Адыгеим игъогу хъызмэт зызэхащагъэр илъэс 80 зэрэхъугъэм фэгъэхьыгъэ зэхахьэу тыгъуасэ АР-м и Къэралыгъо филармоние щыкIуагъэм хэлэжьагъ ыкIи зимэфэкI хэзыгъэунэфыкIыхэрэм къафэгушIуагъ Адыгэ Республикэм и ЛIышъхьэу КъумпIыл Мурат.
Республикэм ипащэ Iофтхьабзэм пэублэ псалъэ къыщишIызэ, мы къулыкъум зищыIэныгъэ гъогу езыпхыгъэ пстэуми, анахьэу ветеранхэм, игуапэу къафэгушIуагъ. Сыд фэдэрэ лъэныкъокIи тищыIэныгъэ, экономикэм чIыпIэшхо ащызыубытырэ къулыкъум непэ ипшъэрылъхэр зэрифэшъуашэу зэригъэцакIэхэрэр хигъэунэфыкIыгъ. ГъогукIэу ашIыхэрэм, агъэцэкIэжьыхэрэм яшIуагъэкIэ шъолъырым хэхъоныгъэхэр зэришIыхэрэр къыхигъэщыгъ. Тигъогухэр зыгъэпсыгъэхэм, Хэгъэгу зэошхом ыуж ахэр зэтезыгъэуцожьыгъэхэм, непэ Iоф зышIэхэрэм АР-м и ЛIышъхьэ ирэзэныгъэ гущыIэхэр апигъохыгъэх.
— Федеральнэ гъогухэм адакIоу шъолъыр ыкIи чIыпIэ мэхьанэ зиIэ гъогухэр тэшIых, зэтетэгъэпсыхьэх, мы лъэныкъомкIэ Iофышхо зэшIотэхы. Тигъогухэр щынэгъончъэу щытынхэм а пстэури фэIорышIэ. Мы аужырэ илъэсхэм сэциальнэ мэхьанэшхо зиIэ мыщ фэдэ проект заулэ республикэм щыдгъэцэкIагъ. Джырэ уахъти зэшIотхырэр макIэп. ГущыIэм пае, Мыекъуапэ къекIолIэрэ автомобиль гъогоу «Кавказ» зыфиIорэр зэтетэгъэпсыхьэ, тэгъэкIэжьы. Джащ фэдэу къуаджэхэу Лъэустэнхьаблэ, Тыгъургъой, тикъушъхьэхэм якIолIэрэ гъогухэр, нэмыкIхэр тэгъэцэкIэжьых, ахэр шэпхъэшIухэм адиштэнхэм тынаIэ тет. Тикъэлэ шъхьаIэ къэзыухьэрэ гъогум ишIыни тинэплъэгъу идгъэкIырэп. Мы илъэсым километрэ 47-рэ зикIыхьэгъэ гъогухэр дгъэцэкIэжьыщтых, шъолъыр ыкIи муниципальнэ гъогухэм яшIын, язэтегъэпсыхьан, ягъэцэкIэжьын сомэ миллиардитIум ехъу пэIудгъэхьанэу тэгъэнафэ. Мы хъызмэтым епхыгъэу непэ нэбгырэ минрэ ныкъорэм ехъумэ республикэм Iоф щашIэ, ыпэкIэ къызэрэхэзгъэщыгъэу, экономикэм хэхъоныгъэхэр ышIынхэм ахэм яIахьышхо хэлъ. УФ-м и Президентэу Владимир Путиным пшъэрылъэу къыгъэуцугъэхэм ащыщ шэпхъэшIухэм адиштэрэ гъогухэр нахьыбэу шIыгъэнхэр. Ар зэшIохыгъэным, тигъогухэр щынэгъончъэнхэм, ащ дакIоу цIыфхэм щыIэкIэ-псэукIэ амалэу яIэхэр нахьышIу шIыгъэнхэм тишъыпкъэу тыдэлэжьэщт, — къыIуагъ КъумпIыл Мурат къэзэрэугъоигъэхэм закъыфигъазэзэ.
«Адыгеим изаслуженнэ псэолъэшI» зыфиIорэ щытхъуцIэр гъогу хъызмэтым иIофышIэ нэбгырэ заулэмэ афагъэшъошагъ. Джащ фэдэу бгъэхэлъхьэ тамыгъэу «Урысые Федерацием игъогушI гъэшIуагъ» зыфиIорэр иIофшIэнкIэ, игъэхъагъэхэмкIэ къылэжьыгъ «Адыгеяавтодорым» иинженер шъхьаIэу Къазый Сэфэрбый. Мыхэм зэкIэми ыкIи зэхахьэм хэлэжьэгъэ пстэуми КъумпIыл Мурат джыри зэ къафэгушIуагъ, псауныгъэ, щыIэкIэшIу яIэнэу къафэлъэIуагъ.
АР-м и Къэралыгъо Совет – Хасэм ирэзэныгъэ тхылъхэр зытефэу алъытэгъэ къулыкъушIэхэми Iофтхьабзэм щафэгушIуагъэх, къалэжьыгъэхэр аратыжьыгъэх.
Республикэм итворческэ купхэм къагъэхьазырыгъэ концертымкIэ мэфэкI зэхахьэр зэфашIыжьыгъ.
КъулыкъушIэхэм афэгушIуагъ 
Джэуапэгъу афэхъугъ 
ПэшIорыгъэшъ Iофтхьабзэхэр агъэлъэшыгъэх 
Пшъэрылъ афишIыгъ 
Джы Адыгеим щыпхыращыщт