Примерное время чтения: 1 минута
28

УнакIэр къызэIуахыгъ

Адыгеим и ЛIышъхьэу КъумпIыл Мурат Джэджэ районым щыIагъ.

Гупчэ район сымэджэщым икIэлэцIыкIу поликлиникэ къутэмакIэ иIофшIэн зэрэзэхэщагъэм зыщигъэгъозагъ.

ПоликлиникакIэм пае унэу ашIыгъэр ищыкIэгъэ Iэмэ-псымэхэмкIэ зэтырагъэпсыхьагъ. Мэфэ заулэкIэ узэкIэIэбэжьмэ поликлиникэр къызэIуахыгъ ыкIи кIэлэцIыкIухэр ращалIэхэу рагъэжьагъ.

Мы Iофтхьабзэм хэлэжьагъэх федеральнэ инспектор шъхьаIэу Сергей Дрокиныр, АР-м псауныгъэр къэухъумэгъэнымкIэ иминистрэу Мэрэтыкъо Рустем, Адыгэ Республикэм псэолъэшIынымкIэ, транспортымкIэ, гъогу ыкIи унэ-коммунальнэ хъызмэтымкIэ иминистрэ иапэрэ гуадзэу Лафышъэ Рэмэзан, Джэджэ районым ипащэу Андрей Таранухиныр.

Псауныгъэм икъэухъумэнкIэ министрэм къызэриIуагъэмкIэ, кIэлэцIыкIу поликлиникэу къызэIуахыгъэм педиатрическэ участкэу 6 къыхеубытэ, джырэ уахътэм диштэрэ Iэмэ-псымэхэр егъэфедэх.

Сымэджэщым иврач шъхьаIэу Наталья Бурмистровам къызэриIуагъэмкIэ, мы лъэхъаным Джэджэ районым икIэлэцIыкIу мини 6,5-м фэдизмэ яфэIо-фашIэхэр поликлиникэм егъэцакIэх. БэшIагъэ поликлиникэм Iоф ышIэнымкIэ амалэу иIэхэр нахьышIу шIыгъэнхэм ыуж зихьанхэу щытыгъэр, пIэлъэ кIыхьэм къыкIоцI зэхэтэкъоным нэсыгъэу ар щытыгъ.

Республикэ программэм къызэрэдилъытэрэм тетэу кIэлэцIыкIухэм яIэзэнхэмкIэ амалэу яIэхэр нахьышIу шIыгъэнхэм пае сомэ миллион 30 къыхагъэкIыгъагъ. Ащ нэфэшъхьафэу Адыгэ республикэ общественнэ шIушIэ фондэу Шъэумэн Хьазрэт ыцIэкIэ щытым сомэ миллион 1,8-рэ къафитIупщыгъагъ.

Адыгеим и ЛIышъхьэу КъумпIыл Мурат къызэриIуагъэмкIэ, хэгъэгум ипащэ шъолъырхэм пшъэрылъ инхэр къафешIых псауныгъэм икъэухъумэнкIэ IэзапIэу щыIэхэм яIофшIэн нахьышIоу зэхэщэгъэным пае. Владимир Путиным шъолъырхэм япащэхэм адыриIэгъэ зэIукIэм ыпшъэкIэ пшъэрылъэу къыгъэуцугъагъэхэр зэкIэ гъэцэкIагъэ хъунхэм мэхьанэшхо зэриIэр къыщиIуагъ.

«Мы аужырэ лъэхъаным республикэм социальнэ псэолъабэ щашIыгъ. ИлъэскIэ узэкIэIэбэжьмэ Джэджэ гупчэ район сымэджэщым пае унакIэ ашIыгъ, джы кIэлэцIыкIу поликлиникакIэр къызэIуахыгъ. Гухэлъэу тиIэхэр зэкIэ дгъэцакIэхэзэ псауныгъэм икъэухъумэн иIофыгъохэр нахьышIоу зэшIохыгъэ зэрэхъущтхэм тыдэлэжьэщт. Ау медицинэм иIофышIэхэми бэ ялъытыгъэр. ЦIыфхэм зэхъокIыныгъэшIухэр зэхашIэн, зэрафэгумэкIыхэрэр къагурыIон фае», — къыIуагъ Адыгеим и ЛIышъхьэ.

Оцените материал
Оставить комментарий (0)

Топ 5 читаемых

Самое интересное в регионах