Урысые Федерацием и Правительствэ и Тхьаматэ игуадзэу Марат Хуснуллиным Урысыем шъолъыр хэхъоныгъэмкIэ иправительственнэ комиссие и Президиум изэхэсыгъо тыгъуасэ Сахалин хэкум щызэрищагъ.
Адыгеим и ЛIышъхьэу КъумпIыл Мурат, республикэ министерствэхэмрэ ведомствэхэмрэ япащэхэр видеоселектор шIыкIэм тетэу ащ хэлэжьагъэх.
Урысыем и Правительствэ ивице-премьер зэрэхигъэунэфыкIыгъэмкIэ, бюджет чIыфэ къаратынымкIэ шъолъыр 83-мэ къаIэкIагъэхьэгъэ заявкэхэмкIэ сомэ миллиард 500 къатIупщынэу агъэнэфагъ.
«Лимитым шъхьадэкIэу чIыфэ къызэраты зышIоигъо шъолъырхэм язаявкэхэм зэнэкъокъу шIыкIэм тетэу ахэплъэщтых», — къыIуагъ Марат Хуснуллиным.
Президиумым изэхэсыгъо хэлажьэхэрэр шъолъыр 15-мэ язаявкэхэу сомэ миллиард 49-рэ зытефэщтхэм ахэплъагъэх. Сомэ миллиард 1,1-рэ хъурэ бюджет чIыфэ къыфыхэгъэкIыгъэнымкIэ Адыгэ Республикэм изаявкэ къыдырагъэштагъ. А мылъкур зыпэIуагъэхьащтыр Мые-къуапэ иинженер, исоциальнэ инфраструктурэхэм зягъэушъомбгъугъэныр, зекIорекреационнэ паркэу «Дахъо гъэхъунэм» иинфаструктурэ къепхыгъэхэм ягъэпсын ары.
Зэхэсыгъом зэрэщыхагъэунэфыкIыгъэмкIэ, сомэ миллиард 420-м шIокIырэ бюджет чIыфэхэр шъолъыр 69-мэ ятыгъэным правительственнэ комиссиер къезэгъыгъ.
«Инженер, социальнэ, гъогу инфраструктурэу псэолъэшIынымкIэ ищыкIагъэм зызэрэрагъэушъомбгъущтым имызакъоу, нэмыкI лъэныкъоми —зекIо, промышленнэ, экологие инфраструктурэми хэхъоныгъэ рагъэшIыщт. А мылъкум ишIуагъэкIэ цIыфхэм ящыIэкIэ-псэукIэ зыкъиIэтынэу сэгугъэ», — къыIуагъ Марат Хуснуллиным.
Адыгеим бюджет чIыфэу къыфыхагъэкIыщтым щыщэу сомэ миллион 360-р Мыекъуапэ имикрорайонэу Михайловым изэтегъэпсыхьан пэIуагъэхьащт. Сомэ миллиарди 7,3-рэ зытефэщт проектыр 2022 — 2023-рэ илъэсхэм агъэцэкIэнэу рахъухьэ. ЗекIо-рекреационнэ паркэу «Дахъо гъэхъунэм» ипроект сомэ миллион 739,9-рэ хъурэ бюджет чIыфэр пэIуагъэхьащт, 2022 — 2024-рэ илъэсхэм ар агъэцэкIэн фае.
«Адыгеим къыфыхагъэкIыгъэ бюджет чIыфэхэм яшIуагъэкIэ мыекъуапэрэ Мыекъопэ районымрэ яинфраструктурэ проектхэу мэхьанэшхо зиIэхэм ягъэцэкIэн мы охътэ благъэм фежьэнхэ алъэкIыщт. Ащ ишIуагъэкIэ квадрат метрэ мини 110-рэ хъурэ унэхэр атын, IофшIэпIэ чIыпIэ мини 4,6-м ехъу зэхащэн амал щыIэщт», —къыIуагъ КъумпIыл Мурат зэхэсыгъом икIэуххэм къатегущыIэзэ.
