ЦIыф куп заулэхэм къэралыгъо IэпыIэгъу ятыгъэным епхыгъэ ахъщэ тедзэ шъолъырхэм 2022-рэ илъэсым къафыхэгъэкIыгъэным фэгъэхьыгъэ унашъор Урысыем и Правительствэ ыухэсыгъ. Мылъкур Урысые Федерацием иIэпэчIэгъэнэ фонд къыхагъэкIыщт.
Адыгэ Республикэм сомэ миллион 20,3-рэ къыфыхагъэкIыгъ. Адыгеим ыцIэкIэ Къэралыгъо Думэм идепутатэу Владислав Резник иIэпыIэгъу хэлъэу Урысые Федерацием и Федеральнэ ЗэIукIэ и Комиссие игъо зелъэгъу нэужым, Урысые Федерацием и Правительствэ ахъщэр къыхэгъэкIыгъэным фэгъэхьыгъэ унашъор ыштагъ.
Парламентарием къызэриIуагъэмкIэ, 2022-рэ илъэсым мэкъуогъум къыщегъэжьагъэу урыпсэунымкIэ анахь ахъщэ макIэр проценти I0-кIэ индексацие зэрашIыгъэм ыкIи предприниматель е унэе IэпыIэгъу хъызмэтым афэгъэзагъэхэм япхыгъэ IофтхьабзэхэмкIэ социальнэ зэзэгъыныгъэм къыдилъытэрэ зэтыгъо ахъщэ IэпыIэгъур сомэ мини I00-кIэ нахьыбэ зэрашIыгъэм телъытагъэу а ахъщэр аратызэ ашIыщт, къэзытхырэр АР-м и ЛIышъхьэ ипресс-къулыкъу
ЦIыфхэм къэралыгъо IэпыIэгъу ятыгъэнымкIэ социальнэ зэзэгъыныгъэхэм ателъытагъэу аIэкIагъэхьащтыр сомэ миллиони I00-м ехъущт.
«Социальнэ зэзэгъыныгъэр – цIыфхэу анахь гъот макIэ зиIэхэм къэралыгъо IэпыIэгъу ятыгъэным фытегъэпсыхьэгъэ Iофтхьабзэу щыт. ЦIыфыр ежь ыгукIэ зыфэщэгъэ Iофыр ыгъэцэкIэнымкIэ ыкIи иунагъо риIыгъынымкIэ ащ амал къыритыщт. Федеральнэ ахъщэ тедзэу республикэм къыIэкIэхьащтым амал къытыщт социальнэ IэпыIэгъур нахь шIогъэ ин хэлъэу цIыфхэм ягъэгъотыгъэнымкIэ», — къыIуагъ Адыгеим и ЛIышъхьэу КъумпIыл Мурат.
Владислав Резник къызэрэхигъэщыгъэмкIэ, Адыгеим ипащэхэм чIыпIэ зэжъу ит цIыфхэм социальнэ IэпыIэгъу ятыгъэным анаIэ тырагъэты. Социальнэ зэзэгъыныгъэм тегъэпсыхьагъэу IофшIэн зэбгъэгъотын е о узыфэе Iоф горэ къызэIупхын, унэе IэпыIэгъу хъызмэтым зебгъэушъомбгъун ыкIи нэмыкIхэр зэшIопхынхэ плъэкIыщт.
«Урысыем и Президент пшъэрылъ къызэрафишIыгъэм тетэу гъэмафэм социальнэ зэзэгъыныгъэм къыдилъытэрэ зэтыгъо ахъщэ IэпыIэгъур сомэ мини I00-кIэ нахьыбэ ашIын алъэкIыгъ. Унэе предпринимательхэм апае а ахъщэр сомэ мин 250-рэ хъущтыгъэмэ, джы сомэ мин 350-м нэсыгъ, унэе IэпыIэгъу хъызмэтшIапIэ зиIэхэм къаIэкIахьэщтыгъэр мини I00 хъущтыгъэмэ, джы сомэ мин 200-м нэсыгъ. Джащ пае Адыгеим ахъщэ тедзэу сомэ миллион 20-м ехъу къыфыхагъэкIыгъ. ТапэкIи а гухэлъхэм апае федеральнэ мылъку шъолъырхэм аIэкIагъахьэзэ ашIыщт», — къыIуагъ депутатым.