«Единэ Россием» ишъолъыр къутамэ ия XXXIII-рэ конференцие иятIонэрэ едзыгъо иIофшIэн хэлэжьагъ партием и Адыгэ шъолъыр отделение и Секретарэу, АР-м и ЛIышъхьэу КъумпIыл Мурат.
Iофтхьабзэм хэлэжьагъэх Адыгеим и Къэралыгъо Совет — Хасэм и Тхьаматэу, фракциеу «Единэ Россием» ипащэу Владимир Нарожнэр, депутатхэр, партием игъэцэкIэкIо комитет хэтхэр, чIыпIэ къутэми 9-мэ ялIыкIохэр. Конференциер зэрищагъ партием ишъолъыр гъэцэкIэкIо комитет ипащэу АфэшIэгъо Рэмэзан.
Iофыгъо шъхьаIэу къэзэрэугъоигъэхэр зытегущыIагъэхэр УФ-м и Къэралыгъо Думэ ыкIи Адыгеим и Къэралыгъо Совет — Хасэм ядепутатхэм яхэдзынхэу къэблагъэхэрэм языфэгъэхьазырын ары.
Мэхьанэшхо ыкIи пшъэдэкIыжьышхо зыпылъ хэдзын кампаниер зэрэрагъажьэрэр, ар хэбзэгъэуцугъэм диштэу, зэIухыгъэу ыкIи шъыпкъагъэ хэлъэу регъэкIокIыгъэн зэрэфаер Адыгеим и ЛIышъхьэ пэублэм къыIуагъ. ПэшIорыгъэшъ мэкъэтынэу (праймериз) зэхащагъэм изэфэхьысыжьхэм адиштэу «Единэ Россием» икандидатхэм яспискэ аштагъ, ахэр зэкIэмкIи нэбгыри 117-рэ мэхъух, 25-р — зы мандат зиIэ койхэм япхыгъэх. Шъэф шIыкIэм тетэу конференцием хэлажьэхэрэм амакъэхэр атыгъэх ыкIи, ыпшъэкIэ къызэрэтIуагъэу, кандидатхэм яспискэ аштагъ. Джы ахэр хэдзакIохэм аIукIэщтых.
ЦIыфхэм занкIэу, шъхьэихыгъэу адэгущыIэгъэным партием сыдигъуи мэхьанэшхо зэрэритырэр республикэм ипащэ хигъэунэфыкIыгъ. Арышъ, депутат хъунхэмкIэ кандидатхэм хэдзакIохэм адыряIэщт зэIукIэгъухэр зэрифэшъуашэу зэхащэнхэ фае.
«Урысыем и Президентэу Владимир Путиным ащ фэдэ екIолIакIэм мэхьанэшхо зэриIэр къыхигъэщызэ, шъолъыр хэбзэ ыкIи чIыпIэ зыгъэIорышIэжьын къулыкъухэм, депутатхэм яIофшIэн зэхащэ зыхъукIэ цIыфхэм яшIоигъоныгъэхэр къыдалъытэнхэ, ахэм зэпхыныгъэ адыряIэн зэрэфаер хегъэунэфыкIы. Республикэм щыпсэухэрэм цыхьэ къыпфашIыным пшъэдэкIыжьышхо пылъ. Ар фэдитIукIэ нахьыбэ мэхъу, сыда пIомэ шъо шъуиIофшIагъэхэм ямызакъоу, партиеми зэрэпсаоу цIыфхэм уасэу фашIырэр мыщ дэжьым къэнэфэщт. Ар зыщышъумыгъэгъупш. ХэдзакIохэм ягукъэкIхэм шъуядэIу закъокIэ икъущтэп, ахэр щыIэныгъэм щыпхырыщыгъэнхэм шъузэгъусэу шъунаIэ тежъугъэтын фае», — къыIуагъ КъумпIыл Мурат единороссхэм закъыфигъазэзэ.
Партием ишъолъыр къутамэ и Секретарь къызэриIуагъэмкIэ, зэфэхьысыжь дэгъухэр къызкIэлъыкIощт Iофыгъо гъэнэфагъэхэр непэ ящыкIагъэх. А пшъэрылъыр гъэцэкIэгъэным фэшI шIуагъэ къэзытыщт IофшIэным цIыфхэр хэщэгъэнхэм мэхьанэшхо иI, ахэм ащыщыбэхэм «Единэ Россиер» якIэщакIу. Шъолъырым щыпсэухэрэм ящыIэкIэ-псэукIэ нахьышIу шIыгъэным фэIорышIэщт Iофыгъуабэ мы аужырэ илъэситфым республикэм зэрэщызэшIуахыгъэр КъумпIыл Мурат къыхигъэщыгъ.
«Лъэпкъ гухэлъхэр ыкIи стратегическэ пшъэрылъхэр къэралыгъом ипащэ иуказхэм, УФ-м и Президент Федеральнэ ЗэIукIэм фигъэхьыгъэ Джэпсалъэм къадыхэлъытагъэх. ЩыIэкIэ-псэукIэм зыкъегъэIэтыгъэным, цIыфхэр къэухъумэгъэнхэм а зэкIэри афэIорышIэщт. ЦIыфхэм зэхъокIыныгъэхэр алъэгъух, IофшIэным чанэу къыхэлажьэх. Ащ дакIоу республикэм исхэр къыдготых. «Единэ Россием» сыдигъуи шъолъырым пэрытныгъэ щиIыгъыгъ, тапэкIи арэущтэу щытыным мэхьанэшхо иI. Ар ткIуачIэ къыхьыщт», - къыIуагъ Адыгеим и ЛIышъхьэ.
КъумпIыл Мурат къызэрэхигъэщыгъэмкIэ, АР-м и Къэралыгъо Совет — Хасэм идепутат хъунхэмкIэ кандидатхэм яспискэ шъхьэкIафэ зыфэпшIын ыкIи сэнаущыгъэ зыхэлъ цIыфыбэ хэт, ныбжьыкIэхэри макIэп. Бэхэм яIофшIэнкIэ щытхъур къалэжьыгъ, пандемием илъэхъан цIыфхэм яшIуагъэ арагъэкIыгъ.
Республикэм ипащэ депутат хъунхэмкIэ кандидатхэм гъэхъэгъэшIухэр ашIынхэу кIэухым къафэлъэIуагъ.
