Адыгеим и ЛIышъхьэу КъумпIыл Мурат Адыгэ Республикэм заомкIэ, IофшIэнымкIэ, УIэшыгъэ КIуачIэхэмкIэ ыкIи хэбзэухъумэкIо къулыкъухэмкIэ иветеранхэм я Совет итхьаматэу Къоджэ Аслъан Адыгэ Республикэм и Правительствэ зычIэт унэм тыгъуасэ щыригъэблэгъагъ.
Хабзэм ишъолъыр къулыкъухэмрэ Адыгэ Республикэм иветеранхэм я Советэу илъэс 33-кIэ узэкIэIэбэжьмэ зэхащагъэмрэ тапэкIэ зэрэзэдэлэжьэщтхэ шIыкIэм тегущыIагъэх. Зигугъу къэтшIыгъэ организацием итхьаматэ иIофшIэн ипIалъэ мы мазэм зэрикIырэм епхыгъэу чъэпыогъум хэдзын-зэфэхьысыжь конференцие зэхащэнэу рахъухьагъ.
Адыгэ Республикэм иветеранхэм я Совет Iофэу ышIэрэм мэхьанэшхо зэриIэр, ветеранхэм ящыIэкIэ-псэукIэ нахьышIу шIыгъэным, общественнэ IофшIэнхэм ахэр чанэу ахэгъэлэжьэгъэнхэм кIуачIэу иIэр зэрэрихьылIэрэр Адыгеим и ЛIышъхьэ хигъэунэфыкIыгъ. НыбжьыкIэхэм дзэ-патриотическэ пIуныгъэ тэрэз ягъэгъотыгъэнымкIэ Iофышхо зэрашIэрэм фэшI Адыгэ Республикэм иветеранхэм я Совет ипащэхэм зэрафэразэр КъумпIыл Мурат къыIуагъ. 1941 — 1945-рэ илъэсхэм щыIэгъэ Хэгъэгу зэошхом ТекIоныгъэр къызыщыдахыгъэр илъэс 75-рэ зэрэхъугъэм игъэмэфэкIынкIи ахэм бэ зэрашIагъэр хигъэунэфыкIыгъ.
Къоджэ Аслъан къызэриIуагъэмкIэ, ветеран мини 2 фэдиз, заом Iутыгъэ нэбгырэ 89-р, Ленинград къызадзыхьэм къалэм дэсыгъэ нэбгырэ 22-р джыдэдэм республикэм щэпсэух. Советыр ахэм IэпыIэгъу афэхъу. Хэгъэгу зэошхом хэкIодагъэхэм ацIэхэр ащымыгъупшэнхэм тегъэпсыхьагъэу, ТекIоныгъэр къызыдахыгъэр илъэс 75-рэ зэрэхъурэм фэгъэхьыгъэу республикэм икъалэхэмрэ ирайонхэмрэ патриотическэ Iофтхьабзэхэр ащызэрахьагъэх, мыжъобгъухэр ащагъэуцугъэх. Сталинград къэзыухъумэгъэ тичIыпIэгъухэм афэгъэхьыгъэ саугъэти Мамай Iуашъхьэм щагъэуцугъ.
«Тиветеранхэм лъэшэу тарэгушхо, тэркIэ ахэр щысэтехыпIэу щытых. ШIэжьымрэ дзэ щытхъумрэ я Илъэс къыдыхэлъытагъэу, ТекIоныгъэр къыдэзыхыгъэхэм лъытэныгъэ зэрафэтшIырэм ишыхьатэу Iофтхьэбзабэ республикэм щызэрахьагъ. Пандемием ыпкъ къикIыкIэ ахэр тызэрэфаеу тфызэхэщагъэхэп. Ау къэIогъэн фае узым зыкъимыштэнымкIэ а лъэхъаным амалыбэ зэрэзетхьагъэр. Тинахьыжъхэм зэпахырэ узыр къапымыпкIэнымкIэ тапэкIи тфэлъэкIыщтыр зэкIэ тшIэн фае. Ветеранхэм я Совет непэ патриотическэ Iофтхьабзэу зэрихьэхэрэр лъыгъэкIотэгъэнхэм мэхьанэшхо иI. АщкIэ ищыкIэгъэ IэпыIэгъур шъодгъэгъотыщт», — къыIуагъ Адыгеим и ЛIышъхьэ.
НыбжьыкIэхэм патриотическэ пIуныгъэ тэрэз ягъэгъотыгъэнымкIэ, Адыгэ Республикэм щыпсэурэ лъэпкъхэм азыфагу илъ зэгурыIоныгъэр гъэпытэгъэнымкIэ хабзэм ишъолъыр къулыкъухэмрэ ветеран организациехэмрэ язэдэлэжьэныгъэ агъэлъэшыным мэхьанэшхо зэриIэр республикэм ипащэ хигъэунэфыкIыгъ.
КъумпIыл Мурат Адыгэ Республикэм и ЛIышъхьэрэ Адыгэ Республикэм иминистрэхэм я Кабинетрэ я Администрацие ипащэу Владимир Свеженецрэ ащ игуадзэу Къонэ Зауррэ пшъэрылъ афишIыгъ хэдзын-зэфэхьысыжь конференцием изэхэщэнкIэ Адыгэ Республикэм иветеранхэм я Совет ищыкIэгъэ IэпыIэгъур рагъэгъотынэу. Iофтхьабзэр видеоконференцие шIыкIэм тетэу зэхащэщт.
