Адыгеир илъэси 100 зыщыхъурэм ехъулIэу сурэт галереер Мыекъуапэ щагъэцэкIэжьыгъ. МэфэкI шIыкIэм тетэу ар тыгъуасэ къызэIуахыжьыгъ, къэгъэлъэгъонэу «Искусство без границ» зыфиIорэр щызэхащагъ.
Къэгъэлъэгъоным ихьакIэ лъапIэхэм зэу ащыщыгъ Адыгэ Республикэм и ЛIышъхьэу КъумпIыл Мурат. Джащ фэдэу Iофтхьабзэм хэлэжьагъэх Урысые Федерацием и Президент и Полномочнэ лIыкIоу ЮФО-м щыIэм иаппарат АР-мкIэ ифедеральнэ инспектор шъхьаIэу Сергей Дрокиныр, АР-м культурэмкIэ иминистрэу Аулъэ Юр, Мыекъуапэ имэрэу Геннадий Митрофановыр.
ХьакIэхэм экспозициехэм нэIуасэ зафашIыгъ, гъэцэкIэжьын IофшIэнхэм кIэухэу афэхъугъэхэм защагъэгъозагъ. Ащ паекIэ федеральнэ, республикэ бюджетхэм сомэ миллион 11,4-рэ фэдиз къахагъэкIыгъагъ.
Адыгеим сурэтхэмкIэ игалерее ипащэу Бырсыр Абдулахь Адыгэ Республикэм и ЛIышъхьэ тхьауегъэпсэу риIуагъ гъэцэкIэжьынхэмкIэ IэпыIэгъу къызэрафэхъугъэм фэшI. 1980-рэ илъэсым къызэIуахыгъэ галереем апэрэу зэхъокIыныгъэшхохэр фашIыгъэх, джырэ шапхъэхэм ар адештэ.
Галереем ыкIоцIкIи, ыкIыбкIи Iофышхохэр рашIылIагъэх, унашъхьэр зэблахъугъ, унэ гупэми зэхъокIыныгъэхэр фашIыгъэх.
Квадрат метрэ 500 фэдиз хъурэ залышхо агъэпсыгъ.
Адыгейми, Темыр Кавказми ясурэтышIхэм яIофшIагъэхэр, живописымкIэ, графикэмкIэ IэшIагъэхэр, скульптурэхэр мыщ къыщагъэлъагъох. ПстэумкIи IэшIэгъи 100 ахэр мэхъух. 1970-рэ илъэсым къыщегъэжьагъэу 2021-рэ илъэсым нэс ашIыгъэхэр ары ащ къырахьылIагъэхэр. Портрет, пейзаж, натюрморт зэфэшъхьафхэр ахэм ахэлъых.
Адыгэ Республикэм и ЛIышъхьэ зэрэхигъэунэфыкIыгъэмкIэ, къэгъэлъэгъоныр къызэрэзэIуахыгъэмрэ республикэр илъэси 100 зыщыхъурэм фэгъэхьыгъэ Iофтхьабзэу зэрахьащтхэмрэ шъолъырым исхэм ятворческэ кIуачIэ зыкъызэIуегъэхыгъэнымкIэ мэхьанэшхо яI.
«ЦIыф зэчыишIухэр бэу Адыгеим исых. Тэ типшъэрылъыр ахэм яамалхэм икъоу зыкъызэIуягъэхыгъэнымкIэ ищыкIэгъэ пстэур зэшIотхыныр ары. Художественнэ искусствэм республикэм зыщегъэушъомбгъугъэным сурэт галереер зэрэфэIорышIэщтым, цIыфхэр нахьыбэу ащ творчествэм зэрэфищэщтхэм сицыхьэ телъ.
Мыекъуапэ ижъыкIэ теплъэу иIагъэр тIэкIу-тIэкIузэ зэтедгъэуцожьэу тыублагъ, саугъэтхэм ягъэкIэжьынкIэ, общественнэ чIыпIэхэм язэтегъэпсыхьанкIэ, искусствэхэмкIэ еджапIэхэм ягъэцэкIэжьынкIэ Iофышхо зетэхьэ. Культурэм зегъэушъомбгъугъэнымкIэ, лъэпкъ шэн-хабзэхэр ухъумэгъэнхэмкIэ творческэ союзхэмрэ общественнэ организациехэмрэ амалышхохэр яIэх», — къыIуагъ КъумпIыл Мурат.
ЗекIоным зегъэушъомбгъугъэным пае проектыкIэхэр зэрищыкIагъэхэм игугъу Адыгеим и ЛIышъхьэ къышIыгъ. ЗыгъэпсэфыпIэу «Лэгъонакъэ» зэрагъэпсырэм, зекIохэм япчъагъэ къызэрэхэхъощтым япхыгъэу этнокомплексыкIэхэр шIыгъэнхэ фаеуи хъущт. ЗекIохэм атегъэпсыхьэгъэ гупчэшхуищ республикэм щагъэпсынэу рахъухьэ. Ахэр Теуцожь районым, къалэу Мыекъуапэ, къушъхьалъэхэм ащашIыщтых.
ЦIыфхэм ягукъэкIхэм къадыригъэштэным, художественнэ искусствэм хэхъоныгъэ егъэшIыгъэным зэрафэхьазырыр республикэм ипащэ хигъэунэфыкIыгъ.
