Адыгеим и ЛIышъхьэу КъумпIыл Мурат Адыгэ Хасэм итхьа матэу ЛIымыщэкъо Рэмэзан республикэм и Правительствэ зычIэт унэм тыгъуасэ щыIукIагъ.ЗэIукIэгъум хэлэжьагъэх АР-м и ЛIышъхьэрэ АР-м иминистрэхэм я Кабинетрэ я Администрацие ипащэ игуадзэу Къонэ Заур, АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр.
Адыгэ Хасэр хэлажьэзэ республикэм щызэхащэрэ Iофтхьабзэхэу общественнэ мэхьанэ зиIэхэм зэIукIэгъум щатегущыIагъэх. Анахьэу ахэр зылъыIэсыгъэхэр адыгэ тхыбзэм, Адыгеим и Къэралыгъо быракъ я Мафэ, я ХIХ-рэ лIэшIэгъум щыIэгъэ Кавказ заом хэкIодагъэхэм афэгъэхьыгъэ шъыгъо-шIэжь мафэр, зи Хэкужъ къэзыгъэзэжьыгъэхэм, адыгэ шъуашэм я Мафэ зэрэхагъэунэфыкIырэр ары. Адыгеим къэралыгъо гъэпсыкIэ зиIэр мыгъэ илъэси 100 зэрэхъурэм ихэгъэунэфыкIын анахьэу мэхьанэшхо раты.
Республикэм ипащэ зэрэхигъэунэфыкIыгъэмкIэ, ковидым ыпкъ къикIыкIэ культурэ Iофтхьабзэхэр пэIудзыгъэ шIыкIэм тетэу зэхащэн фаеу хъущтыгъэ. Iофхэм язытет нахьышIу зэрэхъугъэм епхыгъэу ыпэкIэ щыIэгъэ шапхъэхэм атехьажьыгъэн фае.
«КоронавирусымкIэ Iофхэм язытет зэрэхъугъэм епхыгъэу очнэ Iофтхьабзэхэр нахьыбэу непэ зэрахьан алъэкIы. АщкIэ щысэу къэпхьымэ хъущт «МыкIодыжьыщт полк» зыфиIорэ Iофтхьабзэу жъоныгъуакIэм и 9-м Мыекъуапэ щызэхащагъэм нэбгырэ мин 36-рэ фэдиз зэрэхэлэжьагъэр. Общественнэ рэхьатныгъэрэ зыпкъитыныгъэрэ щыIэнхэмкIэ мэхьанэшхо зиIэ Iофтхьэбзабэ джыри зехьэгъэн фаеу тапэкIэ къэт», — къыIуагъ КъумпIыл Мурат.
ЛIымыщэкъо Рэмэзан зэIукIэгъум къыщиIотагъ Адыгэ Хасэр республикэм иобщественнэ щыIэныгъэ зэрэхэлажьэрэм, адыгэ хабзэхэм, ныдэлъфыбзэм, культурэм якъэухъумэнкIэ амалэу зэрахьэхэрэм, нэмыкI лъэпкъ-культурэ движениехэм зэдэлэжьэныгъэу адыряIэм афэгъэхьыгъэу.
Кавказ заом хэкIодагъэхэм афэгъэхьыгъэ шъыгъо-шIэжь мафэр къызэрэблагъэрэм епхыгъэу зэIукIэгъум хэлажьэхэрэр Мыекъуапэрэ муниципалитетхэмрэ ащкIэ Iофтхьабзэу ащызэрахьащтхэм шъхьафэу атегущыIагъэх.
Республикэм и ЛIышъхьэ зэрэхигъэунэфыкIыгъэмкIэ, Адыгеим ис цIыф лъэпкъхэм язэгъунэгъушIу зэфыщытыкIэхэм ягъэпытэнкIэ, мамырныгъэм икъэухъумэнкIэ мыщ фэдэ Iофтхьабзэм мэхьанэшхо иI.
«БлэкIыгъэм зыфэдгъазэзэ, мамырныгъэм, зэгурыIоныгъэм, зыкIыныгъэм уасэу яIэр нахь зэхэтэшIэ. АхэмкIэ тиныбжьыкIэхэм щысэшIу ядгъэлъэгъун фае», — къыIуагъ КъумпIыл Мурат.