Адыгеим и ЛIышъхьэу КъумпIыл Мурат Мыекъопэ районым ипащэу Олег Топоровым, АР-м мэкъу-мэщымкIэ иминистрэу Къуанэ Анзаур, къоджэ псэупIэхэм ялIыкIохэм поселкэу Тульскэм зэхэсыгъо тыгъуасэ щадыриIагъ.
ЧIыпIэ бюджетым федэу къихьэхэрэм, хъарджэу ашIыхэрэм, къэралыгъо программэу «Къуаджэхэм зэдиштэу хэхъоныгъэ ягъэшIыгъэныр» зыфиIорэр зэрагъэцакIэрэм атегущыIагъэх.
Мыекъопэ районым ипащэу Олег Топоровым къызэриIуагъэмкIэ, 2021-рэ илъэсым лъэныкъо 33-кIэ районым шIуагъэ къытэу Iоф ышIагъ. ЛъэныкъуабэхэмкIэ планым къырагъэхъугъ е агъэцэкIагъ.
ГъэрекIо къэралыгъо программэхэм ягъэцэкIэн пае сомэ миллион 482-рэ районым къыфыхагъэкIыгъагъ. Къэралыгъо программэу «Къуаджэхэм зэдиштэу хэхъоныгъэ ягъэшIыгъэныр» зыфиIорэм тетэу къатIупщыгъэ мылъкум щыщэу сомэ миллион 392-р къызфагъэфедагъ. А мылъкумкIэ псэолъэ 11 ашIын е агъэцэкIэжьын алъэкIыгъ. Шъолъыр проектэу «Спортыр — щыIэныгъэ шапхъ» зыфиIорэм диштэу Мыекъопэ районым сомэ миллион 63-рэ къыIукIагъ. АщкIэ цIыфхэм япсауныгъэ зыщагъэпытэрэ физкультурнэ комплекси 3 агъэпсыгъ. АР-м икъэралыгъо программэу «Гъэсэныгъэм зегъэушъомбгъугъэныр» зыфиIорэм диштэу районым къыIэкIэхьэгъэ сомэ миллион 27-мкIэ псэолъи 8-мэ гъэцэкIэжьын IофшIэнхэр арашIылIагъэх. Мыгъэ Iофтхьабзэу зэрахьащтхэм ащыщых станицэу Абдзэхэхьаблэ гъэсэныгъэмкIэ Гупчэу дэтымрэ поселкэу Победэм культурэмкIэ и Унэрэ гъэцэкIэжьыгъэнхэр, станицэу Дахъо искверрэ поселкэхэу Победэмрэ Тульскэмрэ яобщественнэ чIыпIэхэр нахь зэтегъэпсыхьэгъэнхэр.
Адыгеим и ЛIышъхьэ псэупIэхэм япащэхэм анаIэ тыраригъэдзагъ псэолъакIэхэр агъэпсыхэ, агъэцэкIэжьхэ е агъэкIэжьыхэ зыхъукIэ подряднэ организациехэм зэдэлэжьэныгъэу адыряIэр нахь агъэлъэшынэу.
«Къэралыгъо программэхэр районым щыгъэцэкIэгъэнхэмкIэ зизэрар къэкIон зылъэкIыщтхэр амал зэриIэкIэ щыгъэзыегъэнхэ фае. Тэ зэкIэ зыфатшIэрэр цIыфхэр ары. Яцыхьэ зытелъыжьэу ахэр неущырэ мафэм хэплъэнхэ, щыIэкIэ-псэукIэ дэгъу яIэным иамалхэр зехьэгъэнхэ, бизнес цIыкIумрэ гурытымрэ хэхъоныгъэ ягъэшIыгъэным тынаIэ тедгъэтын фае. ПсэупIэхэм япащэхэми ар зыхашIэн фае», — къыIуагъ КъумпIыл Мурат.
Сабыибэ зиIэ унагъохэу поселкэу Табачнэм дэсхэм къафыхагъэкIыгъэ чIыгу Iахьхэм яинженер инфраструктурэ изэхэщэн епхыгъэ Iофыгъом зэхэсыгъом шъхьафэу щытегущыIагъэх.
Шъугу къэтэгъэкIыжьы къэралыгъо программэу «Къуаджэхэм зэдиштэу хэхъоныгъэ ягъэшIыгъэныр» зыфиIорэм тетэу 2020 — 2021-рэ илъэсхэм мы микрорайоным газрыкIуапIэхэр, псырыкIуапIэхэр зэрэщагъэпсыгъэхэр, электрическэ сетьхэр зэрэращагъэхэр. ПстэумкIи сомэ миллиони 169-м ехъу ахэм апэIухьагъ. Подрядчикэу щытыгъэр компаниеу «Южгазстрой» зыфиIорэр ары. Iофтхьабзэхэр зызэрахьэхэкIэ, унэе унэхэр щыгъэпсыгъэнхэм фытегъэпсыхьэгъэ чIыгу Iахь 200-мэ инженер инфраструктурэ яIэ хъущт.
Сабыибэ зэрыс унагъохэу чIыгу Iахь къызэратыгъэхэм консультативнэ IэпыIэгъоу ящыкIагъэр арагъэгъотынэу республикэм и ЛIышъхьэ пшъэрылъ афишIыгъ.
