызэриIуагъэмкIэ, Александр Липало 1996-рэ илъэсым къыщегъэжьагъэу прокуратурэм ыкIи следственнэ комитетым Iоф ащишIагъ, исэнэхьаткIэ гъэхъэгъэ инхэр иIэх, IэпэIэсэныгъэшхо хэлъ.
КъумпIыл Мурат къэгущыIэзэ ицыхьэ телъэу къыIуагъ А. Липало иIофшIэн хэшIыкIышхо зэрэфыриIэм ыкIи иIэпэIэсэныгъэ яшIуагъэкIэ ведомствэм ыпашъхьэ ит пшъэрылъхэр икъоу зэрэзэшIуахыщтхэр.
Адыгеим и ЛIышъхьэ къызэрэкIигъэтхъыгъэмкIэ, зыщырэхьат шъолъырхэм Адыгеир ащыщ. Общественнэ-политическэ зыпкъитыныгъэ шъолъырым илъыныр ары республикэм ихэхъоныгъэхэм алъапсэр. Республикэм игъэцэкIэкIо хабзэ ыкIи хэбзэухъумэкIо къулыкъухэм пшъэрылъ шъхьаIэу яIэр шъолъырым илъ рэхьатныгъэр къэухъумэгъэныр ары. Анахьэу непэ Урысыем къызытеIункIэхэрэ лъэхъаным нахь гъэлъэшыгъэ шIыкIэм тетэу Iоф зэрашIэн фаер къыIуагъ.
«Ведомствэм иIофшIэн хахьэу социальнэ лъэныкъом иIофыгъохэм шъунаIэ атежъугъэтын фае. ЦIыфхэм, анахьэу социальнэу мыухъумагъэхэм: кIэлэцIыкIухэм, пенсионерхэм, сэкъатныгъэ зиIэхэм, гъот макIэ зиIэ унагъохэм яфитыныгъэхэр зэраукъуагъэм епхыгъэ Iофхэм псынкIэу шъунаIэ атешъудзэн, ядаохэр игъом ыкIи зэрифэшъуашэм тетэу зэхэшъуфынхэ фае. ЛэжьапкIэмкIэ республикэм чIыфэ телъэп. ТапэкIи непэ чIыпIэу тызэрытыр къэтыухъумэн фае, зытефэрэ цIыфхэм пенсиер ыкIи тын тедзэхэр игъом аратынхэм лъыплъэгъэн фае. Ахэм ахэхьэ хьакъулахь ыкIи хэбзэIахь угъоинхэр», — къыIуагъ КъумпIыл Мурат.
КIэухым Адыгеим и ЛIышъхьэ агу къыгъэкIыжьыгъ цIыфхэм ящыIэкIэ-псэукIэ нахьышIу хъуным, экономикэм хэхъоныгъэ ышIыным афэIорышIэу мы аужырэ илъэсхэм тиреспубликэ зэхъокIыныгъэ инхэр зэрэщыкIохэрэр. Ащ дакIоу мы илъэсым агъэнэфэгъэ проектхэр тапэкIи зэрэпхыращыщтыр къыIуагъ.
