«Урысые Федерацием и ЛIыхъужъхэр» зыфиIорэ серием щыщ почтэ маркэу Урысыем и ЛIыхъужъэу, ГРУ-м испецназ ихэушъхьафыкIыгъэ я 12-рэ бригадэ истаршэ лейтенантэу, тичIыпIэгъоу Владислав Долониным фэгъэхьыгъэм мыхъур тегъэуцогъэным епхыгъэ Iофтхьабзэу щыIагъэм хэлэжьагъ Адыгеим и ЛIышъхьэу КъумпIыл Мурат.
Джащ фэдэу а Iофтхьабзэм хэлэжьагъэх ЛIыхъужъым ышэу, Урысыем илъэпкъ гвардие идзэхэм я Темыр-Кавказ шъолъыр идзэхэм япащэ игуадзэу, генерал-майорэу Николай Долониныр ыкIи ЛIыхъужъым ятэу Александр Долониныр.
Адыгеим щыпсэухэрэм ацIэкIэ ыкIи ежь ышъхьэкIэ республикэм и ЛIышъхьэ къыIуагъ ЛIыхъужъым янэ-ятэхэу патриот шъыпкъэр, зи Хэгъэгу ифэшъошэ къо шIагъор зыпIугъэхэм лъэшэу зэрафэразэр.
«Непэ тыгу къэтэгъэкIыжьы лъытэныгъэ ин зыфэтшIырэ тичIыпIэгъоу, зэолI шъыпкъэу ыкIи ихэгъэгу ипатриот шъыпкъэу, старшэ лейтенантэу Владислав Долониныр. Заор кIо зэхъум, нэмыкI зэолIхэр къыгъэнэжьынхэм пае ащ ыпсэ ыгъэтIылъыгъ. ЛIыхъужъым ыцIэ егъэшIэрэу тиреспубликэ итарихъ хэхьагъ, къыткIэхъухьэхэрэр я Хэгъэгу фэшъыпкъэу щытынхэмкIэ ар щысэ шIагъоу ренэу яIэщт», — къыIуагъ КъумпIыл Мурат.
Старшэ лейтенантэу Долонин Владислав Александр ыкъом, джащ фэдэу Хэгъэгур къаухъумэзэ фэхыгъэ тичIыпIэгъухэм апае къэзэрэугъоигъэхэр зы такъикъэ шъыгъуагъэх, къэзытхырэр Адыгэ Республикэм и ЛIышъхьэ ипресс-къулыкъу.
Ащ нэужым Урысыем и ЛIыхъужъ исурэт зытет почтэ маркэхэм мыхъур атедзэгъэным епхыгъэ Iофтхьабзэм къекIолIагъэхэр хэлэжьагъэх. Маркэхэр мини 145-рэ хъоу къыдагъэкIыгъэх.
ХэгъэунэфыкIыгъэн фае: почтэ маркэхэу «Урысые Федерацием и ЛIыхъужъхэр» зыфиIохэрэм ясерие зыфэгъэхьыгъэр зипшъэрылъ зыгъэцакIэзэ дунаим ехыжьыгъэхэу Урысыем и ЛIыхъужъыцIэ зыфагъэшъошагъэхэр ары. 1995-рэ илъэсым гъэтхапэм и 3-м Урысыем изыкIыныгъэ къыухъумэзэ хэкIодэгъэ Владислав Долониным ыцIэ а серием хагъэхьагъ.
Пшъэрылъхэр агъэнэфагъэх 
Адыгеим и ЛIышъхьэрэ Урысые Федерацием и ЛIыкIоу Тыркуем щыIэмрэ Анкара 
ПсэолъакIэ къызэIуахыгъ 
ТищыIэныгъэ чIыпIэшхо щызыубытырэ къулыкъу 
Мандатыр щигъэзыенэу унашъо ышIыгъ