Примерное время чтения: 2 минуты
91

Зэзэгъыныгъэм зэдыкIэтхагъэх

Адыгэ Республикэм и Правительствэрэ «Почтэ Банкымрэ» ясоциальнэ-экономикэ зэдэлэжьэныгъэ зырагъэушъомбгъунэу зэзэгъыгъэх. Ащ фэдэ зэзэгъыныгъэм Адыгеим и ЛIышъхьэу КъумпIыл Муратрэ «Почтэ Банкым» игъэIорышIапIэ ипрезидентэу Дмитрий Руденкэмрэ Москва щызэдыкIэтхагъэх.

Программэ заулэ зэдагъэцэкIэнэу лъэныкъохэр зэгурыIуагъэх.

ГущыIэм пае, банкым иструктурнэ подразделениехэр республикэм щызэхащэнхэу, банк фэIо-фашIэхэу пенсионерхэм афагъэцакIэхэрэм зарагъэушъомбгъунэу, цIыфхэм чIыфэхэр зэраратырэ шIыкIэм зэхъокIыныгъэхэр фашIынэу ямурад.

«НэмыкI отраслэхэм афэдэу банкми нэкъокъоным зызэрэщырагъэушъомбгъурэм детэгъаштэ. БанкыкIэм икъутамэхэр Адыгеим къызыщызэIуахыхэкIэ, цIыфхэм фэIо-фэшIабэ афагъэцэкIэн алъэкIыщт. Банк инфраструктурэм изегъэушъомбгъуни мэхьанэшхо зэриIэр зыщыдгъэгъупшэ хъущтэп», — къыIуагъ КъумпIыл Мурат.

Республикэм и ЛIышъхьэрэ банкым ипрезидентрэ анаIэ лъэшэу тырагъэтыгъ къоджэ Iудзыгъэхэм ащыпсэухэрэм банк фэIо-фашIэхэр нахьышIоу афэгъэцэкIэгъэнхэм епхыгъэ Iофыгъоми. НепэкIэ республикэм ипсэупIэ 27-мэ банкым икъутамэхэр къащызэIуахыгъэх. Ахэм ащыщых псэупIэхэу Мыекъуапэ, Джаджэ, Инэм, Афыпсыпэ адэтхэр, къэзытхырэр Адыгэ Республикэм и ЛIышъхьэ ипресс-къулыкъу.

«Финанс фэIо-фашIэхэр нахь икъоу цIыфхэм афэгъэцэкIэгъэнхэм епхыгъэ Iофыгъор непэ Адыгеим лъэшэу къыщыуцугъ. Сыда пIомэ цIыфхэм азыныкъо нахьыбэр банкхэр зыдэмыт къоджэ псэупIэхэм адэсых. Счетхэр къызэIуахынхэм, ахэм ахъщэ аралъхьаным е картэхэм ахъщэ къарахыным апае загъорэ район гупчэм кIонхэ фаеу мэхъух. Урысыем и Почтэ икъутэми 130-м ехъу тиреспубликэ къыщызэIуахыгъ. Илъэсым къыкIоцI республикэм щыпсэухэрэм азыщанэмэ яфэIо-фашIэхэр афэдгъэцакIэхэ хъугъэ, гъэхъагъэу тиIэхэм такъыщыуцун тимурадэп», — хигъэунэфыкIыгъ «Почтэ Банкым» иправление ипрезидентэу Дмитрий Руденкэм.

Джащ фэдэу лъэныкъохэр банкым иэкологическэ проектэу «Подари лес другу» зыфиIорэм Кавказ биосфернэ заповедникыр хэгъэхьэгъэным епхыгъэ Iофыгъом тегущыIагъэх. Ащ къыдыхэлъытагъэу хэшъэе мэзхэр зыпкъ игъэуцожьыгъэнхэм анахьэу анаIэ тырагъэтыщт.

2016-рэ илъэсым имэлылъфэгъу къыщегъэжьагъэу «Почта России» зыфиIорэм икъутамэхэм «Почтэ Банкым» Iоф зэращишIэрэр, хэгъэгур зэрэщытэу пштэмэ, чIыпIэ мин 12-м ехъу ащ зэрэхахьэрэр шъугу къэтэгъэкIыжьы.

Смотрите также:

Оцените материал
Оставить комментарий (0)

Также вам может быть интересно

Топ 5 читаемых

Самое интересное в регионах