Петербург щыкIогъэ дунэе экономическэ форумым Адыгэ Республикэм иминистрэхэм я Кабинетрэ пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Озон Адыгея» зыфиIорэмрэ инвестиционнэ зэзэгъыныгъэ щызэдашIыгъ. Адыгэ Республикэм и ЛIышъхьэу КъумпIыл Муратрэ компание купэу «Ромекс» зыфиIорэм ипрезидентэу Алексей Прокопенкэмрэ а зэзэгъыныгъэм кIэтхэжьыгъэх.
Инвестиционнэ проектым диштэу Адыгэкъалэ ипаркэу «Ромекс-Теучежский» зыфиIорэм гъомылэпхъэ, мыгъомылэпхъэ товархэм ягъэтIылъыпIэ щагъэпсынэу рахъухьэ.
Квадрат метрэ мини 107-рэ хъурэ псэуалъэм ишIын мы илъэсым иапэрэ мэзищ фежьагъэх, 2023-рэ илъэсым иятIонэрэ кIэлъэныкъо ар аухын ямурад. Логистическэ комплексым сомэ миллиарди 6,2-рэ хъурэ инвестициехэр халъхьащтых. ПшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Озон Адыгея» зыфиIорэр бэджэндэу зыштэрэми сомэ миллиарди 2,2-рэ къытIупщыщт, IофшIэпIэ чIыпIэ 2000-м нэс зэхащэщт.
«ПроектыкIэр гъэхъагъэ хэлъэу пхырытщы, республикэм иэкономикэ хэхъоныгъэ езыгъэшIыщт компание цыхьэшIэгъухэм ямылъку тапэкIи къытхалъхьэ тшIоигъу. ЧIыпIэ, республикэ бюджетхэм хэбзэIахьэу къарыхьащтми зэрэхэхъощтым, IофшIэпIэ чIыпIакIэхэр щыIэхэ зэрэхъущтым мэхьанэшхо яI», — къыIуагъ АР-м и ЛIышъхьэу КъумпIыл Мурат.
Инвесторым къызэрэхигъэщыгъэмкIэ, универсальнэ гъэтIылъыпIэр пIэлъэ кIэкIкIэ агъэпсын алъэкIыщт ищыкIэгъэ инфраструктурэр зэрэщыIэм ишIуагъэкIэ.
«БэшIагъэ тэ республикэм зэфыщытыкIэ дэгъухэр зыдытиIэхэр. Республикэм и ЛIышъхьи, хэбзэ къулыкъухэри IэпыIэгъу къызэрэтфэхъухэрэм ишIуагъэкIэ мы охътэ мыпсынкIэм проектыр пхырытщын, IофшIэпIэ чIыпIакIэхэр зэхэтщэн тэлъэкIы», — къыIуагъ Алексей Прокопенкэм.
