Адыгэ Республикэм и ЛIышъхьэу КъумпIыл Мурат ипшъэрылъхэм язэшIохын къыдыхэлъытагъэу, туризмэм хэхъоныгъэ ышIыным, анахьэу зекIон ыкIи хьакIэщ фэIо-фашIэхэр зэрифэшъуашэу гъэцэкIэгъэнхэм, республикэм мэхьанэшхо щыраты.
Унашъом епхыгъэу Мыекъуапэ игупчэ ит хьакIэщэу «Адыгеим» непэ игъэкIотыгъэ гъэцэкIэжьынхэр щэкIох.
Адыгеим и ЛIышъхьэ тыгъуасэ мы псэуалъэм щыIагъ, IофшIэнхэр зэрэлъыкIуатэхэрэр зэригъэлъэгъугъ. Шъолъырым къэкIорэ хьакIэхэм зэрифэшъуашэу загъэпсэфын амал яIэным мэхьанэшхо зэриIэр республикэм ипащэ хигъэунэфыкIыгъ. Аужырэ шапхъэхэм адиштэхэрэ шIыкIэхэр, амалхэр къызфагъэфедэзэ хьакIэщыр зэ-тырагъэпсыхьан зэрэфаем дакIоу, псэуалъэм имэхьанэ, ащ тешIыхьэгъэ тарихъ орнаментыр, хьакIэщым ыцIэ къызэтегъэнэжьыгъэнхэ зэрэфаер къыIуагъ.
ХьакIэщыр блэкIыгъэ лIэшIэгъум ия 60-рэ илъэсхэм ашIыгъагъ. Къатитфэу зэтет псэуалъэм квадратнэ метрэ мини 6 фэдиз илъ. Ащ изытет зэрэдэим къыхэкIыкIэ охътабэ хъугъэу Iоф ышIэщтыгъэп. Аукцион зызэхащэм, объектыр ыщэфыгъ чIыпIэ инвесторэу Виктор Михайловскэм, псэолъэ инхэм яшIынкIэ ащ опытышхо IэкIэлъ. Ащ къызэриIуагъэмкIэ, зекIон кластерыр зэрагъэпсырэр ыкIи шъолъырым зыщызгъэпсэфынхэу къакIохэрэм япчъагъэ ренэу зэрэхахъорэр къыдэплъытэхэмэ, мы проектым шIогъэшхо къызэритыщтым щэч хэлъэп. Ащ игъэцэкIэн сомэ миллион 200 фэдиз пэIуагъэхьанэу агъэнафэ.
Инвесторым къызэриIуагъэмкIэ, гъэцэкIэжьын IофшIэнхэр блэкIыгъэ илъэсым рагъэжьагъэх. Псэуалъэм итехническэ зытет зыфэдэм уасэ фашIыгъ, жъы хъугъэхэ пкъыгъохэр Iуахыгъэх. ЗэрагъэнафэрэмкIэ, агъэкIэжьыщт хьакIэщым жъогъуиплI иIэщт, псэупIэ унэ 70-рэ къыдыхэлъытэгъэщт. Джащ фэдэу СПА-комплекс бассейн дыхэтэу къыпашIыхьащт, ресторан, конференц-зал, спортзал, нэмыкIхэри иIэщтых. А IофшIэнхэр гъэцэкIэгъэнхэм илъэси 2-м кIахьэу ыхьыщт.
Адыгеим и ЛIышъхьэ анахьэу анаIэ зытыраригъэдзагъэр транспортыр зыдагъэуцущтхэр, хьакIэщым къыпэIулъ чIыпIэр зэтегъэпсыхьэгъэнхэр ары.
— ЗэкIэми зыкI теплъэ яIэу, ащ хэхьэ общественнэ транспортыр къызщыуцурэ чIыпIэри, гъэпсыгъэнхэ фае. ДгъэкIэжьырэ псэуалъэр аужырэ шапхъэхэм зэрадиштэщтым дакIоу, къэлэдэсхэм ыкIи республикэм къэкIорэ хьакIэхэм зыщагъэпсэфынымкIэ Iэрыфэгъоу щытын фае. А зэкIэри зэрэжъугъэцэкIэщтым шъуегупшыс, къэлэ шъхьаIэм имэхьанэ Мыекъуапэ игупчэ диштэным анахьэу шъунаIэ тежъугъэт, — къыхигъэщыгъ КъумпIыл Мурат.
